យន្ដហោះនេះ បានធ្វើការភ្ជាប់ការហោះហើរ នៅក្នុងស្រុករវាងពី រដ្ឋធានី តូរ៉ុងតូ ឆ្ពោះទៅកាន់ក្រុង ហាលីហ្វាក់ (ស្ថិត​នៅ​ផ្នែកខាងកើត នៃប្រទេសកាណាដា) ជាមួយនឹងអ្នកដំណើរ ១៣៧នាក់ ប៉ុន្តែបានចុះចតខុសផ្លូវ នៅពេលមកដល់​ព្រលាន​យន្ដហោះ អន្តរជាតិ ដែលជាទិសដៅរបស់ខ្លួន។ នេះ បើតាមការប្រកាសឲ្យដឹង របស់ក្រុមហ៊ុនអាកាសចរណ៍ អ៊ែរកាណាដា ខ្លួនឯង នៅទំព័រ ទ្វីសធើរ (Twitter) ផ្លូវការរបស់ខ្លួន។

ក្រុមហ៊ុនអាកាសចរណ៍ នៅមិនទាន់ឲ្យដឹង ពីមូលហេតុថាហេតុដូចម្ដេច បានយន្ដហោះអ៊ែរប៊ូសរបស់ខ្លួន បានចេញ​ពី​ផ្លូវសម្រាប់ចុះចត នោះឡើយ។ ប៉ុន្តែការធ្លាក់ព្រិលដ៏ជោគជាំ នៅក្រុង ហាលីហ្វិក នៅក្នុងយប់ថ្ងៃសៅរ៍នេះ ត្រូវបាន​ព្រមានឲ្យដឹងជាមុនហើយ។ ផ្នែកឧត្តុនិយមរបស់ប្រទេសកាណាដា បានប្រកាសពីស្ថានភាពដ៏អាក្រក់នេះ ដើម្បីប្រាប់​សាធារណៈជន ជាពិសេសក្រុមហ៊ុនអាកាសចរណ៍ ពីបញ្ហាដែលមើលផ្លូវមិនសូវឃើញ។

បើតាមអ្នកនាំពាក្យរបស់ព្រលានយន្ដហោះ ក្រុង ហាលីហ្វាក់ លោក ភីធើរ ស្ពួវេស (Peter Spurway) បានឲ្យដឹងថា មនុស្ស ២៥នាក់ ត្រូវបានបញ្ជូនទៅកាន់មន្ទីរពេទ្យ ប៉ុន្តែពួកគេមិនមានគ្រោះថ្នាក់ ដល់ជីវិតទេ។ មនុស្សទាំងអស់ នៅ​លើ​យន្ដហោះ រួមមានអ្នកដំណើរ ១៣២នាក់ និងបុគ្គលិកបម្រើការ ៥នាក់ ត្រូវបានអាជ្ញាធរ យកចិត្តទុកដាក់ភ្លាមៗ។

ដោយឡែក ព្រលានយន្ដហោះ ហាលីហ្វិក បានរងនូវការដាច់ចរន្ដ ក្នុងមួយរយៈពេល នៅពេលដែលមានគ្រោះថ្នាក់។ ប៉ុន្តែអ្នកនាំពាក្យខាងលើ មិនបានអះអាងថា ការដាច់ចរន្ដនេះ មានជាប់ទាក់ទង នឹងការចុះចតខុសផ្លូវ របស់យន្ដហោះ​នោះឡើយ ដោយហេតុថា ព្រលានយន្ដហោះនៅតែមានដំណើរការ ជាមួយនឹងម៉ាស៊ីនភ្លើងជំនួយ ហើយផ្លូវ​យន្ដហោះ​ចុះ​ចត ក៏មាន​ភ្លើង​បំភ្លឺ​រហូត​ដែរ។

ចំពោះដំណឹងក្រៅផ្លូវការមួយ ដែលលើកឡើងថា ស្លាបយន្ដហោះបានទាក់ជាមួយខ្សែរភ្លើង ឬបង្គោលភ្លើង នៅពេល​ចុះ​ចត​នោះ មិន​ត្រូវបានលោក ភីធើរ ស្ពួវេស ទទួលដឹងថា ជាការពិតឡើយ។ លោកគ្រាន់តែបាននិយាយថា ការិយាល័យ​សុវត្ថិភាព​នៃ​ការដឹកជញ្ជូន របស់ប្រទេសកាណាដា នឹងបើកការស៊ើបអង្កេតមួយ ដើម្បីឲ្យដឹងពីមូលហេតុពិតប្រាកដ នៃ​គ្រោះ​ថ្នាក់​នេះ៕