ប្រិយមិត្តអ្នកចូលចិត្ដកីឡាបាល់ទាត់ ប្រហែលជានៅមិនទាន់ភ្លេចទេ ពីតារាបាល់ទាត់ប្រេស៊ីល វ័យរាងជ្រេ រ៉ូណាល់ឌីញ៉ូ (Ronaldinho)។ បើទោះជា សម្រាប់ក្រុមបាល់ទាត់ធំៗ នៅអ៊ឺរ៉ុប កីឡាកររូបនេះ ត្រូវបានចាត់ទុក​ថា ហួសសម័យនោះទៅហើយក្ដី (ព្រោះមកទាត់ ក្នុងទ្វីបអ៊ឺរ៉ុប តាំងពីអំឡុងជាង១០ឆ្នាំមុន) តែកីឡាកររូបនេះ នៅ​តែ​មានថ្វីជើង គួរឲ្យកត់សម្គាល់នៅឡើយ ជាពិសេស ក្នុងការរកគ្រាប់បាល់ ឲ្យក្រុមរបស់ខ្លួនសព្វថ្ងៃឈ្មោះ Queretaro។

សេចក្ដីស្នេហាកីឡាបាល់ទាត់ ជាមួយនឹងថ្វីជើងដ៏ល្អ របស់កីឡាករ នៅតែធ្វើឲ្យកីឡាករ រ៉ូណាល់ឌីញ៉ូ រក​គ្រាប់​បាល់ ឲ្យក្រុមរបស់ខ្លួនជាដរាប... លើកលែងតែលើកនេះ!

នៅក្នុងការប្រកួត កាលពីសប្ដាហ៍មុន ទល់នឹងក្រុមបាល់ទាត់ Santos កីឡាករខ្សែរប្រយុទ្ធ រ៉ូណាស់ឌីញ៉ូ របស់​ក្រុម Queretaro បានលួចទាត់កញ្ឆក់បាល់ ពីអ្នកចាំទីរបស់ក្រុម Santos ខណៈពេលដែលអ្នកចាំទីរូបនេះ បាន​ទាត់បញ្ជូនបាល់វែង ចេញទៅកណ្ដាលទីលាន។ បន្ទាប់ពីកញ្ជក់បាល់បាហើយ កីឡាករវ័យជ្រេ តែនៅតែខិល រ៉ូណាល់ឌីញ៉ូ បានបណ្ដើរទៅទាត់បញ្ចូលទី ធ្វើមិនដឹង!

ផ្ទុយពីទេពកោសល្យ ក្នុងការកញ្ឆក់បាល់ របស់កីឡាករខាងលើ ទង្វើនេះមិនត្រូវបានអនុញ្ញាតទេ នៅក្នុង​បាល់​ទាត់  ហើយគ្រាប់បាល់បញ្ចូលទី របស់កីឡាករ ក៏មិនត្រូវបានអាជ្ញាកណ្ដាល ចាត់ទុកជាបានការនោះដែរ។ មិន​ត្រឹមតែប៉ុណ្ណឹង រ៉ូណាល់ឌីញ៉ូ ថែមទាំងទទួលបាន កាតលឿងមួយបន្ថែមទៀត ពីអាជ្ញាកណ្ដាល៕