នយោបាយ - មើលទៅ សង្គ្រាមពាក្យសម្ដី និងការវាយប្រហារគ្នា តាមរយៈវោហាស័ព្ទ រវាងអ្នកនយោបាយខ្មែរ កាន់​តែមានភាពស្រួច​ស្រាវ​ឡើងៗ។ ការវាយប្រហារតាមពាក្យសម្ដី ដែលជាការការលើកឡើងរបស់លោក ផៃ ស៊ីផាន ក្នុងថ្ងៃនេះ ប្រតិកម្ម​តបនឹងការចោទប្រកាន់របស់លោកកឹម សុខា ដែលថារដ្ឋាភិបាលគណបក្ស​ប្រជាជន​កម្ពុជា បណ្តោយឲ្យមាន​ព្រឹត្តិការណ៍រត់ជាន់គ្នាស្លាប់ នៅកោះពេជ្រកាលពីឆ្នាំ២០១០ និងលុបបំបាត់បុណ្យអំទូក​ប្រពៃណី​ខ្មែរ។

លោកផៃ ស៊ីផាន មន្រ្តីអ្នកនាំពាក្យទីស្តីការគណៈរដ្ឋមន្រ្តី បានបញ្ជាក់ប្រាប់ ទស្សនាវដ្តីមនោរម្យ.អាំងហ្វូ នៅថ្ងៃទី០៥ ខែឧសភា ឆ្នាំ២០១៤ នេះថា រដ្ឋាភិបាលកម្ពុជាគ្មានបំណង បង្កឲ្យមានព្រឹត្តិការណ៍រត់ជាន់គ្នានៅកោះពេជ្រ ហើយ​ក៏​គ្មានហេតុផល លុបបំបាត់បុណ្យអំទូកប្រពៃណីខ្មែរនោះដែរ។ តែអ្វីដែលលោក កឹម សុខា ចោទប្រកាន់គឺគ្រាន់ជាការ​បំភ្លើស ដើម្បីវាយប្រហារលើរដ្ឋាភិបាលប៉ុណ្ណោះ។ លោក ផៃ ស៊ីផាន និយាយថា អ្វីដែលលោកកឹម សុខា លើក​ឡើង​នេះ គ្មានមូលដ្ឋានអ្វី ​គួរឲ្យជឿជាក់បានឡើយ។

ឧទ្ទាមតាមចិញ្ចើថ្នល់

មន្រ្តីអ្នកនាំពាក្យទីស្តីការគណៈរដ្ឋមន្រ្តីដដែល បានលើកឡើងថា៖ «ដល់គាត់មានប្រសាសន៍អញ្ចឹង ខ្ញុំមិនគិតថា គាត់ជាអ្នកនយោបាយទេ គាត់គ្រាន់តែជាបុគ្គលឧទ្ទាមមួយ តាមចញ្ចើមថ្នល់ ដោយសារគាត់និយាយហ្នឹង គ្មាន​មូលដ្ឋានច្បាស់លាស់ កឹម សុខា ជាអ្នកញុះញុងពលរដ្ឋឲ្យយល់ច្រឡំដូចគាត់។»

លោក កឹម សុខា អនុប្រធានគណបក្សសង្រ្គោះជាតិ ក្នុងឱកាសចូលរួមពិធីរម្លឹកខួបលើទី៦៥ នៃការបាត់បង់​ទឹកដី​ខ្មែរ​កម្ពុជាក្រោមថ្ងៃទី០៤ ខែមិថុនា ឆ្នាំ២០១៤ បានថ្លែងចោទប្រកាន់រដ្ឋាភិបាលគណបក្សប្រជាជនកម្ពុជាធ្ងន់ៗថា៖ «គេ​សម្លាប់ខ្មែរនៅកោះពេជ្រ គឺដើម្បីយកហេតុផលនេះ បំបិទចោលប្រពៃណីអ៊ំទូកខ្មែរយើង។ ប្រវត្តិបុណ្យអ៊ំទូក ពាក់ព័ន្ធ​នឹងការការពារទឹកដី។ អញ្ចឹងហើយគេចង់បំបាត់រឿងហ្នឹង។ មិនដឹងថ្ងៃណា យួនអនុញ្ញាត ហ៊ុន សែន ឲ្យយើងធ្វើ​បុណ្យវិញទេ!»។

សូមទស្សនាវីដេអូ ដែលទាក់ទង៖
លោក កឹម សុខា ទៅក្រុមអ្នកសារព័ត៌មាន

តែសម្រាប់លោកផៃ ស៊ីផាន មន្រ្តីអ្នកនាំពាក្យទីស្តីការគណៈរដ្ឋមន្រ្តី បានពន្យល់ថាលោកកឹម សុខា គម្បីស្វែង​យល់​ពីសេចក្តីថ្លែការណ៍របស់រដ្ឋាភិបាល និងសេចក្តីថ្លែងការណ៍របស់ក្រសួងព្រះបរមរាជវាំង ដែលមានហេតុផល​ត្រឹម​ត្រូវ​ ពាក់ព័ន្ធទឹកជំន់ធ្ងន់ធ្ងរ ព្រះរាជពិធីបុណ្យរបស់អតីតព្រះមហាវីរៈក្សត្រ ព្រះបរមរតនកោដ្ឋ ដើម្បីផ្អាកព្រះរាជ​ពិធី​បុណ្យអំទូកប្រពៃណីខ្មែរ៕