ក្រុមប៉ារីស កំពុង​រៀប​គម្រោង​«២៥០លានអ៊ឺរ៉ូ» ដើម្បី​ទិញ ម៉េស៊ី?

ដំណឹងដែលធ្លាក់មកនៅចុងសប្ដាហ៍នេះ បានធ្វើឲ្យរង្គើដល់ពិភពបាល់ទាត់ពិភពលោក។ នាយក​ក្រុម​បាល់ទាត់ នៃ​រដ្ឋធានី​ប៉ារីស លោក ណាសេ អាល់ឃេឡៃហ្វី (Nasser Al-Khelaifi) ទំនងជានឹងធ្វើគ្រប់បែបយ៉ាង ដើម្បីនាំយក​កីឡាករ​ម្ចាស់​បាល់​មាស លីយ៉ូនែល ម៉េស៊ី (Lionel Messi) របស់ក្រុមបាសឺឡូន ឲ្យមកទាត់ឲ្យក្រុមខ្លួន ចាប់ពីឆ្នាំ២០១៦ខាងមុខ។
Loading...
  • ដោយ: ដារី អត្ថបទ៖ ដាវី ([email protected]) - ប៉ារីស​ ថ្ងៃទី០៤​ មករា ២០១៥
  • កែប្រែចុងក្រោយ: January 05, 2015
  • ប្រធានបទ: បាល់ទាត់
  • អត្ថបទ: មានបញ្ហា?
  • មតិ-យោបល់

តាម​ពិត​ទៅ ដំណឹង​«ទិញ»​កីឡាករ ម្ចាស់​បាល់​មាស​ដ៏​ល្បី​ឈ្មោះ​រូប​នេះ មក​ទាត់​ឲ្យ​ក្រុម​ប៉ារីស មិន​មែន​ទើប​តែ​កើត​មាន​ទេ។ ប៉ុន្តែ​នៅ​ចុង​សប្ដាហ៍កន្លង​មក​នេះ សារព័ត៌មាន​កីឡា Mundo Deportivo របស់​ប្រទេស​អេស្ប៉ាញ បាន​យក​ព័ត៌មាន​នេះ​មក​ចុះ​ផ្សាយ​ក្នុង​ទំព័រ​ទី​មួយ​របស់​ខ្លួន ដោយ​លើក​ភស្ដុតាង​ជា​ច្រើន​មក​បញ្ជាក់ ជាពិសេស​បាន​សរសេរ​ថា ក្រុមប៉ារីស (PSG) ត្រៀម​នឹង​សង់​«ស្ពាន​មាស​»ដ៏​ធំ​មួយ សម្រា​ប់ឲ្យកីឡាក​រ លីយ៉ូនែល ម៉េស៊ី ឆ្លង​មក​រក​ខ្លួន។

សារព័ត៌មាន​បានបញ្ជាក់​ថា ដំបូង ក្រុម​ប៉ារីសធ្លាប់​​បាន​ព្យាយាមយក ម៉េស៊ី ឲ្យ​មកទាត់​ឲ្យ​ខ្លួន តាំង​ពី​រដូវ​ក្ដៅ​កន្លង​ទៅ​ដែរ ប៉ុន្តែ​ត្រូវ​បាន​ក្រុម​កីឡាករ​សំដែង​ការ​មិន​ពេញ​ចិត្ត និង​ជា​ពិសេស​ត្រូវ​បាន​ឪពុក​របស់​ម៉េស៊ី​បដិសេធ។ ប៉ុន្តែ​ក្រុម​ប៉ារីស មិន​បាន​អស់​សង្ឃឹម​ទេ តែ​នៅ​​ព្យាយាម​សារ​ជា​ថ្មី​ទៀត ទាញ​យក​កីឡាករ​នេះ​មក​ទាត់​ឲ្យ​ខ្លួន​ នៅ​​អំឡុង​ឆ្នាំ​២០១៦​ខាង​មុខ បន្ទាប់​ពី​កិច្ច​សន្យា ដែល​ក្រុម​នេះ​ធ្វើ​ជា​មួយ​កីឡាករ​ខ្សែ​ប្រយុទ្ធ​សព្វ​ថ្ងៃ ស្លាតាន់ អ៊ីប្រាហ៊ីម៉ូវិច (Zlatan Ibrahimovic) នឹង​ត្រូវ​ចប់​សព្វ​គ្រប់។

កាសែតដដែលបានសរសេរទៀតថា នាយកក្រុមប៉ារីស លោក ណាសេ អាល់ឃេឡៃហ្វី មិនដែល​លាក់លៀម​ពីគំនិតរបស់លោក ក្នុងការជំនួសកីឡាករ ស្លាតាន់ ដោយកីឡាករ ម៉េស៊ី នោះឡើយ។ ហើយដើម្បី​សម្រេច​បំណងនេះ នាយកក្រុមប៉ារីសដែលជាមហាសេដ្ឋីពីប្រទេសកតាផងនោះ ត្រៀមនឹងចំណាយប្រាក់មិនតិចជាង ២៥០លានអ៊ឺរ៉ូ ដើម្បីទាក់កីឡាករ ម៉េស៊ី ឲ្យមកចូលក្នុងក្រុមរបស់ខ្លួន។ ហើយលោក ណាសេ ក៏ធ្លាប់បញ្ជាក់​ច្បាស់ៗដែរថា ក្រុមប៉ារីសត្រូវតែជាក្រុមទីមួយ ដែលចាប់អារម្មណ៍ពីការចាកចេញណាមួយ របស់កីឡាករ ម៉េស៊ី ពីក្រុមបាសឺឡូន។ ប៉ុន្តែធ្វើយ៉ាងណា ដើម្បីទាក់ទាញឲ្យកីឡាករចេញពីក្រុមបាសឺឡូននោះ វាជា​រឿង​មួយដោយឡែក ព្រោះកីឡាកររូបនេះ បានធំពេញរូបរាងមានអាជីពល្បីឈ្មោះ ក៏ដោយសារក្រុម​បាល់​ទាត់​មួយនេះដែរ។

ការទាក់ទាញនេះ មិនមែនថា ក្រុមប៉ារីសមិនមានមធ្យោបាយនោះទេ។ ព្រោះកីឡាករខ្សែបម្រើ អេហ្សេគីអេល ឡាវ៉េហ្សី (Ezequiel Lavezzi) ដែលកំពុងទាត់ឲ្យក្រុមប៉ារីស មិនត្រឹមតែជាជនរួមជាតិ ជាមួយកីឡាករ ម៉េស៊ី ប៉ុណ្ណោះទេ តែថែមទាំងជាមិត្តក្លើម្រាក់ ដ៏ចាស់ខែ ជាមួយនឹងកីឡាករខ្សែប្រយុទ្ធ របស់ក្រុមបាសឺឡូនរូបនេះ​ផង។ ហើយក្រុមប៉ារីស ចង់ប្រើប្រាស់មិត្តភាពនេះ ដើម្បីជានុយភ្ជាប់ចំណងនិស្ស័យឲ្យ ម៉េស៊ី ព្រលែងក្រុម​ចាស់ចោល ដើម្បីស្រវ៉ាអោបខ្លួន។

ហើយចំពោះ លីយ៉ូនែល ម៉េស៊ី កីឡាករល្បីឈ្មោះវិញ ក៏ដូចជាមានបញ្ហាខ្លះៗ កើតមាននៅខាងក្នុងសមាជិក​របស់ក្រុមបាសឺឡូនដែរ។ នោះគឺ ម៉េស៊ី មិនមានភាពរាក់ទាក់ជិតដិត ជាមួយនឹងកីឡាករចំណូលថ្មី ដែលក្រុម​បាសឺឡូនទើបនឹងទិញចូលមកនោះប៉ុន្មានទេ។ នៅពេលដែលក្រុមបានសាកសួរពិគ្រោះយោបល់ជាមួយ ម៉េស៊ី ចំពោះកីឡាករចំណូលថ្មីនោះ កីឡាករដ៏ល្បីឈ្មោះរូបនេះ មិនសូវជាចង់ឲ្យមានការទិញចូលនូវ​កីឡាករថ្មី​ឡើយ។ បញ្ហានេះបង្កឲ្យមានការក្ដៅក្រហាយ នៅក្នុងក្រុមបាសឺឡូន។

រឿងមួយទៀត ដែលជំរុញឲ្យ ម៉េស៊ី អាចព្រលែងក្រុមចាស់មករកក្រុមថ្មីនោះ ជាវិបត្តិផ្ទាល់ខ្លួនទាក់ទងនឹង​ការ​បង់ពន្ធ ដែលបើតាមព័ត៌មានបានឲ្យដឹងថា ម៉េស៊ី ត្រូវលក់ផ្ទះសម្បែង យ៉ាងហោចណាស់ក៏មួយខ្នងដែរ ដើម្បី​សងថ្លៃពន្ធដារទៅឲ្យរដ្ឋអេស្ប៉ាញ។

ប៉ុន្តែយ៉ាងណាក៏ដោយ នាយកក្រុមប៉ារីសមិនចង់បង្ហាញថាខ្លួនសម្លឹង ម៉េស៊ី ទាំងស្រក់ទឹកមាត់នោះទេ ព្រោះ​មិនចង់ឲ្យនាយកក្រុមបាសឺឡូន តម្លើងឬកលក់តម្លើងថ្លៃ កីឡាកររូបនេះ បើទោះជានាយក្រុមបាសឺឡូន ជា​មិត្តរបស់ខ្លួនក៏ដោយ។ ប៉ុន្តែក្រុមប៉ារីសទាំងមូល បានសម្រេចចិត្តរួចហើយ ថានឹងយក ម៉េស៊ី មកជំនួស ស្លាតាន់ នាពេលខាងមុខ។ បើការលើកឡើង របស់សារព័ត៌មានអេស្ប៉ាញនេះ ពិតជាមានការពិតមែននោះ ប្រាកដណាស់​នឹងធ្វើឲ្យ​មានការជជែកផ្សេងៗទៀត ច្បាស់ជានឹងកើតឡើងយ៉ាងច្រើន ក្នុងពេលបន្តទៅមុខ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...