«ចេះ គឺជាប់» ជាពាក្យថ្មី របស់លោករដ្ឋមន្ត្រីក្រសួងអប់រំ ដើម្បីសំគាល់ពីការប្ដេជ្ញាចិត្ត ក្នុងការកែទម្រង់​ប្រព័ន្ធ​អប់រំ ពិសេសតាមរយៈ ការប្រលងប្រជែងទូទាំងប្រទេស យកសញ្ញាបត្រ «ទុតិយភូមិ» ដែលចាប់ផ្ដើម នៅថ្ងៃ​ទី២៤ ខែសីហា ឆ្នាំ២០១៥នេះ។ សាលារៀនជាច្រើន បានផ្អាកឲ្យសិស្សឈប់សម្រាក មួយរយៈពេលខ្លី ដើម្បី​យកទីតាំងសាលារៀននោះ បើកជាបន្ទប់ សម្រាប់ការប្រលង។

ការប្រលងឆ្នាំនេះ តម្រូវឲ្យមានមណ្ឌលសរុប ប្រមាណជា៣.៥៧៦បន្ទប់ ដែលមានសិក្សានុសិស្ស ៨៨ ៤៨៨​នាក់ចូលរួម ក្រោមការឃ្លាំមើលយ៉ាងតឹងរឹងបំផុត ពីសំណាក់គណៈមេប្រយោគ គ្រប់គ្រងដោយក្រសួងអប់រំ។ ក្នុងពេលនេះដែរ ក៏មានក្រុមសង្កេតការណ៍យុវជន (ដឹកនាំដោយលោក ហ៊ុន ម៉ានី ប្រធានសភាពសហព័ន្ធ​យុវជនកម្ពុជា) និងក្រុមការងារ នៃអង្គភាពប្រឆាំងអំពើពុករលួយ( ដឹកនាំដោយលោក ឱម យ៉ិនទៀង)។  នេះ បើតាមការអះអាង របស់លោក ហង់ ជូនណារ៉ុន រដ្ឋមន្រ្តីក្រសួងអប់រំកម្ពុជា។

ភាពតឹងរឹងនៃការប្រលងនេះ ដោយផ្តោតសំខាន់ លើការលបមើល ចម្លងកិច្ចការគ្នា ការអង្គុយខុសទីតាំង ដែល​បានកំណត់ ការលួចចម្លងតាមឯកសារនានា ការប្រើប្រាស់នូវឧបករណ៍អេឡិចត្រូនិច ក្នុងបន្ទប់ប្រលង​នោះ។ ក្នុងដំណាក់ការនៃការបើក «សម្ភោធ» នៃការប្រលងនេះ នៅវិទ្យាល័យព្រះស៊ីសុវត្ថិក្ នុងរាជធានីភ្នំពេញ លោក​រដ្ឋមន្រ្តីក្រសួងអប់រំ បានបញ្ជាក់ថា សិស្សដែលល្មើស នឹងបទបញ្ជាផ្ទៃក្នុងការប្រលង ឬល្មើសនឹង លក្ខខណ្ឌ​នានា នៃគណមេប្រយោគ នឹង«ធ្លាក់ ដោយស្វ័យប្រវត្តិ ឬអាចឈានដល់ការពិន័យ ដោយមិនអនុញ្ញាត មិនឲ្យ​ចូលរួម​ប្រលង ក្នុងឆ្នាំបន្ទាប់ (ឆ្នាំ២០១៦)» ជាដើម។

រដ្ឋមន្រ្តីរូបនេះបានលើកឡើងថា លោកសង្កេតឃើញ សិក្សានុសិស្សទាំងអស់ មានទឹកមុខស្រស់ស្រាយ និង​គ្មានការភិតភ័យឡើយ។ ឯអ្នកលក់ដូរ និងអាជីវករនានា នៅជំវិញមណ្ឌលប្រលង មានការសហការល្អ ច្រើន​ជាង​ឆ្នាំមុន។ លោកបានបង្ហាញនូវទស្សនៈផ្ទាល់ខ្លួនដូច្នេះថា៖ «យើងចង់ឲ្យគុណភាពអប់រំបានល្អ ដើម្បីគាត់​ឡើងទៅឧត្តសិក្សា ក៏បានល្អ ឬទៅមួយគាត់ទៅចាប់យក ទៅធ្វើការក្តី ឬចាប់យកជំនាញអ្វីមួយក្តី ឲ្យបានល្អ។ (...) ការពង្រឹងការប្រលងនេះ ក៏ជាឲ្យពូកគាត់ ទៅចាប់យកជំនាញណាមួយ បានល្អដែរ។»

សូមបញ្ជាក់ថា អ្នកសង្កេតការណ៍ ខាងក្រសួងអប់រំ មានចំនួន១២.០៤៥នាក់។ អ្នកសង្កេតការណ៍ របស់​អង្គភាព​ប្រឆាំងអំពើពុករលួយ មានចំនួន ៥.៦២៥នាក់ និងក្រុមយុវជន ព្រះសង្ឃ ដែលចូលរួមជាអ្នក​សង្កេត​ការណ៍ នៃ​សហភាព​សហព័ន្ធយុវជនកម្ពុជា មានចំនួន ១.១១៧នាក់/អង្គ៕