យប់យន្ដសុបិន្ដអាក្រក់ កើតឡើងទៀត នៅកណ្ដាលរាជធានីភ្នំពេញ។ សុបិន្ដអាក្រក់លើកនេះ ពិតជាមិនធម្មតាឡើយ ព្រោះ​ជនត្រូវចោរប្លន់ម៉ូតូហើយ ថែមទាំងត្រូវនគរបាល ប្រចាំការនៅក្បែរស្ដីបន្ទោស ឲ្យថែមទៀត។

នេះ ជាករណីប្លន់មួយ កាលពីវេលាម៉ោង២ រំលងអាធ្រាត យប់ថ្ងៃទី២៧ ឈានចូលថ្ងៃទី២៨ ខែឧសភា ឆ្នាំ២០១៥ នៅ​ត្រង់​ចំណុចសួន សម្តេចតេជោ ជាប់នឹងរង្វង់មូលសម្តេចសង្ឃរាជ ជូន ណាត នៅក្នុងសង្កាត់ទន្លេបាសាក់ រាជធានីភ្នំពេញ។ ហេតុការណ៍នេះ ត្រូវបានសាក្សីនៅផ្ទាល់កន្លែង ប្រាប់ឲ្យដឹងថា គ្មានអ្នកណាជួយអន្តរាគមន៍នោះទេ ទោះជានៅជាប់នឹង ប៉ុស្តិ៍នគរបាលចតុមុខ ក៏ដោយយ។ ម្យ៉ាងទៀត សាក្សីរូបនោះបានបញ្ជាក់ថា នៅមុនពេលដែលជនរគ្រោះ និងក្រុមចោរ​បញ្ចប់ជម្លោះ ដោយម្ខាងបានតែសោរ និងម្ខាងបានម៉ូតូ ដោយសាជនរងគ្រោះ ជាម្ចាស់ម៉ូតូ មានរបួសដួលទៅលើដី។

ប្រភពដដែលនោះ បានឲ្យដឹងបន្តថា ជនរងគ្រោះ ឈ្មោះ ភក្តី អាយុ២២ឆ្នាំ រស់នៅស្រុកជំគិរី ខេត្តកំពត សព្វថ្ងៃធ្វើការ​រោងចក្រ នៅម្តុំកាណាឌីយ៉ា ដែលត្រូវបានក្រុមចោរប្លន់ យកម៉ូតូចំនួន១គ្រឿង ម៉ាកឌ្រីមពណ៍ខ្មៅ ស៊េរី២០១៣ មិនស្គាល់​ស្លាកលេខ យកទៅបាត់ ដោយសុវត្តិភាព បន្សល់ទុកតែសោរ នៅជាមួយម្ចាស់។ សាក្សីបញ្ជាក់បន្ថែមថា នៅពេលកើត​ហេតុម្ចាស់ម៉ូតូ បានប្រវ៉ាយប្រតប់គ្នា ជាមួយក្រុមចោរ ដែលមានគ្នា៤នាក់នោះដែរ តែជនរងគ្រោះគ្មានអ្វីតដៃ ក៏ត្រូវរបួស ភ្លាមៗនោះ ភាគីចោរម្នាក់ ក្នុងចំណោមគ្មា៤នាក់ បានបណ្តើម៉ូតូនោះ ចេញទៅបាត់។

ជនរងគ្រោះបានរៀបរាប់ ទាំងទឹកភ្នែកថា នៅពេលដែលចោរ បានយកម៉ូតូខ្លូន ទៅបាត់ភ្លាមៗ លោកបានទៅប្តឹង នៅប៉ុស្តិ៍​នគរបាលរដ្ឋបាល ចតុមុខ តែគ្មានអ្នកណាម្នាក់ ចេញជួយតាមចាប់ចោរនោះទេ ថែមទាំងមាននគរបាលម្នាក់ និយាយ​មក​កាន់លោក ខ្លាំងៗថា៖ «សមមុខហើយ ដែលត្រូវចោរលួចនោះ ព្រោះថាពូកែដើលេងយប់»។ ពេលឮនគរបាលមិន​ជួយ​ហើយ ស្តីបន្ទោសបែបនេះ ខ្លូនក៏បានចាកចេញពីប៉ុស្តិ៍នោះវិញ ទាំងសោកសៅ ដោយកាន់សោម៉ូតូនៅក្នុងដៃ ពីរនាក់​មិត្ត​ស្រីរបស់ខ្លួន។

បន្ទាប់ពីហេតុការណ៍នេះ បានចប់ទៅមួយសន្ទុះ ទើបមាននគរបាលចេញមុខ មកសួរនាំពីបញ្ហាកើតឡើង ដោយ​នគរបាល​រូប​នោះ អះអាងថា ខ្លួនទើបតែបានទទួលដំណឹង ពីស្ថានីយ៍វិទ្យុ ABC កម្ពុជា ឲ្យជួយអន្តរាគមន៍។

អ្នកដែលបានឃើញហេតុការណ៍នេះ ទាំងអស់ បានសម្ដែងក្ដីអាណិត បុរសរងគ្រោះ ដែលខំព្យាយាមតតាំងជាមួយចោរ រហូតដល់មានរបួសហើយ មិនបានសម្រេច សល់តែសោរម៉ូតូ ក៏ទៅប្តឹងប៉ូលិស ត្រូវប៉ូលិសស្តីឲ្យ ដល់ពេលចោរទៅបាត់ បានប៉ូលិសចេញមុខ មករកចាប់។ អ្នកទាំងនោះបាននិយាយគ្នាថា ករណីចោរប្លន់នេះ ដូចនៅក្នុងឈុតឆាកកំប្លែង ដែល​អ្នក​ផង​តែង​និយាយលេងដូច្នេះ៖ «ពេល​កើតហេតុមិនជួយ ពេលចោរទៅបាត់ ទើបចុះធ្វើការតាមចាប់»៕