គឺកីឡាករ អូរីបេ ប៉េរ៉ាតា (Oribe Peralta) ជាអ្នកឆ្លៀតឱកាស បាល់ខ្ទាតចេញពីដៃអ្នកចាំទីកាមើរូនមកវិញ ទាត់​មួយ​ជើងបំបោងសំណាញ់ ធ្វើឲ្យម៉ិកស៊ិក ទទួលបានជ័យជំនះ ជាស្ថាពរលើដៃគូរប្រកួត មកពីទ្វីបអាហ្វ្រិករបស់ខ្លួន។ ប៉ុន្តែតាមពិតទៅ ម៉ិកស៊ិក មិនមែនត្រូវបានទទួលបានពិន្ទុ តែមួយគ្រាប់នេះទេ ព្រោះអាជ្ញាកណ្ដាល​បានបដិសេធ​គ្រាប់បាល់ របស់ក្រុមប្រទេសនៅទ្វីបអាមេរិកកណ្ដាលមួយនេះ ចំនួនពីរគ្រាប់មុននេះ។

បាល់ទាត់ពិភពលោក - ទោះជាគ្រាប់បាល់ចំនួនពីរ ត្រូវបានបដិសេធចោលយ៉ាងសោកស្ដាយ នៅពាក់កណ្ដាល​ម៉ោងទីមួយ ដោយអាជ្ញាកណ្ដាលក៏ដោយ   ប៉ុន្តែក្រឡាបាល់ដែលគ្របទៅលើ ក្រុមកាមើរូន ជាពិសេសនៅពេល​ដែលខ្សែការពាររបស់កាមើរូន មានចន្លោះប្រហោងជាច្រើននោះ បានធ្វើឲ្យក្រុមម៉ិកស៊ិកនៅទីបំផុត ទទួលបាន​ជ័យជំនះ។

ជាការប្រកួតដ៏ពិបាក ដោយសារមានភ្លៀងធ្លាក់យ៉ាងគំហុក នៅប្រទេសប្រេស៊ីល នៅថ្ងៃទី១៣ ខែមិថុនានេះ ជា​ពិសេសក្នុងអំឡុងពេលនៃការប្រកួត រវាងក្រុមទាំងពីរ ហើយការស្វែងរកឱកាសដើម្បីវាយសម្រុកគ្នាទៅវិញទៅមក ក៏មិនជាស្រួលប៉ុន្មាននោះដែរ។ មួយគ្រាប់ដំបូងរបស់ ម៉ិកស៊ិក នៅនាទីទី១០ ត្រូវបានអាជ្ញាកណ្ដាលគិតថា ជាគ្រាប់​បាល់«ចងមុង» ហើយសម្រេចមិនរាប់ជាបានការនោះឡើយ បើទោះជាអ្វីដែលវីដេអូបានបង្ហាញ មិនដូចទៅនឹង​ការ​មើលឃើញ របស់អាជ្ញាកណ្ដាលនោះក៏ដោយ។ ដូចគ្នានឹងគ្រាប់បាល់ទីពីរ នៅ២០នាទីក្រោយមកដែរ សុទ្ធតែត្រូវ​បានអាជ្ញាកណ្ដាលបដិសេធចោលទាំងអស់។

ប៉ុន្តែទីបំផុតទៅ នៅនាទីទី៦១ ក្នុងពាក់កណ្ដាលម៉ោងទីពីរ កីឡាករ ជីអូវ៉ានី ដូសសេនតូស (Giovani Dos Santos) ជាអ្នកនាំបាល់ទៅដល់មុខអ្នកចាំទីកាមើរូន ហើយព្រលែងមួយជើងទៅ តែត្រូវបានអ្នកចាំទីទះចេញ។ រំពេចនោះ កីឡាករ អូរីបេ ប៉េរ៉ាតា ដែលនៅក្បែរនោះ មិនបានទុកឲ្យឱកាសនេះធ្វើមិនដឹងមិនលឺឡើយ ក៏បាន​ព្រលែងមួយជើង សឹងតែធ្លាយសំណាញ់ខាងក្រោយ។

ក្រុមជម្រើសជាតិ កាមើរូន ដែលមានកីឡាករល្បីៗជាច្រើន ទាល់ឲ្យក្រុមបាល់ទាត់អាជីពនៅប្រទេសអង់គ្លេសនោះ ខំសាកល្បងនឹងជួយសង្គ្រោះពិន្ទុឲ្យក្រុមខ្លួនដែរ  ប៉ុន្តែអ្នកចាំទីរបស់ម៉ិកស៊ិក ក៏មិនជាអន់ប៉ុន្មាននោះដែរ។ បាល់មួយ​គ្រាប់ ដែលបញ្ជូនដោយក្បាលរបស់កីឡាករកាមើរូន សាមុយអែល អេតូអូ (Chelsea Samuel Eto’o) ត្រូវបានអ្នកចាំ​ទីទប់ជាប់ គួរឲ្យកោតស្ងប់ស្ងែង។

ក្នុងរយៈពេល១២ឆ្នាំចុងក្រោយ ក្រុមកាមើរូន មិនដែលឈ្នះការប្រកួតម្ដងសោះ ពេលចេញមកប្រកួតនៅបាល់ទាត់​ពិភពលោកនោះឡើយ រាប់តាំងពីឆ្នាំ២០០២ ដែលមានការជួបប្រកួតដូចនេះ រៀបចំនៅកូរ៉េខាងត្បូង​ និងប្រទេស​ជប៉ុនមក។ ប៉ុន្តែគេនៅមិនទាន់ដឹងពីអនាគត របស់ក្រុមទាំងនេះនៅឡើយ ព្រោះវាគ្រាន់តែជាការប្រកួត​ចាប់ផ្ដើម​ដំបូងប៉ុណ្ណោះ។ យ៉ាងណាក៏ដោយ ម៉ិកស៊ិក រកបាន៣ពិន្ទុរួចជាស្រេចហើយ ដូចគ្នាទៅនឹងក្រុមប្រេស៊ីល ដែរ នៅក្នុង​ពូល A៕