ប្រតិកម្មពីស្ថានទូតសហរដ្ឋអាមេរិក ប្រចាំប្រទេសកម្ពុជា បានធ្លាក់មកដល់។ ស្ថានទូតប្រទេសមហា​អំណាច​​​ដ៏​ធំ​មួយ​នេះ បានចេញសេចក្ដីថ្លែងការណ៍​​នៅល្ងាចថ្ងៃព្រហស្បត្តិ៍នេះ បង្ហាញការព្រួយបារម្ភ​«យ៉ាង​ខ្លាំង»​របស់​​ខ្លួន អំពី​ព្រឹត្តិការណ៍ចុងក្រោយ នៅក្នុងប្រទេសកម្ពុជា ជាពិសេសការប៉ុនប៉ងចាប់ខ្លួន​លោក កឹម សុខា នៅ​ព្រឹក​ថ្ងៃ​នេះ។

សេចក្ដីថ្លែងការណ៍​របស់ស្ថានទូតអាមេរិក ដែលត្រូវបានបង្ហោះនៅលើទំព័រហ្វេសប៊ុករបស់ស្ថានទូត បាន​សរសេរ​ថា ការដាក់ពង្រាយកងកម្លាំងអាជ្ញាធរ ឡោមព័ទ្ធទីស្នាក់ការកណ្តាល​គណបក្ស​សង្គ្រោះ​ជាតិ និង​ការ​ប្រឈម​មុខ​គ្នា ជាមួយនឹងក្រុមអ្នកគាំទ្រ របស់គណបក្សនេះ នៅថ្ងៃទី ២៦ ខែ​ឧសភា បាន​បង្ហាញ​ពី​​ជំហាន​មិន​​សមាមាត្រ និងប្រកបដោយគ្រោះថ្នាក់។

ស្ថានទូតរបស់ប្រទេសមហាអំណាច បានអំពាវនាវដល់រដ្ឋាភិបាលកម្ពុជា ឱ្យបញ្ឈប់ការប្រើប្រាស់​កម្លាំង ដែល​មិន​ចាំ​បាច់ ហើយ​ជម្រុញ​ឱ្យរដ្ឋាភិបាល និងគណបក្សសង្គ្រោះជាតិ បន្តការជជែកគ្នាជាបន្ទាន់ ដើម្បីស្វែង​រក​ដំណោះ​ស្រាយ ដោយ​សន្តិវិធី នៅចំពោះវិបត្តិនេះ។

នៅវេលា​ម៉ោង​ប្រមាណ ជា១២ និង២០នាទី ថ្ងៃព្រហស្បត្តិ៍ ទី២៦ ខែឧសភា ឆ្នាំ២០១៦នេះ កងកម្លាំង​អាជ្ញាធរ​ជា​ច្រើន​នាក់ ប្រដាប់​​ដោយ​​អាវុធ (ធុនធ្ងន់) គ្រប់ដៃ បានព្យាយាមសំរុក​ចូល ក្នុង​ស្នាក់ការគណបក្ស​​សង្គ្រោះ​​ជាតិ​ (នៅ​​សង្កាត់​ចាក់​អង្រែ រាជធានី​ភ្នំពេញ) ប៉ុន្តែ​ពួកគេបាន​​ចាកចេញ​​​ទៅ​​វិញ បន្ទាប់​ពី​មន្ត្រី​សន្តិសុខ​​របស់​​គណបក្ស​បាន​​​ស្នើ​​​សុំ និង​​សួរ​​រក​​ក្រដាស​​​ស្នាម គតិយុទ្ធ (​ដីកា) ដើម្បី​​អនុញ្ញាត​​​​ឲ្យ​​មាន​​ការ​​​«សំរុក»​​ចូល​​នោះ។ នេះ​បើ​តាម​ការ​អះអាង របស់​លោក អេង ឆៃអ៊ាង តំណាងរាស្ត្រ និងមន្ត្រីជាន់ខ្ពស់​របស់​គណបក្ស​សង្គ្រោះ​ជាតិ។

នៅមុននេះ ប្រមាណជាជិត១ម៉ោង កងកម្លាំងប្រដាប់អាវុធ ក្នុងឯកសណ្ឋានតែមួយនេះ បាន​ឃាត់​រថយន្ដ​របស់​លោក កឹម សុខា នៅត្រង់​ចំណុច​ ក្បែរ​សាលា​ពញាហុក លើផ្លូវ​នរោត្តម។ រថយន្ដនោះ ត្រូវ​បាន​ដោះ​លែង ​នៅ​ពេល​​បន្ទាប់​​មក៕