ចំនួនទឹកប្រាក់សរុបទាំងអស់ ១៤០លានដុល្លារ (៣៥លានដុល្លារ ក្នុងមួយឆ្នាំ X៤) ដែលប្រទេសអូស្ត្រាលី​សន្យា នឹងផ្ដល់មកប្រទេសកម្ពុជា បន្ទាប់ពីប្រទេសដ៏ក្រីក្រជាងគេក្នុងពិភពលោកមួយនេះ យល់ព្រមទទួល​ជនអន្តោប្រវេសន៍រាប់រយនាក់ ដែលភៀសខ្លួនពីប្រទេសផ្សេងៗ នៅក្នុងទ្វីបអាស៊ី ដើម្បីស្វែងរកសិទ្ធិជ្រក​កោន នៅ​ប្រទេស​អូស្ត្រាលី។ នេះបើតាមការថ្លែង របស់​មន្ត្រីរដ្ឋាភិបាលរបស់ប្រទេសអូស្ត្រាលីមួយរូប ទៅ​កាន់​ប្រព័ន្ធ​សារព័ត៌មានរបស់ប្រទេសនេះ។

កិច្ចព្រមព្រៀង ដែលបានធ្វើឡើងរវាងប្រទេសទាំងពីរ នៅរសៀលថ្ងៃទី២៦ ខែកញ្ញា នៅក្រសួងមហាផ្ទៃនៃ​ប្រទេសកម្ពុជា បានបង្កឲ្យមានការក្ដៅក្រេវក្រោធ ពីសំណាក់ពលរដ្ឋខ្មែរមួយចំនួន និងមួយចំនួនទៀត មកពី​សហគមន៍ជនរងគ្រោះដោយសារបញ្ហាដីធ្លី និងការបណ្ដេញចេញ។ ក្រុមអ្នកតវ៉ា បានបរិហារពី​អសមត្ថភាព​របស់រដ្ឋាភិបាលកម្ពុជា ក្នុងការ គ្រប់គ្រងជនអន្តោប្រវេសន៍យួនខុសច្បាប់ ដោះស្រាយ​នយោបាយ​ដីធ្លី បង្ក​ឲ្យ​មានការបណ្ដេញចេញ​ពី​លំនៅដ្ឋាន ហើយប្រជាពលរដ្ឋក្រីក្រជាច្រើន កំពុងប្រឈម​នឹង​បញ្ហាគ្មាន​ទីលំនៅ តែរដ្ឋាភិបាលបែរជាយល់​ព្រម​ទៅទទួលជនអន្តោរប្រវេសន៍ ឲ្យមកស្នាក់នៅក្នុង​ប្រទេស​កម្ពុជា​ទៅ​វិញ។

សូមតាមដានប្រតិកម្មរបស់ពលរដ្ឋកម្ពុជាទាំងនេះ នៅចំពោះកាម៉េរ៉ាថត របស់ស្ថានីយទូរទស្សន៍របស់អ៊ឺរ៉ុប៖

កិច្ចព្រមព្រៀងដែលប្រទេសអូស្ត្រាលី បានធ្វើជាមួយនឹងព្រះរាជាណាចក្រកម្ពុជា ទៅលើជនអន្តោប្រវេសន៍​ខុស​​ច្បាប់ទាំងនោះ បានជួយបំពេញមុខដ៏រីកថ្លាឲ្យរដ្ឋាភិបាលអូស្ត្រាលី ក្នុងការអនុវត្តន៍នយោបាយ «គ្មាន​ជន​អន្តោប្រវេសន៍​​សូម្បីមួយនាក់»។ ជនអន្តោប្រវេសទាំងនោះ ដែលភាគច្រើនជាជនជាតិឥណ្ឌូនេស៊ី បង់ក្លាដេស និង​ប៉ាគីស្ថាន ត្រូវបានប្រមូលដាក់ក្នុងកោះមួយ ដាច់ស្រយ៉ាល និងនៅកណ្ដាលមហា​សាគរ​បាស៊ីភិក តាំង​ពី​ច្រើនខែមកហើយ។

នាយករដ្ឋមន្ត្រីអូស្ត្រាលី លោក តូនី អាប៊ុត (Tony Abott) ធ្លាប់បានសន្យាកាលពីឆ្នាំទៅម៉ិញ ថានឹង«បញ្ឈប់​ជាស្ថាពរ នូវជនអន្តោរប្រវេសន៍តាមទូកទាំងនោះ»៕