ក្រុមជម្រើសជាតិបាល់ទាត់អ៊ីតាលី បានប្រកួតឈ្នះក្រុមអង់គ្លេស នៅក្នុងស្ថានភាពយ៉ាងពិបាកមួយ ជាពិសេសជា​មួយ​នឹង​សីតុណ្ហភាពយ៉ាងក្ដៅ នៃតំបន់ព្រៃអាម៉ាហ្សូន របស់ប្រទេសប្រេស៊ីល។ ប៉ុន្តែយ៉ាងណាក៏ដោយ ក៏ការប្រយុទ្ធ​យ៉ាងប្ដូរផ្ដាច់ នៅតែកើតមាន រវាងក្រុមទាំងពីរនោះដែរ រាប់ទាំងបច្ចេកទេស ល្បឿនរត់ និងការទាត់បញ្ចូលទីដ៏គួរឲ្យ​ចាប់អារម្មណ៍។

ការប្រើក្បាលរបស់ ម៉ារីយូ បាឡូតេលី បុក​បាល់​បញ្ចូលទីអង់គ្លេស។ (រូបថត fifa)

បាល់ទាត់ពិភពលោក - បើទោះជាអ៊ីតាលីមានភាពប្រាកដនិយមច្រើនជាង ក្នុងការទាត់បញ្ចូលទីក៏ដោយ តែ​សម្រាប់​អង់គ្លេសវិញ វានៅតែជាបរាជ័យ ដែលពួកគេមិនទាន់អស់ចិត្តឡើយ។ បើនិយាយពីសាច់បាល់វិញ ក្រុមអង់គ្លេស​មាន​ការគ្រប់គ្រងបាល់បានច្រើនជាង និងបានព្យាយាមឲ្យមានការផ្លាស់ប្ដូរលទ្ធផលចុងក្រោយ ដោយបានបញ្ចេញ​សឹង​តែ​ទាំងអស់ នូវទេពកោសល្យទាំងប៉ុន្មានរបស់កីឡាករ ទាំងល្បឿនរត់ ការបញ្ជូនបាល់ពីចំងាយ និងការចល័តចុះឡើង រវាងកីឡាករខ្សែប្រយុទ្ធរបស់ខ្លួន។

យ៉ាងណាក៏ដោយ ក៏ការព្យាយាមរបស់ក្រុមអង់គ្លេស ដែលមានរយៈពេលច្រើននាទី មិនទទួលបានលទ្ធផលជាផ្លែផ្កា​អ្វី​ឡើយ ដោយសារការទាត់បញ្ចូលទីជាច្រើនដងរបស់ក្រុមនេះ ត្រូវទប់ដោយខ្សែត្រៀមរឹងដូចជញ្ជាំងបេតុង របស់​ខ្សែ​ការពារ និងអ្នកចាំទី​ដ៏ប្រពៃ ដែលទើបនឹងមកជំនួសកំពូលអ្នកចាំទីច្រើនជំនាន់ ប៊ូហ្វុង របស់អ៊ីតាលី។

ជាមួយនឹងស្ថានភាពដ៏ពិបាកនេះ មកដល់វគ្គចុងបញ្ចប់នៃការប្រកួត គ្រប់កីឡាករទាំងសងខាងបានខះអស់កម្លាំង តែ​រៀងខ្លួន។ ប៉ុន្តែគឺក្រុមអ៊ីតាលីឯណោះទេ ដែលជាអ្នករៀបយុទ្ធសាស្ត្រ នៅក្នុងល័ក្ខខ័ណ្ឌបែបនេះ បានប្រសើរជាងក្រុម​អង់គ្លេស។ បន្ទាប់​ពីរកបានមួយគ្រាប់ទៀត ដោយ​ការប្រើក្បាលរបស់ ម៉ារីយូ បាឡូតេលី (Mario Balotelli) បុក​បាល់​បញ្ចូលទីអង់គ្លេសបានរួច ក្រុមអ៊ីតាលីបានធ្វើការផ្លាស់ប្ដូកីឡាកររបស់ខ្លួន ដើម្បីធ្វើយ៉ាងណា «រក្សាបាល់នៅ​ក្នុងជើង​ឲ្យបានច្រើន និងបង្កឲ្យក្រុមអង់គ្លេសរត់ កាន់តែច្រើន»។

កីឡាករ ម៉ារីយូ បាឡូតេលី បានថ្លែងទៅកាន់អ្នកសារព័ត៌មាន នៅពេលបញ្ចប់ការប្រកួតថា៖ «ខ្ញុំសប្បាយចិត្តណាស់ ព្រោះវាជាគ្រាប់ដំបូងគេ នៅក្នុងការប្រកួតពិភពលោកនេះ ខ្ញុំឧទ្ទិសវាទៅឲ្យគ្រួសារខ្ញុំទាំងអស់។ ល័ក្ខខ័ណ្ឌ​ឧត្តុនិយម​នៅទីនេះ ពិបាកខ្លាំងណាស់ ជាអាកាសធាតុត្រូពិក វាអញ្ចឹងហើយ។ យើងនឹងមើលទៅតាមការប្រកួត​លើកក្រោយៗ​ទៀត។ តែឥឡូវនេះ យើងមានលក្ខណៈប្រសើរទាំងអស់គ្នា។»

ចំណែកគ្រូបង្វឹងរបស់អ៊ីតាលីវិញ លោក សេសា ប្រេនដឺលី (Cesare Prandelli) បានទទួលស្គាល់ថា ក្រុមកីឡាករ​អ៊ីតាលីរបស់លោក បានដង្ហក់នៅចំពោះសីតុណ្ហភាពដ៏ក្ដៅនេះ។ ប៉ុន្តែលោកបានថ្លែងទៀតថា «ក្រុមអង់គ្លេស​រង​គ្រោះ​នឹង​សីតុណ្ហភាព​នេះ ខ្លាំងជាងយើងទៅទៀត ដោយសារតែយើងបានហ្វឹកហាត់ ពីការធន់ទ្រាំនេះ កាលពីប៉ុន្មានថ្ងៃ​មុន​រួចហើយ។ អ្វីដែលយើងសប្បាយចិត្តនោះ គឺការហ្វឹកហាត់នេះ ទទួលបានលទ្ធផលរបស់វាអញ្ចឹងមែន។»៕