ត្រាំ បង្ហាញពី«អាទិភាពនយោបាយ» និងប្រកាសមិនយកបៀវត្សន៍
- ដោយ: សុបិន្ដ ([email protected]) - ម៉ុងរ៉េអាល់ ថ្ងៃទី១៤ វិច្ឆិកា ២០១៦
- កែប្រែចុងក្រោយ: November 15, 2016
- ប្រធានបទ: ឆ្ពោះទៅសេតវិមាន
- អត្ថបទ: មានបញ្ហា?
- មតិ-យោបល់
-
ដើម្បីពន្យល់ពីអ្វី ដែលលោកត្រូវធ្វើជាអាទិភាព បន្ទាប់ពីលោកបានចូលស្បថ ឡើងកាន់តំណែងជាប្រធានាធិបតីអាមេរិកនោះ លោក ដូណាល់ ត្រាំ (Donald Trump) ដែលទើបនឹងជាប់ឆ្នោតថ្មីថ្មោង បានជ្រើសរើសកម្មវិធី «៦០នាទី» របស់ស្ថានីយទូរទស្សន៍ «CBS» អាមេរិក ដើម្បីផ្ដល់កិច្ចសម្ភាសដំបូងរបស់លោក ក្នុងការបញ្ចាំងផ្សាយ តាមកញ្ចក់ទូរទស្សន៍ ជាសាធារណៈ។
ផ្ទុយពីការសន្យា ដែលលោកបានធ្វើ នៅក្នុងអំឡុងពេល នៃការឃោសនាបោះឆ្នោត លោក ដូណាល់ ត្រាំ បានប្ដូរជំហររបស់លោក នៅក្នុង«អាទិភាពនយោបាយ»របស់លោក នៅពេលនេះ ដូចជា គម្រោងថែរក្សាសុខភាពសាធារណៈ «Obamacare» របស់ប្រធានាធិបតីផុតតំណែង លោក បារ៉ាក់ អូបាម៉ា (Barack Obama) និងមិនចាត់ចំណាត់ការ នៅក្នុងពេលភ្លាមៗនេះ ប្រឆាំងអ្នកស្រី ហ៊ីឡារី គ្លីនតុន (Hillary Clinton) បេក្ខនារីគូប្រជែង មកពីគណបក្សប្រជាធិបតេយ្យទេ។
ច្បាប់ទាក់ទងនឹង «Obamacare» នឹងត្រូវធ្វើវិសោធនកម្ម ឲ្យ«ល្អស្អាត» ខណៈគម្រោងស៊ើបអង្កេតលើអ្នកស្រី គ្លីនតុន ទាក់ទងនឹងការប្រើប្រាស់ទូរសាអេឡិចត្រូនិកឯកជន ត្រូវបានលោក ត្រាំ ថ្លែងអះអាងថា៖ «វាមិនមែនជាបញ្ហា នៅក្នុងអាទិភាពនយោបាយ ដែលខ្ញុំបានគិតគូរយ៉ាងច្រើននោះឡើយ»។
ប្រធានាធិបតីជាប់ឆ្នោតថ្មី បានបញ្ជាក់បន្តថា លោកនឹងបន្តប្រើប្រាស់បណ្ដាញសង្គម ដែលបានជួយលោកឲ្យឈ្នះឆ្នោត ក្លាយជាប្រធាធាធិបតីអាមេរិក។ លោកថា ការបន្តប្រើប្រាស់នេះ គឺដើម្បីធ្វើការជូនដំណឹង ទៅដល់ប្រិយមិត្តរបស់លោកតទៅទៀត ប៉ុន្តែវានឹងមានលក្ខណៈ«នឹងធឹង»ជាងមុន។
នៅក្នុងកិច្ចសម្ភាសដដែល មហាសេដ្ឋី ត្រាំ បានបន្តពន្យល់ថា លោកនឹងគ្រោងបណ្តេញ ជនអន្តោប្រវេសន៍ខុសច្បាប់ ប្រមាណជាបីលាននាក់ ឲ្យចេញពីទឹកដីអាមេរិក។ ប៉ុន្តែលោកប្រធានាធិបតីជាប់ឆ្នោត ហាក់បានសំចៃមាត់មកវិញ ដោយរៀបរាប់សង្កត់ធ្ងន់ ទៅលើតែជនអន្តោប្រវេសន៍ណា ដែលជាឧក្រិដ្ឋជនប៉ុណ្ណោះ។
លោក ដូណាល់ ត្រាំ បានបញ្ជាក់ថា៖ «គឺចាប់បណ្តេញបណ្តាជន ដែលជាឧក្រិដ្ឋជន ជាប់ពាក់ព័ន្ធនឹងការកាត់ទោស របស់តុលាការ ដែលពួកគេ ស្ថិតក្នុងក្រុមជនខិលខូចទាំងឡាយ និងជាពួកអ្នករត់ពន្ធគ្រឿងញៀន។ ពួកនេះ មានចំនួនយ៉ាងតិច២លាននាក់ និងអាចដល់៣លាននាក់ ហើយយើងនឹងបញ្ជូនពួកគេ ទៅប្រទេសដើមវិញ ឬចាប់ដាក់ពន្ធនាគារ។»។
បន្ថែមពីលើនេះ ប្រធានាធិបតីជាប់ឆ្នោតថ្មី បានប្រកាសមិនយកប្រាក់ខែ សម្រាប់តំណែងជាប្រធានាធិបតីអាមេរិក លើកទី៤៥ ដែលមានប្រមាណជា ៤០០.០០០ដុល្លារ ក្នុងមួយឆ្នាំនោះទេ។ លោក ត្រាំ បានបញ្ជាក់ថា លោកនឹងកាត់ផ្ដាច់ចោល នូវរាល់កិច្ចការធ្វើជំនួញរបស់លោក ដោយទុកកិច្ចការទាំងនោះ ទៅឲ្យកូនៗរបស់លោក ជាអ្នកទទួលបន្ទុកបន្ត។ មហាសេដ្ឋី-ប្រធានាធិបតី បាននិយាយដូច្នេះថា៖ «ខ្ញុំចង់ប្រើពេលវេលារបស់ខ្ញុំ ទៅលើតែតួនាទី ជាប្រធានាធិបតីប៉ុណ្ណោះ ដើម្បីធ្វើយ៉ាងណា ឱ្យសហរដ្ឋអាមេរិក ត្រឡប់មករកភាពអស្ចារ្យ សាជាថ្មី»៕