នៅប្រទេសកូរ៉េខាងត្បូង គ្រោះអគ្គិភ័យបានដុតបំផ្លាញមន្ទីរពេទ្យមួយកន្លែង ធ្វើឲ្យមនុស្ស២១នាក់ស្លាប់ និង៦នាក់​ទៀតរងរបួសធ្ងន់។ ទីភ្នាក់ងារសារព័ត៌មាន យ៉ុងហាប់ របស់ប្រទេសនេះ បានថ្លែងបញ្ជាក់ឲ្យដឹង។

អ្នកលត់អគ្គិភ័យរបស់ប្រទេសកូរ៉េខាងត្បូង នៅក្នុងព្រឹត្តិការណ៍ឆេះចំណតរថយន្ដក្រុង។ (រូបភាព Keystone)

កូរ៉េខាងត្បូង - គ្រោះអគ្គិភ័យបានកើតឡើងទៅលើមន្ទីរពេទ្យមួយកន្លែង ក្នុងតំបន់ជៀនសូង () ផ្នែកខាងត្បូងនៃ​រដ្ឋធានីសេអ៊ូល។ នគរបាលបានថ្លែងឲ្យដឹងថា ជនរងគ្រោះដល់ជីវិតភាគច្រើន ដែលត្រូវបានប្រកាសឲ្យដឹង នៅ​ព្រឹកថ្ងៃពុធនេះ បានស្លាប់គាំងខ្លួននៅក្នុងមន្ទីរពេទ្យនោះ និងមួយភាគធំជាអ្នកជំងឺ។ តែនៅក្នុងចំណោម​ជនរងគ្រោះ​ដល់ជីវិតនេះ ក៏មានគ្រូពេទ្យស្ត្រីអ្នកថែរក្សាជំងឺម្នាក់ដែរ។

អ្នកជំងឺដែលសម្រាកព្យបាល នៅក្នុងអាគារជាន់ទីពីរ ប្រមាណជាជាង៣០នាក់ បានសន្លប់នឹងផ្សែង ធ្វើឲ្យថប់​ដង្ហើម។ ប៉ុន្តែជំងឺ១០នាក់ទៀត ដែលបានស្នាក់នៅជាន់ទីមួយ បានរួចផុតពីអណ្ដាតភ្លើង រហូតដល់មានការជួយ​សង្គ្រោះបានមកដល់។

នេះជាគ្រោះអគ្គិភ័យដ៏រង្គាលលើកទីពីរហើយ ដែលមានមនុស្សស្លាប់យ៉ាងច្រើនបែបនេះនេះ នៅប្រទេសកូរ៉េខាង​ត្បូង ក្នុងចន្លោះតែពីរថ្ងៃប៉ុណ្ណោះ។ កាលពីថ្ងៃចន្ទ គ្រោះអគ្គិភ័យមួយទៀត បានដុតបំផ្លាញចំណងរថយន្ដក្រុង ធ្វើឲ្យ​មានមនុស្សស្លាប់ ប្រាំពីរនាក់ និងជាង៤០នាក់ផ្សេងទៀត រងរបួស៕