អ្នកភូមិបឹងកក់ត្រូវបណ្តេញចេញ មិនឲ្យលក់ផ្កាមុខសាលារាជធានី
នៅថ្ងៃទិវានៃសេចក្តីស្រលាញ់ ១៤ កុម្ភៈ ឆ្នាំ២០១៤នេះ អ្នកភូមិបឹងកក់ប្រមាណជាជាង១០ ត្រូវបានសាលារាជធានីភ្នំពេញ ហាមឃាត់មិនឲ្យលក់ផ្កាមុខអាគារសាលារាធានីភ្នំពេញជាប់មហាវិថីព្រះមុនីវង្សនោះទេ។ ការហាមឃាត់នេះ សាលារាជធានីភ្នំពេញ មិនបានលើកហេតុផលនោះទេ ដោយគ្រាន់តែបញ្ជាឲ្យសន្តិសុខសាលាក្រុង បណ្តេញអ្នកភូមិបឹងកក់ចេញ ភ្លាមៗ ក្រោយការដាក់លក់បានមួយស្របក់។
ក្រុមប្រជាបឹងកក់ ឈរលក់ផ្កា មុននឹងត្រូវបានបំបែក។ (រូបថត ហ្វេសប៊ុក)
អ្នកតវ៉ា - អ្នកស្រី ស៊ុន ស្រីលាភ ជាអ្នកភូមិបឹងកក់ដែលបានលក់ផ្កានៅមុខសាលារាជធានីភ្នំពេញ ថ្ងៃទី១៤ កុម្ភៈ នេះ បានអត្ថាធិប្បាយប្រាប់ទស្សនាវដ្តីមនោរម្យ.អាំងហ្វូ ថា អ្នកភូមិបឹងកក់ជាង១០នាក់ បានយកផ្កា ជាង១០០ដើមមកលក់មុខសាលារាធានីភ្នំពេញ ដើម្បីទទួលបានប្រាក់ចំណេញខ្លះ សម្រាប់ទ្រទ្រង់ជីវភាពរបស់សហគមន៍បឹងកក់ និងជាការបង្ហាញក្តីស្រលាញ់ របស់អ្នកភូមិបឹងកក់ជាមួយប្រជាពលរដ្ឋកម្ពុជាទូទៅ។
អ្នកស្រី ស៊ុន ស្រីលាភ ឲ្យដឹងទៀតថា កាលដែលអ្នកភូមិបឹងកក់ មកលក់នៅមុខសាលារាជធានីភ្នំពេញ គឺដោយសារអ្នកភូមិបឹងកក់មិនមានកន្លែងផ្សេងទៀត ដាក់លក់ផ្កាបាន ហើយលក់នៅមុខសាលារាជធានីភ្នំពេញ ក៏ជាការបង្ហាញថាអ្នកភូមិបឹងកក់ បានតស៊ូយូរឆ្នាំមកហើយ ចំពោះការ បាត់បង់ ដីធ្លី ផ្ទះសំបែង ដោយសារការអភិវឌ្ឍន៍របស់សាលារាជធានីភ្នំពេញផងដែរ។
ជុំវិញការអះអាងរបស់ស្រ្តីអ្នកភូមិបឹងកក់រូបនេះ ទស្សនាវដ្តីមនោរម្យ.អាំងហ្វូមិនអាចទាក់ទងលោក ឡុង ឌីម៉ង់ មន្រ្តីអ្នកនាំពាក្យសាលារាជធានីភ្នំពេញ ដើម្បីធ្វើការអត្ថាធិប្បាយបាននៅឡើយទេ។ តែអ្នកភូមិបឹងកក់ ត្រូវបានសន្តិសុខសាលារាជធានីភ្នំពេញ បណ្តេញចេញភ្លាៗ មិនឲ្យលក់ផ្កានៅមុខសាលារាជធានីភ្នំពេញនោះទេ។ ក្រោយការបណ្តេញនោះ អ្នកភូមិបឹងកក់បាននាំគ្នាឡើងជិះម៉ូតូកង់បី បន្តទៅលក់ផ្កាតាមផ្សារតំបន់មាត់ទន្លេទៀត តែត្រូវបានក្រុមសន្តិសុខរបស់សាលាក្រុង បន្តតាមរំខាន។
ទន្ទឹមនឹងនេះ អ្នកភូមិបុរីកីឡា នៅថ្ងៃទី១៤ កុម្ភៈ នេះ ត្រូវបានសមត្ថកិច្ចចម្រុះ និងសន្តិសុខ របស់សាលារាជធានីភ្នំពេញ វាយសំពងយ៉ាងចាស់ដៃ នៅក្នុងការបះទង្គិចគ្នា ជុំវិញទំនាស់ដីធ្លី និងអាគារស្នាក់នៅ រវាងភាគីអ្នកភូមិបុរីកីឡា សាលារាជធានីភ្នំពេញ និងក្រុមហ៊ុនឯកជន ដ៏មានឥទ្ធិពលមួយ។ ក្រោយការប៉ះទង្គិចនោះ ក្រុមមន្រ្តីសិទ្ធិមនុស្ស បានឲ្យដឹងថា មានអ្នកភូមិបុរីកីឡា៧នាក់រងរបួស ក្នុងនោះបីនាក់រងរបួសធ្ងន់ ដែលមានទាំងស្ត្រីម្នាក់ មានផ្ទៃពោះ៧ខែផងដែរ៕
--------------------------------------
ដោយ អ៊ុំ បូរី (ទំនាក់ទំនង៖ [email protected]) - ភ្នំពេញ ថ្ងៃទី១៤ ខែកុម្ភៈ ឆ្នាំ២០១៤