សង្គមស៊ីវិលដែលជំនាញខាងការឃ្លាំមើលសិទ្ធិមនុស្ស បានសម្ដែងប្រតិកម្ម ចំពោះសកម្មភាពរបស់រដ្ឋាភិបាល កម្ពុជា ថាកំពុងបិទសិទ្ធិសេរីភាព របស់ប្រជាពលរដ្ឋ។ ក្រុមមន្ត្រីដែលតែងតែមានវត្តមាន នៅពេលមានការតវ៉ា​របស់​ពលរដ្ឋ បានបរិហាទៀតថា មិនគ្រាន់តែបំបិទសិទ្ធសេរីភាពពលរដ្ឋប៉ុណ្ណោះទេ តែថែមទាំងប្រើកងកម្លាំងខុសច្បាប់ ឲ្យមកបង្ក្រាបលើការតវ៉ារបស់ពលរដ្ឋទៅវិញ។ ការតវ៉ានិងការបញ្ចេញមតិ ដែលត្រូវបានការពារដោយរដ្ឋធម្មនុញ្ញ។

ពលរដ្ឋរងគ្រោះ នឹងវាយតប់របស់ក្រុមសន្ដិសុខស៊ីឈ្នួល កាលពីព្រឹកថ្ងៃទី៣១ ខែមីនា ឆ្នាំ២០១៤។ (រូបថត MONOROOM.info/ C. Nita)

សិទ្ធិសេរីភាព - មន្រ្តីអង្គការសង្គមស៊ីវិល ដែលមានវត្តមានក្នុងការឃ្លាំមើលការអនុវត្តច្បាប់ និងសិទ្ធិមនុស្ស នៅ​ទីលានប្រជាធិបតេយ្យកាលពីព្រឹកថ្ងៃទី៣១ ខែមីនានេះ បានចាត់ទុកថារអ្វី ដែលរដ្ឋាភិបាលបាននឹងកំពុងតែ​អនុវត្ត​នេះ «មិនខុសអ្វី» ទៅនឹងប្រទេសកាន់លិទ្ធិផ្តាច់ការ និងយោធានិយមនោះឡើយ ហើយផ្ទុយទាំងស្រុង​ទៅនឹងគោល​ការណ៍ នៃរបបលិទ្ធិប្រជាធិបតេយ្យ ដែលមានចែងក្នុងច្បាប់កម្ពុជា។

ការថ្លែងរបស់ក្រុមអង្គការសង្គមស៊ីវិល បានធ្វើឡើងក្នុងពេលដែលអាជ្ញាធរគ្រប់គ្រងដោយរដ្ឋាភិបាលលោក ហ៊ុន សែន បច្ចុប្បន្ន តែងតែបានប្រើប្រាស់នូវកងកម្លាំងសន្ដិសុខ ដែលគ្មានក្របខណ្ឌច្បាស់លាស់ ឲ្យមកបង្ក្រាបលើ​ពលរដ្ឋជាបាតុករដៃទទេរ ដោយគ្រាន់តែពួកគាត់ចង់ទាមទារសម្ដែងមតិអ្វីមួយ។

មន្រ្តីទទួលខុសត្រូវមួយរូប ពីសមាគមការពារសិទ្ធិមនុស្ស អាដហុក លោក ណៃ វ៉ង់ដា បានចាត់ទុកថា កម្លាំង​សន្តិសុខ (ក្រុមសណ្តាប់ធ្នាប់ខណ្ឌ) មិនមែនជាកម្លាំងស្របច្បាប់ និងមិនមែនជាកម្លាំងពិតរបស់អាជ្ញាធរ ដែលស្ថិត​ក្នុងការមិនទទួលខុសត្រូវ នូវរាល់ហេតុការណ៍ដែលបានកើតមាន ឬនឹងអាចកើតមាននោះទេ។ លោកបានពន្យល់ថា «សន្តិសុខនេះ ជាសន្តិសុខឥតក្របខណ្ឌ។ ប្រើពេលណា​មាន​របួស មានឈាម​ហូពេល​នោះ។» និងថែមទាំងបាន​លើកជាឧទាហរណ៍ជាក់ស្តែងថា ក្នុងការប៉ះទង្គិចគ្នា កាលពី​ព្រឹកថ្ងៃចន្ទទី៣១ ខែមីនានេះ បានបណ្តាលឲ្យ​ប្រជា​ពលរដ្ឋម្នាក់បែកក្បាល។

លោក អំ សំអាត ប្រធានផ្នែកបច្ចេកទេសស៊ើបអង្កេត របស់អង្គការការពារសិទ្ធិមនុស្ស លីកាដូ បាននិយាយថា រដ្ឋាភិបាលគួដោះស្រាយដោយសន្តិវិធី ធ្វើយ៉ាងណា បញ្ជៀសនូវការប្រើប្រាស់​អំពើហិង្សា ដែលនាំឲ្យ​មានរបសួស។ លោកចាត់ទុកថា នេះជាការរំលោភទៅនឹងច្បាប់រដ្ឋធម្មនុញ្ញ ដែលទទួលស្គាល់កតិការសញ្ញាស្តីពី​សិទ្ធិពលរដ្ឋ សិទ្ធិ​នយោបាយ ពិសេសការចែងយ៉ាងច្បាស់ពីការជួបជុំ ការប្រមូលផ្តុំ ការធ្វើបាតុកម្មដោយសន្តិវិធី។ លោកបញ្ជាក់ថា «បើសិទ្ធិទាំងអស់នេះត្រូវបានរិតត្បិត នោះប្រទេសយើង ដែលកំពុងកាន់របបប្រជាធិបយេ្យ កំពុង​តែឈានទៅ​រក​អតីតកាលឡើងវិញ មិននាំគ្នាដើម្បីកសាងទៅរកលិទ្ធិប្រជាធិបតេយ្យទេ»។

ទស្សនាវដ្តីមនោរម្យ.អាំងហ្វូ មិនអាចសុំការបញ្ជាក់ពីលោក ឡុង ឌីម៉ង់ អ្នកនាំពាក្យសាលារាជធានីភ្នំពេញ ដើម្បីបំភ្លឺ​ពាក់ព័ន្ធនឹងការប្រើប្រាស់នូវកម្លាំងសន្តិសុខ វាយលើប្រជាពលរដ្ឋ ដែលជាបាតុករបានទេ ក្នុងរសៀលនេះ។ តែ​សម្រែកបញ្ជាផ្ទាល់របស់លោក សុខ ប៉េងវុធ អភិបាលរងខណ្ឌដូនពេញ ដែលអមដំណើរដោយលោក ឃួង ស្រេង អភិបាលរងក្រុងភ្នំពេញ លោកសុខ សម្បត្តិ ក្នុងពេលចុះទៅបង្ក្រាបក្រុមបាតុករព្រឹកម៉ិញនេះ ត្រូវបានអ្នក​ការសែត​ថតជាប់សម្លេងថា «ដេញពួកវាចេញឲ្យអស់ ពីទីលានប្រជាធិបតេយ្យ ទាំងអាអ្នកការសែតទាំងអស់ហ្នឹង។ វាយ​ពួក​វាទៅ អាណាក៏វាយទៅ មិនបាច់ទៅខ្វល់ទេ។ បាតុកម្មខុសច្បាប់ ត្រូវតែបង្ក្រាបអញ្ចឹង។»

អាជ្ញាធរតាមរយៈក្រសួងមហាផ្ទៃ បានចេញសេចក្ដីប្រកាសព័ត៌មានកាលពីដើមខែមករាកន្លងទៅ ហាមឃាត់រាល់​ការជួបជុំរបស់ពលរដ្ឋ បន្ទាប់ពីបានបង្ក្រាបប្រកបដោយឈាម ទៅលើរលកបាតុកម្មដែលបានកើតឡើង ជាបន្ត​បន្ទាប់យ៉ាងព្រោងព្រាត របស់អ្នកគាំទ្រគណបក្សសង្គ្រោះជាតិ និងក្រុមកម្មករទាមទារប្រាក់ខែ ១៦០ដុល្លា។ ការរិត​ត្បិតរបស់អាជ្ញាធរនេះ ត្រូវបានលោក ណៃ វ៉ង់ដា ពន្យល់ទៀតថា «ឥឡូវនេះ សេរីភាពទាំងអស់នោះ ត្រូវបានដក​ហូតស្ទើតែទាំង​ស្រុង​ហើយ  ដោយមានច្បាប់ហាមឃាត់ប្រជាពលរដ្ឋ មិនឲ្យ​មាន​ការជួបជុំលើសបី១០នាក់នេះ បាន​ន័យថាសេរីភាព​ប្រជាពលរដ្ឋ ការគោរពលិទ្ធិប្រជាធិបតេយ្យ គឺស្ទើរស្មើនឹង​សូន្យ»។

សូមបញ្ជាក់ដែរថា ប្រទេសកម្ពុជាបានស្ថិតក្នុងភាពជាប់គាំងផ្នែកនយោបាយ តាំងពីក្រោយការបោះឆ្នោតសកល ខែកក្កដា ឆ្នាំ២០១៣កន្លងមក។ តែយ៉ាងណាក៏ដោយ លោក អំ សំអាត បានចាត់ទុកថា រឿងនយោបាយ ទុកឲ្យ​អ្នក​នយោបាយដោះស្រាយ និងអង្គុយចរចាគ្នា។ ឯសិទ្ធិសេរីភាពប្រជាពលរដ្ឋ ត្រូវមានការអនុញ្ញាតិ៕

--------------------------------------------------
ដោយ អ៊ុម វ៉ារី (ទំនាក់ទំនង៖ [email protected]) - ភ្នំពេញថ្ងៃទី៣១ មីនា ២០១៤