បើគេជឿថា បាល់ទាត់ជាកីឡារ ដែលមានភាពយុត្តិធម៌ច្រើនបំផុតនោះ គឺពិតជាខុសហើយ។ ជាក់ស្ដែង​ណាស់ ដូចករណីកីឡាករចាំទី «Marwin Hitz» របស់ក្រុម «FC Augsbourg» ក្នុងប្រទេសអាល្លឺម៉ង់ នេះ​ជា​ដើម។ កាល​ពីរសៀលថ្ងៃី៥ ខែធ្នូ ឆ្នាំ២០១៥ ជំនួបរវាងក្រុម «FC Cologne» និងក្រុម «FC Augsbourg»  បាន​ឈាន​មកដល់ដំណាក់កាល ទាត់បាល់ពិន័យ១១ម៉ែត្រមួយគ្រាប់ ដោយសារអាជ្ញាកណ្ដាល មើលពីកំហុស របស់​កីឡាករ​ក្រុម «FC Augsbourg»។

ប៉ុន្តែកីឡាករចាំទី មិនបានទុកឲ្យការទាត់បាល់ពិន័យនោះ អាចប្រព្រឹត្តិទៅធម្មតា ដូចការប្រកួតផ្សេងៗ នៅ​ក្នុង​ពិភពបាល់ទាត់នោះទេ។ កីឡាករ «Marwin Hitz» បានយកជើង ជាមួយនឹងស្បែកជើង​ដែលមានបន្លា​របស់​ខ្លួន ទៅ​ឈ្លីខួង​ដីកន្លែងដាក់បាល់ពិន័យ បង្កឲ្យស្មៅនៅត្រង់ផ្ដុំនោះ របើកខ្ទេចខ្ទីអស់។ ជាលទ្ធផល ដែល​ដូច​ការ​ចង់​បាន របស់កីឡាករ «Marwin Hitz» ដែលលេងខូចនេះមែន គឺកីឡាករ «Anthony Modeste» របស់​ក្រុម «FC Cologne» ដែលចូលមកទាត់បាល់ពិន័យ បានរអិលភ្លាត់ជើង ពីកន្លែងដែលត្រូវបានឈ្លី​កម្ទេច​នោះ ហើយ​ក៏​រក​គ្រាប់​បាល់ ពីការទាត់នេះមិនបានដែរ។

សម្រាប់សហព័ន្ធបាល់ទាត់អាល្លឺម៉ង់ (DFB) កាយវិការមិនមានលក្ខណៈកីឡា របស់កីឡាករចាំទី «Marwin Hitz» មិនទទួលរងនូវទណ្ឌកម្មអ្វីឡើយ។ ប៉ុន្តែកីឡាករក្បាលខូច ត្រូវបានតម្រូវឲ្យបង់ប្រាក់ ១២២,៩២អ៊ឺរ៉ូ (ប្រមាណ​ជា១៣៧ដុល្លា) ដើម្បីជួសជុលស្មៅប៉ុន្មានគុម្ភ ដែលកីឡាករបានឈ្លីកម្ទេច។ អ្នកទទួលខុសត្រូវ នៃ​កីឡាដ្ឋាន​ក្រុង «Cologne» ដែលជាកន្លែងប្រកួតបាល់ទាត់ កាលពីថ្ងៃសៅរ៍នោះ បានថ្លែងឲ្យដឹងថា៖ «មិន​មែន​យើងចង់បានប្រាក់នេះទេ តែគួរតែមានទណ្ឌកម្មខ្លះទើបល្អ»។ អ្នកទទួលខុសត្រូវរូបនេះ បានអះអាងថា នឹង​យក​ប្រាក់​នេះ បញ្ជូនទៅឲ្យមន្ទីរពេទ្យកុមារមួយ នៅក្នុងក្រុង៕