បើ​គ្មាន​ប្រាក់​សង​តម្លៃ​កាង​ឡាន​ថ្មី​ទេ នឹង​យក​ម៉ូតូ​«កញ្ចាស់»​ទាំង​មូល!

អាជីវករក្រីក្រម្នាក់ អាចនឹងបាត់បង់ម៉ូតូ ព្រោះតែមានការប៉ះទង្គិចគ្នា រវាងរ៉ឺម៉ក់ម៉ូតូរបស់ខ្លួន ជាមួយនឹង​រថយន្ត​ម៉ាកនីសាន់ នៅលើកំណាត់ផ្លូវលេខ២៧១ ម្តុំផ្សារហេងលី រាជធានីភ្នំពេញ ព្រោះតែគ្មានប្រាក់បង់។
Loading...
  • ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញថ្ងៃទី២៦ កញ្ញា ២០១៤
  • កែប្រែចុងក្រោយ: September 26, 2014
  • ប្រធានបទ: គ្រោះថ្នាក់ចរាចរណ៍
  • អត្ថបទ: មានបញ្ហា?
  • មតិ-យោបល់

ការប៉ះទង្គិចគ្នានេះបង្កឡើង ដោយរ៉ឺម៉ក់ម៉ូតូមួយគ្រឿង ដែលមានដឹកបន្លែ បានទៅប៉ះនឹងឡានម៉ាកនីសាន់​ពាក់ផ្លាកលេខ ភ្នំពេញ 2AA-6071 បើកបរដោយស្រ្តីម្នាក់ដែលមានវ័យជិត៣០ឆ្នាំ។ ការប៉ះទង្គិចគ្នា​នេះមិន​បង្កឱ្យ ការខូចខាតធំដុំអ្វីនោះទេ តែអ្វីដែលគួឲ្យចាប់អារម្មណ៍នោះ នៅត្រង់ថា ស្រ្តីអ្នកបើកឡាន ទាមទារ​ឲ្យ​ម្ចាស់រ៉ឺម៉កដែលជាជនក្រីក្រ សងកាងឡានថ្មីជាជំនួស និងកាងចាស់ដែលបានប៉ះឱ្យក្រពឹតនោះ។

ម្ចាស់រថយន្តនោះ បានទាមទារឱ្យម្ចាស់ម៉ូតូដាច់ខាតត្រូវតែសង នូវតម្លៃកាងរថយន្តដែលបានប៉ះទង្គិចនោះ បើទោះបីជាមិនបានទាំងអស់ ក៏ត្រូវតែសងពាក់កណ្តាលដែរ។ ដោយឡែកម្ចាស់រ៉ឺម៉កម៉ូតូអ្នកស្រី ស្មា សុផាន មានអាយុ៣១ឆ្នាំ បានលើកដៃសុំទោស និងសុំការអធ្យាស្រ័យពីម្ចាស់ឡានម៉ាកនីសាន់ ព្រោះអ្នកស្រី​គ្មាន​លុយដ៏ច្រើនតាមការទាមទារ ឱ្យសងនូវតន្លៃកាងរថយន្តនោះទេ។ សម្រាប់ម្ចាស់រថយន្ត បានបញ្ជាក់ថា ទោះ​​យ៉ាង​ណា​ក៏ត្រូវតែសងដែរ បើគ្មានលុយសងទេ គឺ«ត្រូវតែយកម៉ូតូកញ្ចាស់»នេះទៅ។

អ្នកដែលត្រូវបានម្ចាស់រថយន្តទាមទារឱ្ យសងថ្លៃខូចខាចតអ្នកស្រី ស្មា សុផាន ដែលមានមុខរបរជា​អ្នក​លក់បន្លែនៅមុខរោងចក្រ បានរៀបរាប់ថា ម៉ូតូដែលមានរ៉ឺម៉កសណ្តោងពីក្រោយ បើកបរដោយ​កូនប្រុស​របស់អ្នកស្រី មុនដំបូងគឺគេចផុតហើយ ប៉ុន្តែគាត់មិនដឹងថា រថយន្តម៉ាកនីសាន់នេះ​ឈប់នៅនឹងមុខម៉ូតូ​របស់​កូន​អ្នកស្រីនោះទេ ដែលជាហេតុបណ្តាល ឱ្យជ្រុងរ៉ឺម៉កប៉ះនឹងកាងឡានផ្នែកខាងក្រោយតែម្តងទៅ។

ស្រ្តីម្ចាស់ម៉ូតូរូបនេះរៀបរាប់បន្តថា អ្នកស្រីគ្មានលុយសងនោះទេ មានតែលើកដៃសុំទោស​ម្ចាស់រថយន្ត​តែ​ប៉ុណ្ណោះ ព្រោះនៅជាប់ខ្លួនរបស់អ្នកស្រី មានលុយតែ១ម៉ឺន៥ពាន់រៀលប៉ុណ្ណោះ។ ហើយរាល់ថ្ងៃនេះ ​គាត់​មាន​ដើមទុនតែ៨ម៉ឺនរៀលនោះទេ សម្រាប់ទិញបន្លែលក់ប្រចាំថ្ងៃនៅមុខរោងចក្រ គ្រាន់និងបានប្រាក់​ចំណេញ​បន្តិចបន្តួចចិញ្ចឹមជីវិត។ បើសិនម្ចាស់រថយន្តនោះយកម៉ូតូគាត់ទៅ តើគាត់មានអ្វីសម្រាប់​រកស៊ី​ចិញ្ចឹម​កូនៗ។

សម្រាប់ម្ចាស់រថយន្តវិញ នៅតែប្រកាន់ជំហរទាមទារ ឱ្យមានដំណោះស្រាយដ៏សមរម្យ។ ស្រ្តីដែលជា​ម្ចាស់​រថយន្តនីសាន់នោះ និយាយថា៖ «គាត់មានតិចតួចឱ្យខ្ញុំ ក៏ខ្ញុំព្រមដែរ តែគាត់កុំនិយាយឡើងថាអត់មានសោះ អត់មានសោះ និយាយមកបញ្ហាអីអាហ្នឹង! ទោះក្រយ៉ាងណា ខ្ញុំក៏ធ្លាប់ក្រដែរ រឿងថាអត់មានសោះ គឺថា​អត់​មានទេ! តែសំខាន់មានការប៉ះពារគ្នាហើយ ត្រូវតែមានការដោះស្រាយគ្នាបន្តិច។»។

តាមសាក្សីដែលនៅកន្លែងកើតហេតុបានអះអាងថា ដើមឡើយឡាននោះបានបើកក្នុងល្បឿនមួយ ឯរ៉ឺម៉ក​ម៉ូតូ​បានបើកពីក្រោយ។ លុះមកដល់កន្លែងកើតហេតុឡាននោះ ក៏ស្រាបតែចាប់ហ្វ្រាំង​ភ្លាមៗឈប់​នៅ​កន្លែង​តែម្តង ដែលជាហេតុធ្វើឱ្យម៉ូតូចាប់ហ្វ្រាំងមិនទាន់ ខំប្រឹងបរគេចដែរ តែរ៉ឺម៉កខាងក្រោយ មិន​អាច​ជៀស​ផុត ហើយ​ទើបបណ្តាលឱ្យក្រពឹតកាងឡានផ្នែកក្រោយនោះទៅ។ ប្រភពដដែលបានបញ្ជាក់ថា​កាង​រថយន្ត​នោះ មាន​តម្លៃ​ប្រហែល២០០ដុល្លា៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...