«យើងបានឲ្យនាង ត្រឡប់ទៅ​ជាមួយ​ឪពុក​ជាតិ​វៀតណាម​របស់​នាង​វិញហើយ។ គ្រួសារទាំងសងខាង សុទ្ធ​តែ​បាន​បង្ហូរទឹកភ្នែក ដោយឃើញនាង បានជួបជុំជាមួយគ្រួសារខ្លួនវិញ។» នេះជាការលើកឡើង របស់លោក រចំ ខាំភី ដែលបានចាត់ទុកស្ត្រី«មនុស្សព្រៃ» ថាជាបងស្រីរបស់ខ្លួន ឈ្មោះ រចំ ភ្ញៀង ដែលបានបាត់ខ្លួន តាំង​ពី​១៨ឆ្នាំ​មុន។

ឪពុក​របស់លោក រចំ ខាំភី គឺលោក សល់ លូ បានជឿជាក់ កាលពីពេលលោកនៅមានជីវិតថា ស្ត្រី​«មនុស្ស​ព្រៃ» ថា​ជា​កូនស្រីច្បងរបស់លោក ដែលបានបាត់ខ្លួន នៅពេលដែលនាងតូច បានចេញទៅឃ្វាលក្របី ក្នុង​ទសវត្សន៍​ឆ្នាំ៨០។

ហេតុការណ៍ដ៏ភ្ញាក់ផ្អើលនេះ បានកើតឡើងកាលពីដើមឆ្នាំ២០០៧ ខណៈពេលស្ត្រី​«មនុស្សព្រៃ» ដែលមាន​រូបរាង​ប្រឡាក់កខ្វក់ និងគ្មានខោអាវជាប់ខ្លួន បានចេញពីព្រៃ ហើយបានចូលមកលួច​ចំណីអាហារអ្នកស្រុក នៅ​ក្នុង​ខេត្តរតនគីរី។ សាក្សីដែលបានឃើញនាងដំបូង បាននិយាយថា ស្ត្រី«មនុស្សព្រៃ»​ដែលមាន​អាយុ​ប្រមាណ​ជាង​២០ឆ្នាំរូប​នេះ បានដើរវាជើងបួន ដូចជាសត្វស្វាដូច្នេះ។

ប៉ុន្តែរូបភាព និងព័ត៌មានទាំងឡាយ ដែលត្រូវបានគេបង្ហោះ នៅតាមបណ្ដាញសង្គម បានឮទៅដល់ឪពុក​បង្កើត និងគ្រួសារពិតប្រាកដ​របស់នាង នៅក្នុងប្រទេសវៀតណាម ដែលរស់នៅមិនឆ្ងាយប៉ុន្មាន ពីព្រំដែន​កម្ពុជា។ ក្រុមគ្រួសារជាតិវៀតណាម បានអះអាងថា ស្ត្រី«មនុស្សព្រៃ»រូបនេះ ដែលមានសតិ«មិនគ្រប់» តាំង​ពី​ក្មេង​វ័យ​មកនោះ ទើបតែបានបាត់ខ្លួនពីផ្ទះ ក្នុងឆ្នាំ២០០៦នេះប៉ុណ្ណោះ ពោលគឺបាត់ខ្លួន១ឆ្នាំ មុនពេលគេ​ឃើញ​នាង ចូលមកលួចចំណីអាហារអ្នកស្រុក ក្នុងឆ្នាំ២០០៧។

ក្រុមគ្រួសារពិតរបស់ស្ត្រី ដែលធ្លាប់មានឈ្មោះ «រចំ ភ្ញៀង» បាននាំកូនស្រីទៅរស់នៅ ក្នុងទឹកដីវៀតណាម​វិញ ជាមួយនឹងតំណក់ទឹកភ្នែក ពីសំណាក់គ្រួសារទាំងសងខាង។ ប៉ុន្តែក្រុមគ្រួសារពិត បានជូនសរគុណ នៃការ​ចិញ្ចឹម​បីបាច់​កូន​ស្រីខ្លួន ទៅឲ្យគ្រួសារខ្មែរ ជាទឹកប្រាក់​ប្រមាណជា ១៥០០ដុល្លារ (ត្រូវជា១៣០០អ៊ឺរ៉ូ)៕