«ពួកគេសម្រេចថា នឹងសាងផ្នួស សម្រាប់រយៈពេល៩ថ្ងៃ» នេះ ជាការអះអាងឡើង របស់លោក «Prachon Pratsakul» អភិបាលខេត្តឈៀងរ៉ៃ ទៅកាន់ក្រុមអ្នកយកព័ត៌មាន ដោយបន្តថា៖ «ក្មេង១១នាក់ ពីចំណោមក្មេងទាំងអស់ នឹងបួសជាលោកនេន ខណៈគ្រូបង្វឹកពួកគេ ដែលឈ្មោះ ឯក នោះ នឹងបួសក្លាយជាព្រះសង្ឃ»។

រីឯកុមារម្នាក់ទៀត មិនបានចូលរួមក្នុងការកោរសក់បួសនេះទេ ដោយហេតុថា កុមាររូបនោះ ជាអ្នកកាន់សាសនាគ្រីស្ទិ៍។ នេះ បើតាមប្រសាសន៍ របស់លោក «Prachon Pratsakul» ដដែល។

ឯក ដែលជាឈ្មោះកាត់ របស់គ្រូបង្វឹក «Ekkapol Chantawong» ធ្លាប់បានបួសជានេនម្ដងហើយ កាលពីក្នុងវ័យកុមារ។ ដោយសារបទពិសោធន៍ដូច្នេះហើយ ទើបគ្រូបង្វឹកបាល់ទាត់រូបនេះ បានជួយកុមារទាំង១២នាក់ ឲ្យចេះធ្វើសម្មាធិ ដើម្បីរក្សាភាពស្ងប់ក្នុងចិត្ត នៅក្នុងរូងភ្នំបានយូរយ៉ាងដូច្នេះ។

កុមារៗ ដែលជាកីឡាករបាល់ទាត់វ័យក្មេង អាយុពី១១ ដល់១៦ឆ្នាំ និងគ្រូបង្វឹក អាយុ២៥ឆ្នាំ ចំនួន ១៣នាក់ ត្រូវបានសង្គ្រោះជាស្ថាពរ ចេញពីរូងភ្នំជាបន្តបន្ទាប់ រាប់ពីថ្ងៃអាទិត្យ ទី០៨ ខែកក្កដា មកទល់នឹងយប់ថ្ងៃអង្គារ ទី១០ ខែកក្កដា បន្ទាប់ពីពួកគេបានជាប់គាំង នៅក្នុងរូងភ្នំ ថាមល្លួង (Tham Luang - ភាគខាងជើងប្រទេសថៃ) អស់រយៈពេលជាង២សប្ដាហ៍ ដោយសារទឹកភ្លៀងជន់លិច​ច្រកចូល និងនៅតាមបណ្ដោយរូងភ្នំ។ គឺតំណក់ទឹក ធ្លាក់ពីពិដានរូងភ្នំ ដែលបានជួបបន្តជីវិត របស់ពួកគេ ដែលមិនមានអ្វីផ្សេង សម្រាប់ទទួលទានឡើយ នៅមុនពួកគេត្រូវបានរកឃើញ ដោយក្រុមអ្នកជួយសង្គ្រោះ។

នៅពេលចេញមកដល់ក្រៅវិញ ពួកគេទាំង១៣នាក់ ត្រូវបានបញ្ជូនទៅពិនិត្យព្យបាល នៅឯមន្ទីរពេទ្យ និងបានសម្រាកនៅទីនោះ រហូតមកដល់ដើមសប្ដាហ៍​ កន្លងមកនេះ។ កាលពីថ្ងៃព្រហស្បត្តិ៍ ពួកគេបានទៅស្រោចទឹក រំដោះគ្រោះ និងលើករាសី នៅក្នុងវត្តមួយ។

ព្រះសង្ឃបំបួស ព្រះនាម «Praphun Khomjoi» បានមានសង្ឃដីកាថា កុមារនិងគ្រូបង្វឹក ដែលត្រូវបួសនោះ នឹងត្រូវកោរសក់ នៅថ្ងៃទី២៥ ខែកក្កដាខាងមុខ មុននឹងទទួលស្បង់ចីវរ នៅមួយថ្ងៃក្រោយ។ ពួកគេនឹងលាចាក​សិក្ខាបទវិញ នៅថ្ងៃទី៤ ខែសីហាក្រោយ៕