ខាងក្រោមនេះ ជាការដកស្រង់ចំណុចសំខាន់ៗ មួយចំនួន ទាក់ទងនឹងសង្ក្រាន ទំនាយ និងជោគជីតារាសី នៃឆ្នាំមមី ឆស័ក ពុទ្ធសករាជ ២៥៥៨ ត្រូវនឹងគ្រឹសករាជ ២០១៤។

អវតារនៃព្រះវិស្ណុ ដែលមានក្បាលជាសេះ នៃរចនាបទប្រាសាទសម្បូរព្រៃគុប សព្វថ្ងៃតាំងនៅសារមន្ទីរហ្គីម៉េ ក្នុងរដ្ឋធានីប៉ារីស។ (រូបថត ឯកសារ)

ឆ្នាំមមី២៥៥៨ - ឆ្នាំថ្មីនេះ ត្រូវនឹងសត្វសេះ (មមី) ដែលមានពង្សទេព្តាស្រី ធាតុភ្លើង ត្រូវនឹងថ្ងៃច័ន្ទ១៥កើត ១រោច និង២រោច តាមច័ន្ទគតិ ត្រូវនឹងថ្ងៃទី១៤ ១៥ ១៦ខែចែត្រ ដែលជាវេនរបស់ បុត្រីរបស់កបិលមហាព្រហ្ម ឈ្មោះ គោរាគទេវី សៀតផ្កាអង្គារបុស្ស ប្រដាប់ដោយបុក្តា ភក្សាហារប្រេង អាវុធស្តាំ ព្រះខ័ន ឆ្វេងឈើច្រត់ និង មានសត្វខ្លា ជាពាហនៈ។ ទេពធីតាអង្គនេះនឹងចុះបើកឆ្នាំថ្មី ប្រហែលវេលាម៉ោង ៨ និង៧នាទីព្រឹក។

យោងតាមគេហទំព័ររបស់វិទ្យាស្ថាន ពុទ្ធសាសនបណ្ឌិត្យ បានរៀបរាប់ពីគ្រឿងរណ្តាប់ទទួលទេវតាឆ្នាំនេះថា ត្រូវ​រៀបកាលសំពត់មួយគូរ បាយសឺប៉ាឆាមមួយគូ ស្លាធម៌មួយគូ ទឹកអប់មួយគូ (ទៀន៥ធូប៥) លាច៥ ផ្កាដាក់លើ​ជើងពាន១គូ ចេកនួន ចេកណាំវ៉ា រៀបដាក់ជឿងពានមួយគូ ផ្លែឈើ១១មុខរៀបដាក់ជើងពាន១១គូ ដូងឡៅ១គូ ទឹកស្អាតពីកែវ។ ឆ្នាំនេះគួរកប្រេងដាក់ទទួលទេវតាផង ព្រោះជាភក្សាហាររបស់ទេវធីតា។

ស្រុកទេសនឹងកើតកល្លិយុគ !

រីឯទំនាយប្រចាំឆ្នាំ ចេញដោយគេហទំព័រដដែលផ្សាយថា ឆ្នាំនេះមានកេណ្ឌពីរ មានឈ្មោះថាវិបត្ត ស្រូវ សំណាប ស្រែចំការ នឹងកើតកិមិជាតិ (ដង្កូវនាង មេអំបៅ សត្វល្អិត) ស៊ីបំផ្លាញផល្លានុផលឲ្យខូចអស់ពាក់កណ្តាល ស្រុក​ទេសនឹងកើតកល្លិយុគនិរាស្រ្តប្រាស់ចាកចោលគ្នា ច្រើនលើកច្រើនសារ។

ទំនាយកេណ្ឌការធ្វើស្រែមានសេស (០) ទំនាយថាស្រែដីទំនាបបានផលល្អ។ ប៉ុន្តែមនុស្សមានជំងឺដម្កាត់ ស្លាប់បាត់​បង់ជីវិតក៏ច្រើនអនេក។

កេណ្ឌព្រះទិត្យ វិញទាយថា ឆ្នាំស្រូវល្អមានតម្លៃថោក។ថ្ងៃមហាសង្ក្រាន្តនោះ នឹងមានមនុស្សសម្លាប់គ្នានូវមានសឹក សង្គ្រាមនៅស្រុកនាមកណ្តុរ និងនាមដំរី។

ជោគជីតារាសីរបស់មនុស្សកើតឆ្នាំមមី

រីឯគេហទំព័រ ពុទ្ធិកសមាគមខ្មែរ វត្តខេមររតនារាម នៅទីក្រុងសាន់ឌីយ៉េហ្គោ រដ្ឋកាលីហ្វ័នីញ៉ាសហរដ្ឋអាមេរិកវិញ បានសរសេរផ្សាយ ពីអត្តចរិកមនុស្សកើតឆ្នាំមមីនេះថា មនុស្សប្រភេទនេះ មានរាសីមធ្យម អ្នកផងស្រឡាញ់ រាប់​អានច្រើន។ អ្នកកើតឆ្នាំនេះ រមែងជាមនុស្សមានឬកពារក្រអឺតក្រទម តែមានសន្តានចិត្តល្អ ជាទីពឹងពាក់ពុំណាក់ អាស្រ័យនៃញាតិមិត្តបាន។ ពាក្យសម្តីនិយាយច្រើនគ្រោតគ្រាត មិនសូវទន់ភ្លន់ អាចមានសត្រូវដោយសារសម្តីខ្លួន ប៉ុន្តែមានវាសនាខ្ពស់ មិនអាចអ្នកណាប៉ុនប៉ងពាធាបានឡើយ។

អត្ថបទដែលរៀបរៀងដោយលោក បណ្ឌិតពុទ្ធាចារ្យ កៅ ពុទ្ធា បានបន្តទៀតថា មនុស្សប្រភេទនេះ ច្រើនវេទនាពីតូច ប៉ុន្តែស្រួល ពេលធំឡើយ ដោយសារជាប្រភេទមនុស្សមានសតិបញ្ញាឈ្លាសវៃ ប៉ិនប្រសប់ក្នុងការរកស៊ី និងយល់គ្រប់​ល្បិចកលរបស់មនុស្ស។ យ៉ាងណាម៉ិញ មុខរបបដែលសក្តិសម និងមនុស្សប្រភេទនេះ មាន ខាងពេទ្យ គ្រូហ្ម អ្នក​វិទ្យាសាស្រ្ត មេធាវី និងជាអ្នកជំនួញប្រែ ប៉ុន្តែបើប្រកបមុខរបបណាដែលប្រើកម្លាំងកាយ និងទទួលបានផលជា​មធ្យម៕

--------------------------------------
ដោយ ក. សេងហុង (ទំនាក់ទំនង៖ [email protected]) - ភ្នំពេញ ថ្ងៃ១១ ខែមេសា ឆ្នាំ ២០១៤