លោកនាយករដ្ឋមន្រ្តីហ៊ុន សែន នៅថ្ងៃទី២៧ ខែឧសភា ឆ្នាំ២០១៤ នេះបានថ្លែងសារនយោបាយ ដោយចំអកឲ្យ​គណបក្សសង្រ្គោះជាតិ ថាមានគោលជំហរមិនច្បាស់លាស់ ចំពោះភាពឯករាជ្យរបស់គណៈកម្មាធិការជាតិ​រៀបចំ​ការបោះឆ្នោត (គ.ជ.ប)។

លោក ហ៊ុន សែន ក្នុងពេលថ្លែងជាភាសាវៀតណាម ទៅកាន់អ្នកមុខអ្នកមាត់នៃប្រទេសវៀតណាម។ (រូបភាពថតពីវីដេអូទូរទស្សន៍វៀតណាម)

ការបោះឆ្នោត - «ថាមិនចូលចិត្ត គ.ជ.ប ឥឡូវបោះឆ្នោតក្រោមដំបូលរបស់ គ.ជ.ប ដដែល។ (...) មិនទទួលស្គាល់ គ.ជ.ប ឲ្យ គ.ជ.ប លាលែង ប៉ុន្តែដល់ទៅបោះឆ្នោតប៉ុន្មានថ្ងៃមុន គ.ជ.ប ដដែល»។ នេះជាការអត្ថាធិប្បាយ​របស់​លោកនាយករដ្ឋមន្រ្តី ហ៊ុន សែន ក្នុងពិធីចែកសញ្ញាបត្រ ដល់និស្សិតសាកលវិទ្យាល័យភូមិន្ទភ្នំពេញ ជាងបីពាន់នាក់ នៅមណ្ឌល កម្សាន្តកោះពេជ្រ។

ប្រធានគណបក្សសង្រ្គោះជាតិលោកសម រង្ស៊ី កន្លងបានបរិហារ គណៈកម្មាធិការជាតិរៀបចំការបោះឆ្នោត (គ.ជ.ប) ថាគ្មានភាពឯករាជ្យ ហើយបានបដិសេធលទ្ធផលបោះឆ្នោតជ្រើសរើសតំណាងរាស្រ្ត កាលពីខែកក្កដា ឆ្នាំ២០១៣ តែប្រមុខគណៈបក្សជំទាស់នេះ បានប្រកាសថាលទ្ធផលបោះឆ្នោតក្រុមប្រឹក្សារាជធានីខេត្ត ក្រុង ស្រុក ខណ្ឌ កាល​ពីថ្ងៃទី១៨ ខែឧសភា ឆ្នាំ២០១៤ ក្រោមការរៀបចំរបស់ គ.ជ.ប អាចទទួល​យកបាន។

គោលជំហររបស់លោកសម រង្ស៊ី ចំពោះភាពឯករាជ្យ របស់ គ.ជ.ប យ៉ាង​ដូច្នេះ ត្រូវបានលោកនាយករដ្ឋមន្រ្តី ហ៊ុន សែន ចាត់ទុកថាគណបក្សសង្រ្គោះជាតិ មានជំហរមិនច្បាស់លាស់ចំពោះ គ.ជ.ប និងចូលចិត្តធ្វើរឿង«ប្លែកៗ»។

ភ្លាមៗទស្សនាវដ្តីមនោរម្យ.អាំងហ្វូ មិនអាចទាក់ទងមន្រ្តីអ្នកនាំពាក្យគណបក្សសង្រ្គោះជាតិ ដើម្បីធ្វើការអត្ថាធិប្បាយ ចំពោះការលើកឡើង របស់លោកនាយករដ្ឋមន្រ្ តីហ៊ុន សែន បានទេ។

កន្លងមក មន្រ្តីជាន់ខ្ពស់របស់គណបក្សសង្រ្គោះជាតិ ធ្លាប់ពន្យល់ថា កាលដែលគណបក្សប្រជាជនកម្ពុជា ព្រមទទួល​យក​ការកែទម្រង់ស្ថាប័នបោះឆ្នោត គឺមានន័យថាគណបក្សប្រជាជនកម្ពុជា ក៏ទទួលស្គាល់ដែរថា គ.ជ.ប មិនទាន់​គ្រប់លក្ខណៈ ដែលចាំបាច់ត្រូវតែធ្វើការកែទម្រង់។

តែបើទោះជាគណបក្សប្រជាជនកម្ពុជា និងគណបក្សសង្រ្គោះជាតិ បានឲ្យតម្លៃពីភាពឯករាជ្យរបស់ គ.ជ.ប ខុស​គ្នា​ក៏ដោយ ក៏គណបក្សទាំងពីរ បានឯកភាពគ្នារួចហើយថា នឹងធ្វើការ​កំណែទម្រង់ស្ថាប័នមួយនេះ ក្រោមកិច្ច​សហការ​ជួយឧបត្ថម្ភពីរដ្ឋាភិបាលជប៉ុន៕