ក្នុងពីធីសម្ភាធ និងដាក់ឲ្យប្រើប្រាស់ នូវវិហារខ្មែរឥស្លាម ដែលធំជាងគេ នៅក្នំពេញ គឺ អាល់សារកាល អារ៉ាប់រួម អេមីរ៉ាត នៃទឹកដីបឹងកក់ ក្នុងខណ្ឌដូនពេញ រាជធានីភ្នំពេញ នាព្រឹកថ្ងៃទី២៧ ខែមីនា ឆ្នាំ២០១៥នេះ នាយករដ្ឋមន្រ្តី បី​ទសវត្សន៍របស់កម្ពុជា លោក ហ៊ុន សែន បានបង្ហាញនូវមោទនភាពថា នេះជាលើកទៅមួយហើយ ស្ថិតក្រោម​ការ​ដឹក​នាំ​របស់លោក ដែលបានអនុញ្ញាត ឲ្យស្រ្តីខ្មែរឥស្លាម អាចទៅសិក្សា និងរៀនសូត្រ ក្នុងសម្លៀកបំពាក់ តាម​បែប​សាសនា។

លោកបន្តថា ករណីនេះ សម្រាប់អ្នកដឹកនាំក្រោយ លោកមិនដឹងថា គេអនុញ្ញាតដូចលោកឬ យ៉ាងណានោះទេ តែ​លោក​បានអះអាងថា ខណៈកម្ពុជា ដែលមានលោក ជានាយករដ្ឋមន្រ្តីនេះ លោកនឹងបន្តអនុញ្ញា សិទ្ធិទាំង​នេះទៅ​មុខ​ត​ទៀត ខណៈ​ដែលប្រទេសមួយចំនួន របស់ពិភពលោក នៅមិនទាន់មានការអនុញ្ញាត នៅឡើយនោះ។

នាយករដ្ឋមន្ត្រីកម្ពុជា បានធ្វើការអះអាងថា ដើម្បីផ្តល់ឱកាស ដល់ស្រ្តីខ្មែរឥស្លាម អាចក្លាយទៅជាបញ្ញាវន្ត ដោយ​មិន​មានឧបសគ្គរារាំងនោះ  «រាជរដ្ឋាភិបាលកម្ពុជា សម្រេចឲ្យស្រ្តីឥស្លាម ប្រើប្រាស់នូវសម្លៀកបំពាក់ឥស្លាម សម្រាប់ការ​ចូលសិក្សា។ (…) សម្រាប់នៅកម្ពុជា ស្លៀកពាក់យ៉ាងណា ក៏បានដែរ។ (…) ខ្ញុំបានយកការសម្រេចមួយ ទាំងគ្រឹះស្ថាន ឧត្តមសិក្សារបស់រដ្ឋ ទាំងគ្រឹះស្ថាន ឧត្តមសិក្សាឯកជន ទទួលឲ្យសិស្សឥស្លាម ស្លៀកពាក់តាមរបៀបឥស្លាម ដើម្បីចូល​ទៅ​សិក្សា។ ចំណុចនេះ ក៏ជាចំណុចមួយ មិនធម្មតាដែរ។»

ក្នុងពិធីសម្ពោធវិហារឥស្លាមដ៏ធំ ក្នុងតំបន់បឹងកក់នេះ ក៏មានការចូលរួម ពីបណ្តាសាសនិកជន ឥស្លាម​ មកពី១៦​ប្រទេស ដែលមានចំនួនអ្នកចូលរួម រាប់ពាក់នាក់ មកពីគ្រប់ ខេត្ត-ក្រុង ក្នុងប្រទេសកម្បុជាដែរ។

លោកបានបញ្ជាក់ថា លោកមិនប្រកាន់និន្នាការ សាសនាឡើយ ដែលស្របតាមរដ្ឋធម្មនុញ្ញា។ ជាមួយគ្នានេះ លោក​បានបង្ហាញទៀតថា ក្នុងវិមានសន្តិភាព ដែលជាកន្លែងលោកធ្វើការ ក៏មានកន្លែងសម្រាប់ ការគោរពតាម​បែបសាសនា​នានាដែរ ដូចជាសម្រាប់ សាសនាឥស្លាម រួមមាន កន្លែងថ្វាយបង្គំសម្រាប់បុរស និងស្រ្តី ទុកសម្រាប់ប្រតិភូ ដែលកាន់​សាសនា​ឥស្លាមជាដើម។

ដើម្បីបង្ហាញ ពីការលើកទឹកចិត្ត ដល់ប្រជាពលរដ្ឋខ្មែរឥស្លាម ក្រៅពីការអនុញ្ញាត ឲ្យមានសិទ្ធិ ចូលសាលារៀនទាំងរដ្ឋ និងឯកជន ក្នុងឯកសណ្ឋានសាសនានោះ នាយករដ្ឋមន្រ្តីកម្ពុជា បានស្នើរដល់ គ្រប់សណ្ឋាគារទាំងអស់ ត្រូវរៀបចំឲ្យ​មានកន្លែង ថ្វាយបង្គំ នៃសាសនាឥស្លាម ដើម្បីស្រូបទាញភ្ញៀវ ឥស្លាម មកទស្សនាកម្ពុជា។ ក្រៅពីផ្នែកសណ្ដាគារ លោក​អនុញ្ញាត ឲ្យមានការផ្សាយធម៌ឥស្លាមតាមវិទ្យុ ដើម្បីឲ្យបងប្អូនខ្មែរឥស្លាម ទទួលបានភាពងាយស្រួល ក្នងការ​ស្តាប់​ធម៌ដែរ។ លោកបានថ្លែងទៀតថា៖ «ខ្ញុំសូមផ្តាំផ្ញើរ អ្នករកស៊ីខាងសណ្ឋាគារទាំងឡាយ បើចង់ឲ្យភ្ញៀវ ដែល​កាន់​សាសនា​ឥស្លាម ទៅកាន់អូតែល របស់អស់លោក អស់លោកគួរតែរៀបចំទុក សម្រាប់ថ្វាយបង្គំ របស់បងប្អូនឥស្លាម។»

លោកនាយករដ្ឋមន្រ្តី ហ៊ុន សែន បានបង្ហាញ នូវមោទនភាពផ្ទាល់ខ្លួន របស់លោក យ៉ាងដូច្នេះទៀតថា៖ «យើងឃើញ​ពិភពលោកបច្ចុប្បន្ន ប្រទេសមួយចំនួន មានការបែកបាក់ជាតិសាសនា។ គ្រាន់តែនិកាយមិនដូចគ្នា ក៏មានបញ្ហារួច​ស្រេច ទៅ​ហើយ។ ប៉ុន្តែនៅកម្ពុជា ខ្ញុំអាចនិយាយ ដោយមោទនភាពថា យើងបានរួមរស់នៅជាមួយគ្នា សុខដុមនីយកម្ម លើ​បញ្ហា​ជាតិ​សាសន៍ និង​សាសនា។»

សំដីប្រជាភិថុត

សម្រាប់អ្នកតាមដាន បញ្ហាសង្គមវិញ បានមើលឃើញថា ការថ្លែងរបស់លោក ហ៊ុន សែន ជាការធ្វើប្រជាភិថុត។ លោក ព្រហ្ម គិត អតីតមន្ត្រីច្បាប់៤ជំនាន់ ដែលសព្វថ្ងៃចូលនិវត្តន៍ នៅក្នុងប្រទេសបារាំង បានថ្លែងឲ្យទស្សនាវដ្ដី​មនោរម្យ.អាំងហ្វូ ដឹងថា ជនជាតិចាម ឬខ្មែរឥស្លាមនេះ គឺជាខ្មែរតែមួយ គ្រាន់តែពួកគាត់ កាត់សាសនាផ្សេងប៉ុណ្ណោះ។ ម្យ៉ាងទៀត ជនជាតិចាម ឬខ្មែរឥស្លាមទាំងនេះ មិនដែលនឹកឃើញ ចង់ធ្វើឥស្លាមនីយកម្ម (បង្កើតឲ្យមានលិទ្ធិ ឥស្លាម​និយម) នៅ​ក្នុងប្រទេសកម្ពុជា ដូចនៅក្នុងបណ្ដាប្រទេសមួយចំនួន ដែលកំពុងមានបញ្ហា សព្វថ្ងៃនេះឡើយ។

អតីតមន្ត្រីវ័យចំណាស់ បានឲ្យដឹងទៀតថា ខ្មែរ ពីណាពីណីមក មិនដែលនឹកឃើញ រើសអើង​ជាមួយជនជាតិចាម ឬខ្មែរ​ឥស្លាមនោះទេ។ ហើយជនជាតិចាម ឬខ្មែរឥស្លាមទាំងនោះ ក៏តែងចាត់ទុកខ្មែរជាម្ចាស់ប្រទេស ទាំងក្នុងប្រវត្តិសាស្ត្រ ទាំង​ក្នុង​ពេលបច្ចុប្បន្ន។ គ្នាមិនដែលនឹកឃើញ ចង់បៀតបៀនជនជាតិខ្មែរ ពីប្រពៃណី ទំនៀម​ទំលាប់ ឬពីសាសនា ដែល​​ខ្មែរម្ចាស់ប្រទេស មាននោះទេ។ ផ្ទុយទៅវិញ ជនដែលប្រកាន់សាសនាឥស្លាម នៅក្នុង​ប្រទេស​ដទៃ មួយ​ចំនួន តែង​ចង់​បង្កើត របៀបរបបបែបឥស្លាម ដាក់ក្នុងប្រទេសទាំងនោះ (ខុសពីប្រទេសកម្ពុជា) ដែលតម្រូវឲ្យ​ម្ចាស់​ប្រទេស ត្រូវ​បង្កើត​ច្បាប់ ដាក់កំហិត កុំឲ្យ«ឥស្លាមនីយកម្ម» ប៉ះពាល់ដល់វប្បធម៌ ច្បាប់ទម្លាប់ នៃស្រុករបស់គេ ឬក៏អាចបែក​ធ្លាយ ទៅ​ជា​​«ឥស្លាម​ជ្រុល​និយម»។

លោក ព្រហ្ម គិត បានចោទជាសំណួរថា៖ «បើចាមទាំងនោះ បង្ខំឲ្យលោក ហ៊ុន សែន ទទួលទានសាច់ ហាឡាល់ (សាច់​សត្វ ដែលត្រូវបានកាប់ តាមរបៀបសាសនាឥស្លាម) ដូចនៅក្នុងប្រទេសមួយចំនួន តែលោក ហ៊ុន សែន ទទួល​បានឬទេ? ពេលនោះ លោក ហ៊ុន សែន បែបញញឹមធ្វើប្រជាភិថុត លែងសមហើយ។ នេះ ខ្ញុំមិនទាន់និយាយ ដល់​រឿង​ដែល​ចាមចង់ទាមទារ ឲ្យលោក ហ៊ុន សែន កាត់"ចុង"នោះផង។»៕