កម្មកររោងចក្រជាច្រើន បាន​ត្អូញ​ត្អែរ​ថា ប្រាក់​ឈ្នួល ១២៣ដុល្លា មិន​អាច​ផ្គត់​ផ្គង់​ជីវភាព​ពួក​គេ​ផ្ទាល់ និង​គ្រួសារ ដែល​មាន​ការ​ចាយ​វាយ​ប្រចាំ​ថ្ងៃ​ ដ៏​ថ្លៃ​នោះ​បាន​ឡើយ ព្រោះ​ថា​បច្ចុប្បន្ន​នេះ ទំនិញ​នៅ​តាម​ទីផ្សារ​បាន​ឡើង​ថ្លៃ មុន​ប្រាក់​ខែ​របស់​កម្មករ​រោង​ចក្រ​ទៅ​ទៀត។ ជា​ពិសេស មិន​ថា​តែ​ទំនិញ​ទេ ដែល​ឡើង​ថ្លៃ សូម្បី​តែ​ថ្លៃ​បន្ទប់​ជួល ក៍​ឡើង​ថ្លៃ​ជាង​មុន​ដែរ។ ពួក​គេ​ទាំង​នោះ បាន​និយាយ​ថា ប្រាក់​ឈ្នួល​ប៉ុណ្ណឹង​មិន​គ្រប់​គ្រាន់​នោះ​ទេ ថែម​ទាំង​សុំ​ឲ្យ​មាន​ការ​តំឡើង​ប្រាក់​ឈ្នួល​ខ្ពស់​ជាង​នេះ និង​ចង់​ឲ្យ​នយោជក​បន្ថែម​អត្ថ​ប្រយោជន៍​ផ្សេងៗ​ទៀត ដល់​ពួក​គេ​ទៅ​តាម​តម្រូវការ​ជាក់​ស្តែង​ប្រចាំ​ថ្ងៃ។

កញ្ញា ក្រួច សោភ័ណ្ឌ ជាកម្មកររោងចក្រម្នាក់នៅរាជធានីភ្នំពេញ បានថ្លែងឡើងថា សំរាប់កញ្ញាផ្ទាល់ ប្រាក់​ឈ្នួល ១២៣ ដុល្លាគឺមិនគ្រប់គ្រាន់ទេ។ សព្វថ្ងៃនេះ ប្រាក់ឈ្នួលគោលរបស់កញ្ញាបាន ១០៥ ដុល្លា និងមាន​បូកប្រាក់ផ្សេងៗទៀត ហើយចែកជាមធ្យមសម្រាប់មួយថ្ងៃវិញ កញ្ញា សោភ័ណ្ឌ ទទួលបានប្រាក់តែ ៤ដុល្លា ប៉ុណ្ណោះ។ ប៉ុន្តែការចំណាយក្នុងមួយថ្ងៃ អស់ ១ម៉ឺនរៀលទៅហើយ។

កញ្ញាបានបញ្ជាក់ទៀតថា ប្រាក់ឈ្នួលប៉ុណ្ណឹង កញ្ញាមិនដែលបានផ្ញើរទៅអ្នកផ្ទះទេ ព្រោះកញ្ញាចាយតែម្នាក់ឯង មិនទាំងចង់គ្រាន់ផង។ តែប្រសិនបើរោងចក្រតម្លើងប្រាក់ឈ្នួល ឲ្យត្រឹម ១៦០ដុល្លានោះ ប្រហែលអាច​ជួយ​ដោះស្រាយជីវភាពប្រចាំថ្ងៃ របស់ខ្លួនផង និងគ្រួសារផងបាន។ ក្រៅពីសុំឲ្យតម្លើងប្រាក់ឈ្នួល ដូចដែលបាន​បញ្ជាក់ខាងលើ សោភ័ណ្ឌ ចង់ឲ្យរោងចក្រផ្តល់ជាអាហារថ្ងៃត្រង់ សំរាប់កម្មករផង ព្រោះថាការទិញម្ហូបអាហារ នៅតាមរោងចក្រមិនសូវមានអនាម័យនោះទេ ហើយវាអាចប៉ះពាល់ដល់សុខភាព និងការងារផលិតកម្ម​របស់​រោងចក្រ។

អ្នកខ្លះគិតថា ១២៣ដុល្លា គ្រប់គ្រាន់ហើយ

ចំណែកឯ កញ្ញា ម៉ែន ដានី វិញដែលជាកម្មកររោងចក្របូកគោ ស្ថិតក្នុងរាជធានីភ្នំពេញម្នាក់ដែរនោះ បានប្រាប់​ទស្សនាវដ្តីមនោរម្យ.អាំងហ្វូថា គាត់ពេញចិត្តនឹងតួរលេខ ១២៣ដុល្លានេះហើយ ព្រោះថាប្រាក់ឈ្នួលនេះ វា​អាច​គ្រប់គ្រាន់ក្នុងផ្គត់ផ្គង់ ក្នុងក្រុមគ្រួសាររបស់កញ្ញាបាន។

កញ្ញា ហ៊ឹម ឡាំ ជាកម្មករនៅរោងចក្រ ស្កាយហាយ បាននិយាថា បា្រក់ឈ្នួល ១២៣ដុល្លា ពេញចិត្តហើយ បើ​ទាមទាលើសនឹងទៀតក៍គេមិនឲ្យដែរ។ រាល់ឆ្នាំគេតម្លើងឲ្យត្រឹម ១៥ដុល្លាប៉ុណ្ណោះ ឆ្នាំនេះតម្លើងបាន ២០ដុល្លា​គ្រប់គ្រាន់ហើយ បើឡើងច្រើនពេកក៍លំបាកដែរសំរាប់រោងចក្រ។ កញ្ញាបានថ្លែងឲ្យដឹងទៀតថា៖ «បើគេ​តម្លើង​ឲ្យបន្ថែមទៀតក៍ឲ្យទៅ បើគេមិនឲ្យក៍ស្រេចតែគេ បើប្រាក់ខែ ១១០ ១២០ដុល្លាវាច្រើនដែរ»។

គួរបញ្ជាក់ថា បន្ទាប់ពីបញ្ចប់ការប្រជុំបោះឆ្នោត ជ្រើសរើសតួរលេខប្រាក់ឈ្នួលអប្បបរិមា របស់កម្មកររួច ក្រុម​គណៈកម្មការប្រឹក្សាការងារ និងរដ្ឋមន្ត្រីក្រសួងការងារ បានយកលទ្ធផលនេះ ទៅធ្វើការពិចារណា​បន្ថែមទៀត ហើយបានសម្រេចបន្ថែមទឹកប្រាក់ចំនួន ៥ដុល្លាលើទឹកប្រាក់ឈ្នួល១២៣ដុល្លា ដែលបានបោះឆ្នោត​សម្រេច​យក​នោះ។ ដូច្នេះប្រាក់ឈ្នួលរបស់កម្មកររោងចក្រ ដែលពេញសិទ្ធិទទួលបាន ១២៨ដុល្លាក្នុងមួយខែ រីឯអ្នក​ដែលទើបនឹងចូលធ្វើការសាកល្បងក្នុងរោងចក្រ ទទួលបានប្រាក់ឈ្នួល ១២៣ដុល្លាក្នុងមួយខែ៕