មន្រ្តីអ្នកនាំពាក្យក្រុមប្រឹក្សាធម្មនុញ្ញកម្ពុជា លោក ព្រហ្ម ញាណវិចិត្រ បានចាត់ទុកការថ្កោលទោស របស់​គណៈ​កម្មការ​ជំនាញច្បាប់អន្តរជាតិថា ធ្វើឡើងដោយគ្មានមូលដ្ឋានច្បាប់លាស់ ដោយមិនបានផ្អែកទៅលើ​ការសិក្សា​ស្រាវជ្រាវឲ្យបានគ្រប់ជ្រុងជ្រោយ។ គណៈកម្មការជំនាញច្បាប់អន្តរជាតិ ដែលបានរកឃើញថា ច្បាប់ទាំងបី ដែល​ក្រុមប្រឹក្សា​ធម្មនុញ្ញកម្ពុជាទទួលស្គាល់ នឹងឲ្យមានការរំលោភលើឯករាជ្យភាពរបស់ស្ថាប័នតុលាការ និងរដ្ឋធម្មនុញ្ញ​ប្រទេសកម្ពុជា។

ស្ថាប័នក្រុមប្រឹក្សាធម្មនុញ្ញ នៅក្នុងវិមានរដ្ឋចំការមន។ (រូបភាព ccc.gov.kh)

ច្បាប់ - លោក ព្រហ្ម ញាណវិចិត្រ មន្រ្តីអ្នកនាំពាក្យក្រុមប្រឹក្សាធម្មនុញ្ញកម្ពុជា បានពន្យល់ថា គណៈកម្មការ​ជំនាញ​ច្បាប់អន្តរជាតិមានសិទ្ធិក្នុងការបញ្ចេញមតិ ប៉ុន្តែស្ថាប័នមួយនេះ និងអ្នកពាក់ព័ន្ធផ្សេងទៀត ត្រូវមានការប្រុងប្រយ័ត្ន ហើយសិក្សាពីស្ថាប័នក្រុមប្រឹក្សាធម្មនុញ្ញកម្ពុជា ច្បាប់រដ្ឋធម្មនុញ្ញកម្ពុជា ពិសេសច្បាប់ទាំងបីឲ្យបានច្បាស់ មុនធ្វើ​សេចក្តីសម្រេចណាមួយ។

មន្រ្តីអ្នកនាំពាក្យក្រុមប្រឹក្សាធម្មនុញ្ញកម្ពុជា ដែលបន្តថា ច្បាប់ទាំងបីធ្វើឡើងស្របតាមនីតិវិធី ចាប់តាំងពីស្ថាប័ន​ជំនាញ (គណៈរដ្ឋមន្រ្តី) រដ្ឋសភា ព្រឹទ្ធសភា និងក្រុមប្រឹក្សាធម្មនុញ្ញកម្ពុជា ដែលអាចធានានីត្យាកូលភាពច្បាប់ (ភាពស្របច្បាប់របស់ច្បាប់) ដូច្នេះអ្នកថ្កោលទោស ឬអ្នកចេញសេចក្តីថ្លែងការណ៍ទាំងឡាយទាំងពួង គម្បីមាន​ការទទួលខុសត្រូវ។

លោក ព្រហ្ម ញាណវិចិត្រ បានសង្កត់ធ្ងន់ប្រាប់ដល់ទស្សនាវដ្តីមនោរម្យ.អាំងហ្វូ នៅថ្ងៃទី១០ ខែកក្កដា ឆ្នាំ២០១៤ នេះថា៖ «ខ្ញុំមិនព្រមានទេ តែកុំឲ្យការប្រើសិទ្ធិ នាំដល់ការប៉ះពាល់អធិបតេយ្យភាពកម្ពុជា។»

សេចក្តីព្រាង​ច្បាប់​ទាំងបីរួមមាន សេចក្តីព្រាងច្បាប់ស្តីពីការរៀបចំអង្គការតុលាការ សេចក្តីព្រាងច្បាប់​ស្តីពីលក្ខន្តិកៈ​នៃចៅក្រម និងព្រះរាជអាជ្ញា និងសេចក្តីព្រាងច្បាប់ស្តីពីការរៀបចំ និងប្រព្រឹត្តទៅនៃឧត្តមក្រុមប្រឹក្សានៃអង្គចៅក្រម ត្រូវបានគណបក្សសង្រ្គោះជាតិ ជាគណបក្សជំទាស់ និងក្រុមអង្គការសង្គមស៊ីវិល បន្តរិះគន់ជាបន្តបន្ទាប់ តាំងពី​នៅ​គណៈរដ្ឋមន្រ្តី រដ្ឋសភា ព្រឹទ្ធសភា ដល់ក្រុមប្រឹក្សាធម្មនុញ្ញ ថាច្បាប់ទាំងនេះ នឹងមិនអាចធានាបានយុត្តិធម៌កម្ពុជាទេ ព្រោះវាបានផ្តល់អំណាចច្រើនដល់រដ្ឋាភិបាល គ្របដណ្តប់លើស្ថាប័នយុត្តិធម៌កម្ពុជា។

តែក្រុមប្រឹក្សាធម្មនុញ្ញ បានច្រានចោលការចោទប្រកាន់ របស់មជ្ឈដ្ឋានទាំងនោះ។ ក្រុមប្រឹក្សាធម្មនុញ្ញកម្ពុជា បាន​ចេញសេចក្តីសម្រេចជាស្ថាពរ និងបិទផ្លូវតវ៉ា កាលពីថ្ងៃទី០២ ខែកក្កដា ឆ្នាំ២០១៤ ដោយអះអាងថាគណៈរដ្ឋមន្រ្តី រដ្ឋសភា និងព្រឹទ្ធសភា បានអនុវត្តយ៉ាងត្រឹមត្រូវ តាមបែបបទដែលមានចែង ក្នុង រដ្ឋធម្មនុញ្ញ ក្នុងការពិនិត្យច្បាប់ និងអនុម័តច្បាប់ទាំង៣ នោះ។ សេចក្តីសម្រេច របស់ក្រុមប្រឹក្សាធម្មនុញ្ញដដែលនោះ សង្កត់ធ្ងន់ថា៖ «រាល់បញ្ញត្តិ​នៅក្នុងច្បាប់ទាំងនោះ ពុំមានបទបញ្ញត្តិណាមួយ មិនស្របទៅនឹងរដ្ឋធម្មនុញ្ញកម្ពុជានោះទេ។»

ចំពោះគណៈកម្មការជំនាញច្បាប់អន្តរជាតិ មិនបានឲ្យតម្លៃលើការចេញសេចក្តីសម្រេច របស់ក្រុមប្រឹក្សាធម្មនុញ្ញ​កម្ពុជានោះទេ។ ស្ថាប័នលំដាប់ថ្នាក់អន្តរជាតិមួយនេះ បានថ្កោលទោសចំពោះសេចក្តីព្រាងច្បាប់​ចំនួនបីទាក់ទង​វិស័យតុលាការនៅកម្ពុជា ដែលត្រូវបានអនុម័តចុងក្រោយដោយក្រុមប្រឹក្សាធម្មនុញ្ញ ហើយចាត់ទុកថា រំលោភ​លើ​ឯករាជ្យភាពរបស់តុលាការ។

គណៈកម្មការជំនាញច្បាប់អន្តរជាតិ បានចេញរបាយការណ៍ បង្ហាញក្តីបារម្ភថា សេចក្តីព្រាងច្បាប់ទាំងនោះ នឹងរឹត​បន្តឹងលើសិទ្ធិរបស់ចៅក្រម និងព្រះរាជអាជ្ញាទៅនឹងសេរីភាពនៃការបញ្ចេញមតិ និងកង្វះនៃការការពារសុវត្ថិភាព​នៃឯករាជ្យភាពតុលាការក្នុងការជ្រើសរើស ការលើកកម្ពស់ ការដកចេញ និងនីតិវិធីដាក់វិន័យលើចៅក្រមជាដើម។ របាយការណ៍ដដែលសង្កត់ធ្ងន់ថា៖ «សេចក្តីព្រាងច្បាប់ទាំងបីនោះ ជាការរំលោភលើឯករាជ្យភាពរបស់ប្រព័ន្ធ​តុលាការ ដោយបំពានស្តង់ដារអន្តរជាតិ និងរដ្ឋធម្មនុញ្ញរបស់ប្រទេសកម្ពុជា៕»