សូមកុំភ្លេចថា ក្រុម«បីសាចក្រហម» រហស្សនាមរបស់ក្រុមបាល់ទាត់ ជំរើសជាតិនៃប្រទេសប៊ែលហ្សិក មាន​ចំណាត់​ថ្នាក់លេខ ២ នៅសហព័ន្ធបាល់ទាត់អន្តរជាតិ (FIFA)។ ហើយចំណាត់ថ្នាក់នេះ មិនមែនគ្រាន់តែឲ្យ​ល្អ​មើលទេ ព្រោះក្រុមនេះទើបនឹងលត់ក្រុមមាន់គក របស់ប្រទេសបារាំង ដែលជាម្ចាស់ផ្ទះរៀបចំ​ការប្រកួត​ដណ្ដើម​ពាន​រង្វាន់អ៊ឺរ៉ូ ២០១៦ ក្នុងពេលខាងមុខ ជាមួយនឹងពិន្ទុ៤-៣។ នៅចំពោះក្រុមបីសាចក្រហម ដែល​មាន​ការ​រៀបចំ​ល្អ និងពូកែខាងបាល់ខ្ពស់ៗនោះ ក្រុមមាន់គកបារាំង បានប្រតិកម្មយឺតពេល ហើយរក​បាន​បី​គ្រាប់ យ៉ាង​ប្រហោងពោះ បន្ទាប់ពីមានការផ្លាស់ប្ដូរកីឡាករ ទាំងសងខាងជាងច្រើននាក់នោះមក។

រងការវាយបំបាក់ កាលពីឆ្នាំ២០១២ នៅចំពោះក្រុមហូឡង់ និងក្រុមក្រូអាស៊ី ក្រុមជម្រើសជាតិ របស់ប៊ែលហ្សិក តែងរងនូវការរិះគន់ថា មិន«ខ្មេះ»អ្វីឡើយ នៅចំពោះក្រុមបាល់ទាត់ ជម្រើសជាតិធំៗ ក្នុងលោក។ ប៉ុន្តែ​បន្ទាប់​ពី​ការប្រកួត ដណ្ដើមពានរង្វាន់ពិភពលោក នៅប្រទេសប្រេស៊ីល ឆ្នាំ២០១៤នោះមក ក្រុមបីសាចក្រហម ប៊ែលហ្សិក បានធ្វើឲ្យអ្នករិះគន់ចំហរមាត់ និយាយលែងចេញ ជាមួយនឹងទេពកោសល្យ បន្ថែមពីលើការរៀបចំ​ក្រឡា​ទាត់ ដឹកនាំដោយគ្រូបង្វឹក លោក ម៉ាក វីលម៉ូត៍ (Marc Wilmots)។ កាលពីជំនួបពិភពលោក ឆ្នាំ២០១៤​នោះ ក្រុមប៊ែលហ្សិក បានឡើងទៅដល់វគ្គ១/៤ផ្ដាច់ព្រ័ត្រ មុននឹងត្រូវក្រុមបាល់ទាត់ របស់ប្រទេស​អាហ្សង់ទីន ជម្រុះចេញ ដោយពិន្ទុ ០-១។

ប៉ុន្តែនៅក្នុងជំនួប ជាមួយក្រុមបារាំង នៅយប់ថ្ងៃអាទិត្យ ទី៧ ខែមិថុនាម្សិលម៉ិញនេះ ចំណុចខ្សោយមួយ របស់​ក្រុមបីសាចក្រហម ប៊ែលហ្សិក នោះគឺធ្លាក់ចុះនៃកម្លាំង និងបង្កើតភាពរញ៉េរញ៉ៃខ្លួនឯង នៅចុងបញ្ចប់​នៃការ​ប្រកួត ដោយបានបើកឱកាស ឲ្យក្រុមមាន់គកបារាំង ទាត់បញ្ចូលទី បានពីរគ្រាន់ តែក្នុងរយៈពេល១នាទី​ប៉ុណ្ណោះ (នាទីទី៨៩ និងទី៩០)។ ត្រង់ចំណុចនេះ បានធ្វើឲ្យអ្នកគាំទ្រ ភ័យផតពោះមិនតិចទេ ព្រោះបើសិន​ជា​ទុក​ឱកាស ឲ្យទាត់លើសណ្នឹងបន្តិចទៀត ក្រុមបារាំងអាចរកពិន្ទុ មកស្មើជាមួយវិញបាន ជាពិសេសនៅពេល ដែលការប្រកួត បានប្រព្រឹត្តិទៅ នៅលើទឹកដីបារាំង ជាម្ចាស់ផ្ទះផងនោះ។

ជំនួបប្រកួត រវាងបារាំង និងប៊ែលហ្សិក កាលពីយប់ម៉ិញនេះ ក៏ជាមេរៀនមួយ សម្រាប់ឲ្យសហព័ន្ធបាល់ទាត់​អ៊ឺរ៉ុប ហៅកាត់ថា UEFA សម្លឹងមើលឡើងវិញ ពីប្រសិទ្ធភាព នៃការសម្រេចចិត្ត របស់អាជ្ញាកណ្ដាលដែរ ដោយ​សារតែគ្រាប់បាល់ដំបូង របស់កីឡាករលេងសក់ ម៉ារ៉ូអាន ហ្វេឡេនី (Marouane Fellaini) ដែលទាត់ចូលទី​របស់​ក្រុមបារាំង ជាគ្រាប់បាល់«ចងមុង»។ កំហុសពីរទៀត ដែលមានលក្ខណៈធំដែរនោះ គឺការសម្រេចចិត្ត ក្នុងការ​ពិន័យ (កាតលឿង ឬក្រហម) ទៅលើកីឡាករបារាំង ដែលបានធ្វើកំហុសយ៉ាងធ្ងន់ធ្ងរ ទៅលើ​កីឡាករគូប្រកួត ហើយទទួលបាន ត្រឹមតែការព្រមានផ្ទាល់មាត់ ចំពោះកំហុសនៅនាទីទី ២៨ និងទទួលបានកាតលឿង (ដែល​តាមទំហំកំហុស ត្រូវទទួលបានកាតក្រហម) ចំពោះកំហុសនៅទីនាទីទី៤០ ប៉ុណ្ណោះ៕