គណបក្សសង្រ្គោះជាតិ បានប្រារព្ធពិធី រម្លឹកខួបថ្ងៃទី១៧ មេសា តាមការគ្រោងទុក ហើយបានលើកឡើងថា អ្នក​គ្រប់គ្រងប្រទេសកម្ពុជាបច្ចុប្បន្ន គ្មានឆន្ទៈពិតប្រាកដក្នុងការកាត់ក្តីមេដឹកនាំខ្មែរក្រហម ខណៈពួកគេក៏មានជាប់​ពាក់ព័ន្ធ​នឹងរបបខ្មែរក្រហមដែរ។

ពិធី រម្លឹកខួបថ្ងៃទី១៧ មេសា របស់គណបក្សសង្គ្រោះជាតិ នៅបឹងជើងឯក។ (រូបថតហ្វេសប៊ុក)

នយោបាយ - មានការចូលរួមពីព្រះសង្ឃ ក្រុមគ្រួសារជនរងគ្រោះ សកម្មជននយោបាយគាំទ្រ ប្រមាណជាជិតមួយ​ពាន់នាក់ នៅថ្ងៃទី១៧ ខែមេសា ឆ្នាំ២០១៤ នេះគណបក្សសង្រ្គោះជាតិ ដែលជាគណបក្សជំទាស់ បានដឹកនាំពីធីបែប​សាសនា ដើម្បីឧទ្ធិសកុសលផលបុណ្យដល់ក្រុមគ្រោះសារជនរងគ្រោះ ដែលបានស្លាប់ក្នុងរបបប្រល័យ​ពូជសាសន៍​ប៉ុលពត ក្រោយការដួលរលំរបបសាធារណៈរដ្ឋខ្មែរ នៅថ្ងៃទី១៧ ខែមេសា ឆ្នាំ១៩៧៥។ តែពិធីនេះ មិនមានវត្តមាន​ចូលរួមដោយផ្ទាល់ ពីប្រធានគណបក្សលោកសម រង្ស៊ី និងអនុប្រធានគណបក្សលោកកឹម សុខា នោះទេ។

ក្នុងពេលដែលលោកសម រង្ស៊ី និងលោកកឹម សុខា ដែលជាថ្នាក់ដឹកនាំគណបក្សសង្រ្គោះជាតិ អវត្តមាននោះ លោក ម៉ៅ មុនីវណ្ណ ប្រធានស្តីទីគណៈកម្មការប្រតិបត្តិ របស់គណបក្សសង្គ្រោះជាតិបានថ្លែងក្នុងកម្មវិធី នៅសារៈមន្ទីរ​ជើងឯក ជាយរាជធានីភ្នំពេញថា ដើម្បីស្វែងរកយុត្តិធម៌ពិតប្រាកដជូនដល់ជនរងគ្រោះ សាលាក្តីកូនកាត់ ដែល​ត្រូវ​បានបង្កើតឡើងដោយភាគីកម្ពុជា និងអង្គការសហប្រជាជាតិ គម្បីជំនុំជម្រះពីសំណុំរឿង០០១ ដល់០០៤ឲ្យបាន​ឆាប់។

ក្នុងឱកាសដដែលនោះ លោក ម៉ៅ មុនីវណ្ណ បានព្រលយពាក្យ តាមបែបសារនយោបាយថា គណបក្សប្រជាជន​កម្ពុជា ដែលបានគ្រប់គ្រងប្រទេសកម្ពុជា តាំងពីក្រោយការដួលរលំរបបខ្មែរក្រហមឆ្នាំ១៩៧៩ និងការបង្កើតតំបន់​ឥណ្ឌូចិន ត្រូវបានបង្កើតឡើង ក្រោមការជាផ្តួចផ្តើមគំនិត របស់អតីតមេដឹកនាំកំពូលរបស់វៀតណាម គឺលោក ហូ ជីមិញ។ មន្រ្តីជាន់ខ្ពស់របស់គណបក្សជំទាស់ដដែលនេះ បានសង្កត់ធ្ងន់ថា ថ្នាក់ដឹកនាំកម្ពុជានិង​ប្រទេស​កម្ពុជា​សព្វថ្ងៃ កំពុងស្ថិតនៅក្រោមឥទ្ធិពលរបស់ប្រទេសជិតខាងមួយនេះ។

ជុំវិញករណីនេះ ទស្សនាវដ្តីមនោរម្យ.អាំងហ្វូ មិនទាន់អាចសុំការអត្ថាធិប្បាយពីមន្រ្តីរដ្ឋាភិបាល និងមន្រ្តីរបស់​គណបក្សប្រជាជនកម្ពុជា ដើម្បីធ្វើការអត្ថាធិប្បាយបាននៅឡើយទេ។ តែកន្លងមក មន្រ្តីរដ្ឋាភិបាលកម្ពុជា ជាពិសេស​លោកនាយករដ្ឋមន្រ្តីហ៊ុន សែន បានបង្ហាញចេតនាបញ្ចប់សាលាក្តីខ្មែរក្រហមឲ្យបានឆាប់។ ហើយលោកហ៊ុន សែន ក៏បានព្រមានថាកម្ពុជា នឹងមានការបែកបាក់ជាតិជាថ្មី ឬសង្រ្គាមស៊ីវិល បើសាលាក្តីខ្មែរក្រហម បន្តបើកសំណុំ​រឿង​ថ្មី។

ថ្ងៃ១៧មេសា ឆ្នាំ១៩៧៥ ជាថ្ងៃដែលក្រុមខ្មែរក្រហម ឡើងកាន់អំណាច ហើយ រហូតដល់ថ្ងៃទី៧មករា ឆ្នាំ​១៩៧៩។ ហើយក្នុងរយៈពេល ៣ឆ្នាំ ៨ខែ និង ២០ថ្ងៃនៃរបបខ្មែរក្រហម យ៉ាងហោចណាស់ ក៏មានពលរដ្ឋកម្ពុជាជិត ២លាន​នាក់ ត្រូវបានកាប់សម្លាប់យ៉ាងព្រៃផ្សៃ និងដោយអត់ឃ្លា បាក់កម្លាំង យ៉ាងអយុត្តិធម៌ជាទីបំផុត៕

-------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៧ មេសា ២០១៤