ស្រ្តីជាប្រពន្ធ ឈ្មោះ ខាន់ យឿ បានប្រាប់ទស្សនាវដ្តីមនោរម្យ.អាំងហ្វូ នៅព្រឹកថ្ងៃទី១១ ខែសីហា នេះថា ដំបូង​ឡើយ អ្នកស្រីមិនបានឃើញទេ គ្រាន់តែលឺសម្លេងហាក់ចម្លែក ទើបចេញមកបើកទ្វារផ្ទះមើល ក៏ប្រទះឃើញ​មនុស្ស កំពុងធាក់បញ្ឆេះម៉ូតូអ្នកស្រី តែមិនទាន់ឆេះ។ ភ្លាមនោះ អ្នកស្រីបានដាស់ស្វាមី រួចឆោឡោស្រែក​ឲ្យ​អ្នកជិតខាង ជួយដេញជនសង្ស័យខាងលើ។ ហេតុការណ៍បង្កការភ្ញាក់ផ្អើល ដល់អ្នកជិតខាងនេះ កាលពី​វេលា​ម៉ោង១ និង៣០នាទីយប់ ថ្ងៃទី១០ ចូលមកថ្ងៃទី១១ ខែសីហា ឆ្នាំ២០១៥។

លោក ស៊ឹម ឆាត វ័យ ៣៥ឆ្នាំ ជាស្វាមីបានឲ្យដឹងដែរថា លោកបច្ចុប្បន្ន ជាអ្នករត់ម៉ូតូកង់បី រស់នៅភ្នំពេញជា​មួយ​ប្រពន្ធ នៅថ្ងៃយប់កើតហេតុ ម៉ូតូរបស់លោក ចតទុកនៅមុខផ្ទះ ដូចរាល់ដង តែថ្ងៃនេះ លោកមិនបានចាក់សោរ​ទេ។ លោកបន្ថែមទៀតថា អ្នកចូលដោះម៉ូតូលោក មិនបានសម្រេចទេ ហើយចូលលួចដោះម៉ូតូ តែម្នាក់ឯង​ប៉ុណ្ណោះ ដែលលោកមិនអាចចំណាំភិនភាគបាន ព្រោះមេឃងងិតពេក។ ពេលកំពុងតែបញ្ឆេះម៉ូតូ ក៏ស្រាប់តែ​ត្រូវ​ម្ចាស់ភ្ញាក់ទាន់ ហើយបានស្រែកឲ្យអ្នកជិតខាងជួយ ធ្វើឲ្យចោរភ័យលោះព្រលឹង ហើយស្រវេស្រវា​រត់គេច​ខ្លួន បាត់ស្រមោល។

ម្ចាស់ម៉ូតូរងគ្រោះខាងលើ រស់នៅក្រុមទី៣ភូមិដំណាក់ធំ សង្កាត់ស្ទឹងមានជ័យ ខណ្ឌមានជ័យមាន រាជធានី​ភ្នំពេញ និងមានស្រុកកំណើត នៅភូមិអង្គ្រង ឃុំអង្គរស ស្រុកមេសាង ខេត្តព្រៃវែង។ តាមសំដីរបស់​ប្រជា​ពលរដ្ឋ​ម្នាក់ បានប្រាប់អ្នកសារព័ត៌មានថា ចោរហ៊ានចូលលួចម៉ូតូកង់បី នៅក្នុងភូមិបែបនេះ បណ្តាលមកពី​មាន​ល្បែងស៊ីគ្រប់ប្រភេទ ដែលអាជ្ញាធរមិនបានយកចិត្តទុកដាក់ ក្នុងការបង្ក្រាប ហើយបណ្តែតបណ្តោយ ឲ្យលេង​ស្រេច​តែចិត្ត៕