ទឹកជំនន់ឡើងខ្ពស់ ជន់លិចសណ្ឋាគារប្រណិតៗ  រថយន្ដរាប់សិប និងសូម្បីតែប្រធានាធិបតីនៃប្រទេស ក៏ត្រូវមូរជើងខោ ដើម្បីដើរចូលទៅក្នុងវិមានរបស់លោកដែរ។ ទីក្រុងចាការតា ត្រូវរងគ្រោះនឹងទឹកជំនន់មួយ ដែលបានកើតមាន​ជាលើក​ដំបូងនៅក្នុងប្រវត្តិសាស្ត្រ។

រង្វង់មូល ដែលមើលទៅដូចជាក្លាយជាកូនបឹងមួយ នៅកណ្ដាលទីក្រុង។ រូបថត AP Photo/Achmad Ibrahim។

«រដ្ឋធានី ចាការតា រងគ្រោះដោយទឹកជំនន់!» នេះជាការទទួលស្គាល់របស់ប្រធានាធិបតី លោកស៊ុយស៊ីឡូ ប៊មបាង យូដូយូណូ (Susilo Bambang Yudhoyono) ជាមួយនឹងជើងខោលាត់ឡើងរហូតត្រឹមជង្គង់ និងជើងរបស់លោក ត្រាំក្នុង​ទឹកដែលមានពណ៌ល្អក់ ចូលមកវាយលុកក្នុងវិមានប្រធានាធិបតី កណ្ដាលទីក្រុង។

មិនឆ្ងាយពីទីនេះប៉ុន្មាន ស្ថានទូតបារាំង អាឡឺម៉ង់ និងអង់គ្លេសជាពិសេស ក៏ត្រូវបានព័ទ្ធជុំជិតដោយ «ទឹកល្ហល្ហេវ» ដូចគ្នា​នឹងសណ្ឋាគារដ៏ប្រណិតៗ ឬអាគារកញ្ចក់ខ្ពស់ៗ ដែរនោះ។

រថយន្ដរាប់ពាន់គ្រឿង ជាប់គាំង

រថយន្ដរាប់ពាន់ ត្រូវជាប់គាំង តាំងពីព្រឹកព្រលឹម ហើយមានមួយចំនួនត្រូវបានម្ចាស់វាបោះបង់ចោល។ ចំណែកឯអ្នករត់​ម៉ូតូឌុបវិញ ខិតខំរុញយាន្ដរបស់ខ្លួន ទាំងត្រដាបត្រដួស ឆ្លងកាត់ទឹកលិចពាសវាល ពាសកាល ឡើងខ្ពស់ជិតដល់​ដៃចង្កូត​របស់ម៉ូតូ។

នៅក្នុងសង្កាត់ខ្លះ ដែលទឹកមិនបានរាលដាលទៅដល់ ឬនៅខ្ពស់ជាង ត្រូវរងនឹងសភាពស្ទះចរាចរណ៍រាប់សិបគីឡូម៉ែត្រ។ ចរាចរណ៍ ដែលបណ្ដាជនជិត២០លាននាក់ រស់នៅក្នុងទីក្រុងនេះ ពិបាកនឹងធ្វើដំណើររួចទៅហើយ នៅក្នុងពេលធម្មតា​មិនមានទឹកជំនន់។ ទីក្រុងទាំងមូល ត្រូវជាប់គាំងមិនមានដំណើរការ ដោយហេតុថាការិយាល័យជាច្រើន នៅទំនេរដោយ​គ្មានបុគ្គលិកមកធ្វើការ។

តុល្យភាពចុងក្រោយ នៅមិនទាន់ច្បាស់

ប្រធានាធិបតីឥណ្ឌូនេស៊ី លោកយូដូយូណូ ប្រកាសថា «ខ្ញុំសង្ឃឹមថា មិនមានជនរងគ្រោះច្រើននាក់ពេកទេ» មុននឹង​លោកទៅសម្ងួតជើងរបស់លោក ដែលទទឹកនឹងការដើរកាត់ទឹកមុននេះ។ កាលពីយប់ថ្ងៃពុធ តុល្យភាពនៃទឹកជំនន់នេះ បានអោយដឹងថា មានមនុស្សស្លាប់ពីរនាក់ ក្នុងនោះទារកម្នាក់ ត្រូវទឺកនាំគូចយកទៅ និងបណ្ដាជនប្រមាណជាជាង ដប់ពាន់នាក់រងនឹងការខ្វះជម្រក។ នៅថ្ងៃព្រហស្បត្តិនេះ ក្រុមភ្នាក់ងារអ្នកជួយសង្គ្រោះ នៅមិនទាន់អោយដឹង ពីចំនួន​អ្នករងគ្រោះថ្មីនៅឡើយ។

ការប្រកាសភាពអាសន្ន បានធ្វើឡើងក្នុងកម្រិតខ្ពស់បំផុត និងស្ថានភាពនេះ នឹងអាចមានរយះពេលយូតទៅទៀត។ នេះជាការអោយដឹងរបស់ អ្នកនាំពាក្យភ្នាក់ងារជាតិ ដើម្បីគ្រប់គ្រងគ្រោះធម្មជាតិ លោក ស៊ូតូប៉ូ ពៀវូ នូហ្គ្រូហូ (Sutopo Purwo Nugroho)។ លោកនូហ្គ្រូហូ បានធ្លោយមាត់ប្រាប់អ្នកសារពត៌មានថា «ទីក្រុងចាការតា បានហ៊ំព័ទ្ធដោយទឹក»។

ទីក្រុងចាការតា បានស្គាល់ជារៀងរាល់ឆ្នាំ នូវទឹកជំនន់ នៅពេលរដូវភ្លៀង (ពីខែធ្នូ ទៅដល់ខែមេសា) ប៉ុន្តែលើកនេះ ជាង​ពេលណាៗទាំងអស់ ជាគ្រោះធម្មជាតិមួយយ៉ាងអាក្រក់ មិនធ្លាប់ដែលជួបពីមុនម៕

--------------------------------------------------------
ដោយ ៖ កេសរកូល - ភ្នំពេញ ថ្ងៃទី ១៧ ខែមករា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ