ដូចការលើកឡើង របស់អាជ្ញាធរទួរគី ដែលអះអាងថា ខ្មាន់កាំភ្លើង ដែលបានបើកការបាញ់រះ ទៅលើ​ហ្វូង​មនុស្ស នៅក្នុងរង្គសាល កណ្ដាលក្រុង អ៊ីស្តាមប៊ូល កាលពីយប់ថ្ងៃចូលឆ្នាំថ្មី មានជាប់ពាក់ព័ន្ធ នឹងក្រុម​រដ្ឋ​អ៊ីស្លាម (ពាក្យ​អារ៉ាប់​ហៅ Daech ពាក្យ​កាត់​​បារាំង​​ហៅ EI ​​​អង់គ្លេស​​​ហៅ ISIS) នៅ​ព្រឹក​ថ្ងៃចន្ទនេះ អង្គការ​ភេរវនិយម​​មួយ​នេះ បានចេញមុខ មកប្រកាសទទួលស្គាល់ ថាទង្វើបាញ់​ប្រហារនេះ ពិតជាស្នាដៃ​របស់​«យុទ្ធជន»​​ម្នាក់​​របស់​​ខ្លួន។

សេចក្ដីប្រកាសព័ត៌មានមួយ របស់ក្រុមរដ្ឋអ៊ីស្លាម បានចេញសរសេរយ៉ាងដូច្នេះថា៖ «នៅក្នុងនិរន្តភាព នៃ​ប្រតិបត្តិការ​សាសនា ដែលដឹកនាំ​ដោយ​ក្រុម​រដ្ឋអ៊ីស្លាម ប្រឆាំងនឹងអ្នកការពារ នៃសម្ព័ន្ធឈើឆ្កាង (និមិត្តរូប​របស់​​សាសនាគ្រឹស្ទ៍) ដែលគេស្គាល់ថា ជាប្រទេសទួរគីនោះ យុទ្ធជនដ៏អង់អាចមួយរូប នៃ​រាជាណាចក្រ​ព្រះ​អាឡាហ៍​ជា​ម្ចាស់ បានចូលទៅ​កំទេច​រង្គសាល​មួយ ពីក្នុងចំណោមរង្គសាលល្បីៗជាច្រើន ដែលពួកគ្រឹស្ទ៍​សាស​និក បាន​ប្រារព្ធ​ពិធី​បុណ្យ ដ៏ចង្រៃឥតសាសនា របស់ពួកវា»។

ខ្មាន់កាំភ្លើង ដែលបានស្លៀកពាក់ ជា«តាណូអែល» បានចូលទៅបាញ់រះ នៅម៉ោងប្រមាណជា ១និង​១៥នាទី ក្នុង​​រង្គសាល «Reina» ដែលពេញពោរ​ដោយមនុស្ស ប្រមាណជា៦០០នាក់ ដើម្បីចូលរួមអបអរ​បុណ្យ​ចូលឆ្នាំថ្មី ឆ្នាំសកល។ មុននឹងចូល ទៅដល់ខាងក្នុងរង្គសាល ជននេះ​បានបាញ់​សម្លាប់ ភ្នាក់ងារ​នគរបាល​ម្នាក់ និង​មន្ត្រី​សន្តិសុខ​ម្នាក់​ទៀត នៅត្រង់​ច្រកចូល នៃរង្គសាល។

សារព័ត៌មានទួរគី ឈ្មោះ «Hürriyet» បានរាយការណ៍ ដោយមិនបាន​បញ្ជាក់​ពីប្រភពថា ខ្មាន់កាំភ្លើង ដែល​កំពុង​​រត់​គេចខ្លួន ពីការតាមចាប់ខ្លួន របស់​អាជ្ញាធរ​ទួរគីនោះ អាច​ជា​ជនជាតិ គៀរជីគីស្តង់ ឬអ៊ូប៊េគីស្ដង់។ កាសែត​​​បាន​​បន្ត​ថា ក្រុមអ្នក​ស៊ើបអង្កេត បាន​ជឿជាក់ថា ជននេះ​អាច​មាន​ជាប់​ពាក់ព័ន្ធ នឹង​ភេរវកម្ម​​បីកន្លែង នៅ​ព្រលាន​​​យន្ដហោះក្រុង​ អ៊ីស្តាមប៊ូល កាលពីខែមិថុនាមុន (ស្លាប់៤៧នាក់) ដែលប្រកាស​ទទួលស្គាល់ ដោយ​ក្រុម​​​រដ្ឋអ៊ីស្លាម​ដូចគ្នា។

សារព័ត៌មាន ដែល​ចេញផ្សាយ​​ប្រចាំថ្ងៃ​មួយនេះ បានបញ្ជាក់ទៀតថា នគរបាល និងចារកម្មរបស់ទួរគី បាន​ទទួល​​ដំណឹង​ជាមុនហើយ ពីការវាយ​ប្រហារ​ភេរវកម្ម នៅក្នុងយប់ថ្ងៃចូលឆ្នាំថ្មី បង្កឡើងដោយ​ក្រុម​រដ្ឋអ៊ីស្លាម។ ចារកម្ម​អាមេរិក ក៏បានព្រមានប្រទេសទួរគី នៅថ្ងៃទី៣០ ខែធ្នូ ដូចគ្នាថា នឹងមានអំពើ​ភេរវកម្ម នៅ​យប់​ថ្ងៃ​បុណ្យ ដោយ​គ្រាន់​តែ​​មិនដឹងថា តើវានឹងកើតឡើង នៅកន្លែងណាប៉ុណ្ណោះ។

នៅក្នុងពេលនេះ អាជ្ញាធរទួរគីកំពុងស្វែងរក ចាប់ខ្លួន​ជនសង្ស័យម្នាក់ ដែលទំនង​ជាខ្មាន់កាំភ្លើង។ ជននេះ​​បាន​រត់​​គេច​ខ្លួន និងបាន​ប្ដូរសម្លៀកបំពាក់ បន្ទាប់ពី​បានធ្វើ​សកម្មភាព​រួច៕