ជាហេតុការណ៍ដ៏រន្ធត់ ដោយសារតែតារាចម្រៀង អាយុ៥៦ឆ្នាំរូបនេះ មិនដែលមានកំហុស ដួលធ្លាក់ពីលើឆាក នៅ​ក្នុង​ការ​សម្ដែងលើកមុនៗមកនោះទេ។ នាង ម៉ាដូណា ត្រូវបានគេអញ្ជើញឲ្យមកសម្ដែង ដើម្បីបិទបញ្ចប់កម្មវិធី Brit Awards ឆ្នាំ២០១៥ ដែលជាកម្មវិធីប្រចាំឆ្នាំដ៏ធំមួយ សម្រាប់ពិនិត្យមើលចំណាត់ថ្នាក់ នៃចម្រៀងល្បីៗដែលចេញផ្សាយ នៅក្នុង​រយៈពេលមួយឆ្នាំកន្លងមក។

ស្ដេចចម្រៀងស្រី នាង ម៉ាដូណា បានដួល នៅក្នុងចំណោមអ្នករាំរបស់នាង ខណៈពេលដែលនាង បានឡើងជណ្ដើរ​ទៅ​លើឆាកចម្រៀង ដើម្បីច្រៀងចម្រៀងថ្មី មានចំណងជើង ជាភាសាអង់គ្លេស Living For Love។ តែបញ្ហា មិនមែន​កើតពី​នាងទេ តែមកពីស្បែពណ៌ខ្មៅ ដែលនាងគ្របខ្លួន បានអូសទាញនាងទៅ។ ការដួលនេះ អាចជាបញ្ហា នៃការធ្វើមិន​ស្រប​គ្នា រវាងអ្នកចម្រៀង ដែលស្រាយស្បៃមិនទាន់ និងអ្នកទាញស្បៃចេញ។

ប៉ុន្តែមិនមានអ្វី អាចមកឃាត់តារាចម្រៀង អន្តរជាតិម្នាក់នេះ បានឡើយ។ នាង ម៉ាដូណា បានងើបមកវិញ ភ្លាមៗ ហើយ​បន្តការសម្ដែង (ចាក់ភ្លេងសម្ដែង មិនមែនលេងផ្ទាល់ទេ) របស់នាង រហូតដល់ចប់ចុងចប់ដើម។

វីដេអូ នៃការដួលធ្លាក់របស់នាង ត្រូវបានយកមកបង្ហោះ ភ្លាមតាមបណ្ដាញសង្គម ហើយត្រូវបានមនុស្សចែកផ្សាយតៗគ្នា យ៉ាងព្រោងព្រាត។ ក្នុងនោះ គ្រប់អ្នកឈឺឆ្អាលទាំងអស់ សុទ្ធតែបានសម្ដែងនូវសមានចិត្ត ព្រួយបារម្ភ ចំពោះតារា​ចម្រៀង។ ប៉ុន្តែនាង ម៉ាដូណា បានសរសេរនៅក្នុងទំព័រ អាំងស្ដាហ្គ្រាម (Instagram) និងទំព័រ ទ្វីសធើរ (Twitter) របស់​នាងថា៖ «មិនមានបញ្ហាអ្វីទេ។ ស្បៃគ្របខ្លួនខ្ញុំ ចង់តឹងពេក (ធ្វើឲ្យតារាចម្រៀង ស្រាយមិនទាន់)។ ប៉ុន្តែគ្មានអ្វី អាចមក​បញ្ឈប់​ខ្ញុំ​បានឡើយ ហើយសេចក្ដីស្រឡាញ់ (អាជីព) បានធ្វើឲ្យខ្ញុំងើបឡើង។ អរគុណ សម្រាប់សារឈឺឆ្អាលទាំងឡាយ របស់​អ្នក​រាល់​គ្នា។ ខ្ញុំអត់មានអីទេ។»៕