យ៉ាងហោចមនុស្ស១១៦នាក់ បានស្លាប់ កាលពីថ្ងៃអង្គារ នៅប្រទេសឥណ្ឌូនេស៊ី ក្នុងព្រឹត្តិការណ៍ ធ្លាក់​យន្ដ​ហោះ​យោធាមួយ ដែលបានបោកខ្លួន នៅលើសង្កាត់ដែលមានមនុស្សរស់នៅមួយ នៃក្រុង ម៉ីដង់ (Medan) ស្ថិត​នៅលើកោះ ស៊ូម៉ាត្រា។ ពីក្នុងចំណោមជនរងគ្រោះទាំងនោះ មាន១១៣នាក់ ជាអ្នកជិះនៅក្នុងយន្ដហោះ និង​៣នាក់ទៀត នៅលើដី។

យន្ដហោះ «Hercules C-130» ដែលមានវ័យ៥១ឆ្នាំ បានហោះចេញពី មូលដ្ឋានយោធាមួយ នៅ​វេលា​ម៉ោង​១២ និង៨នាទី ថ្ងៃត្រង់ (ម៉ោងក្នុងស្រុក) ហើយបានធ្លាក់ ២នាទីក្រោយមក ពីលើសង្កាត​ដែលមាន​ចំងាយ​៥​គីឡូ​ម៉ែត្រ ពី​មូលដ្ឋាន​យោធា បង្កឲ្យមានផ្ទុះឆេះ ជាភ្លើងឡើង។ នេះបើតាមអ្នកនាំពាក្យកង​ទ័ព​ឥណ្ឌូនេស៊ី លោក ហ្វូអាដ បាស្យ៉ា (Fuad Basya)។

អគ្គមេបញ្ជាការកងទ័ព លោក អាហ្គូស ស៊ូព្រីយ៉ាតណា (Agus Supriatna) បានអះអាងដែរ​ថា មនុស្ស​ដែល​ស្ថិតនៅលើយន្ដហោះ មាន១២នាក់ ជាបុគ្គលិកបម្រើការ និង១០១ផ្សេងទៀត ជាអ្នកដំណើរ។ លោក​បាន​ថ្លែងថា មិនមាននរណាម្នាក់ នៅរស់រានមានជីវិតទេ។

បើតាមអ្នកនាំពាក្យ ឲ្យមូលដ្ឋានកងទ័ពអាកាសក្រុង ម៉ីដង់ វិញបានឲ្យដឹងទៀតថា ភាគច្រើននៃអ្នក​ដំណើរ សុទ្ធសឹងជាក្រុមគ្រួសារ ឬជាភរិយារបស់ទាហាន។ យ៉ាងហោចមានកុមារម្នាក់ នៅក្នុងចំណោមនោះ។

អាគារលំនៅដ្ឋាន ទើបនឹងសាងសង់ហើយថ្មីៗ និងរថយន្ដជាច្រើនគ្រឿង ដែលយន្ដហោះធ្លាក់ពីលើ បាន​ទទួល​រងការខូចខាតដ៏ធ្ងន់ធ្ងរ។ ក្រុមអ្នកជួយសង្គ្រោះ ក៏បានបញ្ជាក់ដែរថា មនុស្សនៅលើដី ចំនួន៣នាក់ បាន​ស្លាប់ ក្នុង​ព្រឹត្តិការណ៍នេះ។ ប៉ុន្តែតុល្យភាពអាចនឹងមានកម្រិតធ្ងន់ធ្ងរជាងនេះ ដោយសារការជួយ​សង្គ្រោះ បាន​កំពុង​ដំណើរការ​ទៅមុខ​នៅ​ឡើយ។

យន្ដហោះបានជួបនឹងបញ្ហា តាំងពីពេលងើបខ្លួន ហោះចេញពីដីភ្លាម។ លោកអគ្គមេបញ្ជាការ អាហ្គូស ស៊ូព្រីយ៉ាតណា បានថ្លែងថា៖ «អ្នកបើកបរ បានសុំហោះវិលត្រឡប់ ទៅកាន់មូលដ្ឋានវិញ ដែលធ្វើ​ឲ្យ​គេ​យល់​ថា ប្រាកដជាមានបញ្ហា អ្វីមួយហើយ»។ លោកបានផ្ដោតការសង្ស័យ ទៅលើបញ្ហា ដែលអាចកើតឡើង ទៅ​លើ​ម៉ាស៊ីនយន្ដហោះ។

អ្នករស់នៅក្បែរនោះមួយរូប បានថ្លែងឡើងថា៖ «ខ្ញុំបានឃើញយន្ដហោះ នៅក្នុងទិសដៅ ហោះ​ទៅ​​ព្រលាន​យន្ដហោះ។ ប៉ុន្តែយន្ដហោះ បានហោះដាំក្បាលចុះ។ បន្ទាប់មក ខ្ញុំឃើញផ្សែងបានហុយឡើង យ៉ាង​ខ្មួលខ្មាញ់។»

នេះ ជាលើកទីមួយយើង ដែលក្រុង ម៉ីដង់ ត្រូវបានរងគ្រោះ ដោយការធ្លាក់យន្ដហោះ។ នៅឆ្នាំ២០០៥ យន្ដហោះ​មួយគ្រឿង របស់ក្រុមហ៊ុនក្នុងស្រុក «Mandala Airlines» បានធ្លាក់នៅពីលើតំបន់ ដែលសម្បូរ​ដោយមនុស្សរស់នៅ បន្ទាប់ពីយន្ដហោះបានងើបខ្លួន ហោះចេញពីដីបានបន្តិច។ គ្រោះថ្នាក់នៅពេលនោះ បានធ្វើឲ្យមនុស្ស១៥០នាក់ លាចាកលោក៕

» វីដេអូ បង្ហាញពីទិដ្ឋភាពយន្ដហោះ ធ្លាក់នៅលើតំបន់មានមនុស្សរស់នៅ៖