ទោះជាអ្នកស្រុក ចាស់ឬក្មេង ដែលមិនស្គាល់អ្វីទៅ ដែលហៅថា គ្រឿងញៀនស្រវឹង ក៏នាំគ្នាស្រវឹង ពេញទាំងភូមិដែរ។ បើតាម​សារព័ត៌មាន Atlantico ដែលដកស្រង់បន្ត ដោយសារព័ត៌មានអង់គ្លេស Daily Mail បានឲ្យដឹងថា គឺកងកម្លាំង​នគរបាល​ឥណ្ឌូនេស៊ី ជាអ្នកនាំហេតុ ឲ្យពលរដ្ឋទាំងនោះស្រវឹង។

បន្ទាប់ពីបានរឹបអូសគ្រឿងញៀន ចំនួន៣តោនរួច អាជ្ញាធរបានសម្រេចចិត្ត បង្ហាញពីកិត្យានុភាពរបស់ខ្លួន ដោយយក​គ្រឿងញៀនទាំងនោះ មកដុតកម្ទេចចោល។ ប៉ុន្តែ នៅពេលដែលដុតគ្រឿងញៀន ឆេះឡើងខ្មួលខ្មាញ់នោះ ផ្សែងដែល​ហុយចេញពីគ្រឿងញៀន បានហោះអណ្ដែតត្រសែត ពេញវេហា និងជាពិសេស ហោះទៅតាមកម្លាំងខ្យល់ ដែល​សម្រុក​ទៅគ្របដណ្ដប់ លើភូមិមួយស្ថិតនៅក្បែរ ក្រុង តានហ្សឹរ៉េន (Tangerang) ដែលសម្បូរទៅដោយពលរដ្ឋរស់នៅ។

ផ្សែង​ដែលចេញពីការដុតគ្រឿងញៀន បានបង្កឲ្យមានការឈឺក្បាល និងភាពងោកងុយវង្វេងរង្វាន់។ រឿងដែល​កាន់​តែ​ហួសចិត្តនោះ គឺនគរបាលដែលអនុវត្ត ប្រតិបត្តិការដុតកម្ទេច គ្រឿងញៀនទាំងនោះ សុទ្ធតែមានពាក់របាំងមុខ ដើម្បី​ការពារ​ផ្សែង និងក្លិនដែលចេញ ពីការដុតគ្រឿងញៀន ខណៈពលរដ្ឋ សុទ្ធតែបានស្រូបយកទាំងអស់ ទាំងផ្សែង​ទាំងក្​លិន តាមញាណទាំងអស់ របស់ពួកគេ។

អ្នកសារព័ត៌មានអង់គ្លេសម្នាក់ ដែលមានវត្តមាន នៅក្នុងហេតុការណ៍នោះ បានថ្លែងប្រាប់សារព័ត៌មាន Daily Mail ថា​ខ្លួន​ចាំបាច់ ត្រូវអង្គុយចុះ ដើម្បីផឹកតែមួយពែង ជាជំនួយឲ្យស្វាង ពីការស្រវឹងគ្រឿងញៀននេះ។

យ៉ាងណាក៏ដោយ នគរបាលនៅតែអះអាង ពីជ័យជំនះរបស់ខ្លួន ដោយបានបំផ្លាញ គ្រាប់ថ្នាំស្រវឹង ២៥០០គ្រាប់ និង​ម្សៅ មេតាហ្វេតាមីន ចំនួនពីរគីឡូក្រាម ដែលមានតម្លៃជាទឹកប្រាក់ ប្រមាណជា១លានដុល្លារ៕