វត្តអារាម ជាទីសំណាក់ធម៌ និងប្រតិបត្តិធម៌របស់ព្រះពុទ្ធសាសនា។ កាលណាវត្តអារាម មានសម្លេង​រំខាន​មិន​ដាច់ វានឹងក្លាយទៅជារឿងមួយ គួរឱ្យបារម្ភ។ ព្រះសង្ឃមួយអង្គ គង់នៅវត្តខាងលើ បានមានសង្ឃដីកា​ប្រាប់​ទស្សនាវដ្តីមនោរម្យ.អាំងហ្វូថា នៅក្នុងវត្តស្ទឹងមានជ័យសព្វថ្ងៃ កំពុងមានក្រុមហ៊ុនគ្រឿងចក្រមួយ ​ឯកទេស​ខាង​ចាក់គ្រឹះ បេតុង និងបុកគ្រឹះ របស់លោក កែម ប៊ុនអឿន ហៅ រ៉ា បាននឹងកំពុងដំណើរការ ធ្វើអាជីវកម្ម​នៅ​ក្នុងវត្ត។ ប្រភពបន្ថែមថា ការស្នាក់នៅ និងធ្វើអាជីវកម្មខាងលើ ដោយមានកាចុះកិច្ចសន្យាជាមួយ ចៅអធិការ​វត្ត ប្រមាណជាពីរឆ្នាំ។

ការអះអាង របស់ប្រភពខាងលើ មិនត្រូវបាន ប្រធានក្រុមហ៊ុនចាក់គ្រឹះបេតុង និងបុកគ្រឹះ លោក កែម ប៊ុនអឿន ហៅ រ៉ា ធ្វើការបដិសេធន៍នោះទេ។ លោក បានថ្លែងប្រាប់ទស្សនាវដ្ដីថា លោកពិតជាបានធ្វើកិច្ចសន្យា ជាមួយ​ចៅអធិការ និងមានការអនុញ្ញាត ពីគ្រូសូត្រឆ្វេង និងគ្រូសូត្រស្តាំ នៅក្នុងវត្តថែមទៀត។ ប្រធានក្រុម​អាជីវកម្ម​មួយនេះ បានលើកពីគុណសម្បត្តិរបស់ខ្លូន ដែលបានជួយកសាងវត្តស្ទឹងមានជ័យថា លោកបានចំណាយ​លុយ សរុបប្រមាណ មួយម៉ឺនដុល្លារ ក្នុងការកសាងវត្តនេះ ចាប់តាំងពីពេលមកតាំងទី ធ្វើអាជីវកម្មនៅទី​នោះ។ ផ្ទុយទៅវិញ លោកមិនបានសិក្សា និងបង្ហាញពីផល់ប៉ះពាល់ជាច្រើន ដល់ព្រះសង្ឃ និងព្រះពុទ្ធសាសនា​នោះ​ឡើយ។ លោកបានបញ្ជាក់ជាចុងក្រោយថា កិច្ចសន្យាដែលបានចុះ ជាមួយចៅអធិការវត្ត មានរយៈពេល២ឆ្នាំ តែលោកសុំអនុញ្ញាត បើមានការលើសលួសពេល ព្រោះកំពុងរកទិញដី បោះទីតាំងថ្មីមិនទាន់បាន។

ចំពោះការលើឡើងរបស់លោក កែម ប៊ុនអឿន ត្រូវបានគ្រូសូត្រស្តាំ ព្រះតេជគុណ យ៉ឹម ឯមវិត្ថា មាន​សង្ឃដីកា​ថា មានការ​រំខាន​ខ្លាំងណាស់សព្វថ្ងៃ នៅក្នុងវត្ត ព្រោះម៉ាស៊ិនគ្រឿងចក្រ សុទ្ធតែជាគ្រឿងធុនធ្ងន់ មានសម្លេង​រំខាន ដល់ព្រះសង្ឃ ក្នុងការប្រតិបត្តិសាសនា។ ម្យ៉ាងវិញទៀត ចំពោះកម្មករដែលរស់នៅទីនោះ មិនដែល​គិត​ថា ទីនេះជាវត្តអារាមទេ មានពេលខ្លះ ជេរប្រទេចដាក់គ្នា (ឡូឡា) ជារៀងរាល់ថ្ងៃ។ គ្រូសូត្រស្តាំ បានបញ្ជាក់​ចំពោះ​ប្រាក់ ដែលប្រធានក្រុមហ៊ុនបានលើកឡើងថា មួយម៉ឺនដុល្លានោះ មិនមែនជាការកសាង តែម្នាក់ឯង​នោះ​ទេ មានពុទ្ធបរិស័ទជាច្រើនទៀតចូលរួម។ រួមទាំងការចាក់ដី នៅក្នុងវត្តក៏ដោយ ក្រុមអាជីវកម្មធ្វើ ដើម្បីតែ​ផល​ប្រយោជន៍​ខ្លូនឯងច្រើនជាង។

ព្រះតេជគុណ យ៉ឹម ឯមវិត្ថា បានបន្ថែមទៀតថា ព្រះអង្គធ្លាប់បានទៅជួបជាមួយ ប្រធានគ្រឿងចក្រ​នេះម្តង​រួច​មកហើយ បាននិយាយពីការមិនពេញចិត្ត និងមិនអនុញ្ញាតឱ្យនៅបន្ត តែប្រធានក្រុមហ៊ុននេះបានសុំថា សុំ​ដាក់​មួយគ្រាសិន ទម្រាំរកកន្លែងថ្មីបាន។ ព្រះអង្គបានមានសង្ឃដីកា តបវិញថា ពាក្យមួយគ្រានេះ ព្រះតេជគុណ​កំពុង​បារម្ភ ព្រោះការធ្វើនៅតែបន្តជីកកកាយ បន្ថែមបន្ថយដីនៅក្នុងវត្ត ដោយខ្លាចថ្ងៃណាមួយ និងបាត់បង់​ដី​វត្តអារាម របស់ពុទ្ធសាសនិក។

ជាចុងក្រោយ គ្រូសូត្រស្តាំបានសំណូមពរ ទៅដល់អជ្ញាធរដែនដី ដែលមានកម្លាំងសមត្ថកិច្ច មេត្តាចុះជួយ​អន្តរាគមន៍ផង ព្រោះ រឿងក្រុមហ៊ុនគ្រឿងអាជីវកម្ម ជាសមត្ថកិច្ចខាងអាណាចក្រ របស់អាជ្ញាធរ។ ព្រះអង្គ​មាន​សង្ឃដីកា ទាំងក្តីបារម្ភថា៖ «អាជ្ញាធរដែនដីជួយដោះស្រាយ អាត្មាផង យូរៗទៅមិនមែនវត្តទេ ដូចកន្លែង​អនាថា​ទៅ​ហើយ»។

ទស្សនាវដ្ដីមនោរម្យ.អាំងហ្វូ បានសាកសួរករណីនេះ ទៅលោក សេង សាញ់ ចៅសង្កាត់ស្ទឺងមានជ័យ តែមិន​មានចម្លើយជាវិជ្ជមានទេ។ ផ្ទុយទៅវិញ ចៅសង្កាត់រូបនេះ បានឆ្លើយតប ដោយប្រើសម្ដីខ្លាំងៗ ជាមួយអ្នក​សារព័ត៌មានថា៖ «ខ្ញុំមិនបានដឹង រឿងទាំងអស់នេះទេ! ឥឡូវខ្ញុំកំពុងរវល់ប្រជុំ»៕