សង្គមស៊ីវិលនិងពលរដ្ឋនៅព្រះវិហារ ស្នើឲ្យតុលាការលែងសកម្មជនពីរនាក់ និងទារិកាម្នាក់
- ដោយ: ក. វិច្ចនី អត្ថបទ និងយកការណ៍៖ ក. វិច្ចនី ([email protected]) - ភ្នំពេញ ថ្ងៃទី ១៩ មករា ២០១៤
- កែប្រែចុងក្រោយ: January 20, 2015
- ប្រធានបទ: ដីធ្លី
- អត្ថបទ: មានបញ្ហា?
- មតិ-យោបល់
-
បណ្ដាញអង្គការសង្គមស៊ីវិលនៅខេត្ដព្រះវិហារ រួមមាន អង្គការពន្លកខ្មែរ សមាគមការពារសិទ្ធិមនុស្សអាដហុក និងអង្គការអូភីស៊ីស៊ី បានចេញសេចក្ដីថ្លែងការណ៍មួយ នៅថ្ងៃទី២០ ខែមករានេះ ទាមទារឲ្យតុលាការ និងស្ថាប័នពាក់ព័ន្ធដោះលែងសកម្មជនដីធ្លីពីរនាក់ និងទារិកាម្នាក់ឲ្យមានសេរីភាពវិញ ដោយពួកគេយល់ថា ការឃុំខ្លួននេះមិនអនុវត្ដតាមនីតិវិធី និងជាការរំលោភសិទ្ធិមនុស្សធ្ងន់ធ្ងរ។ សេចក្ដីថ្លែងការណ៍ទាមទារនេះ បានកើតឡើងមួយថ្ងៃ បន្ទាប់ពីរលកតវ៉ារបស់ពលរដ្ឋ មកពីសហគមន៍ពោធិទាប នៃខេត្តព្រះវិហារ បានផ្ទុះឡើងកាលពីម្សិលម៉ិញ ទាមទារឲ្យតុលាការសាលាដំបូងរបស់ខេត្តនេះ ធ្វើការដោះលែងលោក សន វុទ្ធី និងអ្នកស្រី លឹម ឃីម ដែលត្រូវជាប្រពន្ធរបស់លោក សន វុទ្ធី រួមទាំងទារិកាដែលជាកូនរបស់អ្នកទាំងពីរ អាយុ៨ខែម្នាក់ផង។
សកម្មជនដីធ្លីទាំងពីរនាក់ ដែលត្រូវបានក្រុមប្រជាសហគមន៍ និងបណ្ដាអង្កការសង្គមស៊ីវិល ធ្វើការតវ៉ាឲ្យមានការដោះលែងជាបន្ទាន់នេះ ត្រូវបានរដ្ឋបាលព្រៃឈើចាប់ខ្លួន ឲ្យអជ្ញាធរធ្វើការដោះស្រាយនៅថ្ងៃទី ១៣ ខែមករា ក្រោយបន្ទាប់ពីអ្នកទាំងពីរ បានទៅចូលរួមជួយតវ៉ាពីបញ្ហាដីធ្លីដែលមានជំលោះ របស់ក្រុមសហគមន៍ពោធិ៍ទាប កាលពីថ្ងៃទី ១២ ខែមករា ឆ្នាំ ២០១៥ កន្លងមក។
លោក ឡោ ចាន់ អ្នកសម្របសម្រួលសមាគមការពារសិទ្ធិមនុស្សអាដហុក ប្រចាំការនៅខេត្តព្រះវិហារ បានថ្លែងប្រាប់ទស្សនាវដ្ដីមនោរម្យ.អាំងហ្វូឲ្យដឹងថា ប្ដីប្រពន្ធទាំងពីរតែងតែធ្វើការតវ៉ាយ៉ាងសកម្មជាងគេ នៅក្នុងស្រុកនោះ និងបានបកអាក្រតរឿងអំពើពុករលួយជាច្រើន របស់មន្ត្រីសុរិយោដីនៅទីនោះ រួមទាំងអជ្ញាធរផ្សេងៗទៀតផងដែរ។ ហើយទំនងជាអាជ្ញាធរមានការគុំគួនទុកមុន ទើបមានការចាប់ខ្លួនលោក សន វុទ្ធី និងភរិយាដែលទើបតែសម្រាលកូនខ្ចីដូច្នេះ ដែលសូម្បីតែទារកតូច ក៍ត្រូវពួកគេចាប់យកទៅដាក់ឃុំឃាំងជាមួយម្តាយសសៃខ្ចីនោះដែរ។
សេចក្ដីថ្លែងការណ៍រួមចុះថ្ងៃអង្គារទី២០ ខែមករា របស់ក្រុមអង្គការសង្គមស៊ីវិល បានថ្កោលទោសចំពោះការឃុំខ្លួនពលរដ្ឋមួយគ្រួសារនេះ ដោយចោទថា តុលាការអនុវត្ដបែបនេះ ដោយសារមានការឃុបឃិតជាមួយមន្ដ្រីរដ្ឋបាល ព្រៃឈើ និងអាជ្ញាធរមួយចំនួនទៀត ដែលបានប្រព្រឹតអំពើពុករលួយ និងទាមទារឲ្យដោះលែងពួកគេឲ្យមានសេរីភាពឡើងវិញ ដោយគ្មានលក្ខខណ្ឌ ។
តបនឹងការចោទប្រកាន់ខាងលើ ព្រះរាជអាជ្ញាអមសាលាដំបូង លោក លី លន់ បានថ្លែងប្រាប់វិទ្យុសម្លេងប្រជាធិបតេយ្យថា ការឃុំខ្លួននេះ ដោយមានការចោទប្រកាន់ពីបទរានដីរដ្ឋខុសច្បាប់ ។ លោកឲ្យអង្គការសង្គមស៊ីវិល បើចង់ឲ្យជនជាប់ចោទនៅក្រៅឃុំ ត្រូវធ្វើតាមនីតិវិធី ប៉ុន្ដែខាងតុលការ មិនមានការឃុបឃិតជាមួយមន្ដ្រីរដ្ឋបាលព្រៃឈើ និងអាជ្ញាធរពាក់ព័ន្ធទេ។ លោក លី លន់ បាននិយាយថា៖ «មិនមែនទេ ខាងអាជ្ញាធរ PJ គាត់ជាមន្ត្រីជំនាញខាងផ្នែកព្រៃឈើ អ៊ីចឹងគាត់ដឹងថាព្រៃណាជាព្រៃរបស់រដ្ឋ ព្រៃណាជាព្រៃរបស់ក្រុមហ៊ុន ដីសម្បទានរបស់ក្រុមហ៊ុន ។ មុននឹងចាប់ អាជ្ញាធរស្រុកឃុំ គេឆ្លើយបំភ្លឺសព្វគ្រប់អស់ហើយ បានគេហ៊ានចាប់ មិនមែនចេះតែចាប់ៗម៉េចកើត គាត់(សង្គមស៊ីវិល)ចេះតែស្រែកធ្វើឲ្យខូចសណ្តាប់ធ្នាប់ពេញខេត្ត។»
ចំណែកលោក ឡោ ចាន់ បានបញ្ជាក់ទៀតថា សមាគមអាដហុក បានទៅសួរសុខទុក្ខសកម្មជនទាំងពីរដែរ ហើយបច្ចុប្បន្នអ្នកស្រី លឹម ឃីម កំពុងមានអាការៈទាស់សសៃ ដោយគាត់គ្មានអាហារគ្រប់គ្រាន់សំរាប់បរិភោគនោះទេ។ ចំណែកទារកតូចនោះវិញ ក៍កំពុងប្រឈម និងការគ្មានទឹកដោះបៅដែរ។ មន្ត្រីឃ្លាំមើលសិទ្ធិមនុស្សដដែល បានបញ្ជាក់ទៀតថា សមាគមកំពុងតែរៀបចំយុទ្ធសាស្ត្រដើម្បីជួយដោះស្រាយបញ្ហានេះ ដោយបញ្ជូនមេធាវី ទៅចរចារស្នើរសុំពួកគាត់ឲ្យនៅក្រៅឃុំជាបណ្តោះអាសន្ន ដើម្បីធ្វើការត្រូតពិនិត្យករណីនេះតាមប្រព័ន្ធតុលាការ និងបញ្ជូនអ្នកសើបអង្គេត ទៅអង្គេតពាក់ព័ន្ធនឹងអំពើពុករលួយ ដែលថាអាជ្ញាធរបានយកលុយ ៨០០ដុល្លា ពីប្រជាពលរដ្ឋដើម្បីធ្វើប្លង់ដីកម្មសិទ្ធឲ្យពួកគាត់ នាពេលកន្លងមក៕