​អាជ្ញាធរ​បាន​ឱ្យ​ដឹងនៅថ្ងៃពុធទី១៤ខែសីហានេះ ថាមាន​មនុស្ស​យ៉ាងហោចណាស់ ២៨០នាក់​ត្រូវ​បាន​សម្លាប់ ក្នុងពេល​ចូលទៅបំបែកហ្វូងបាតុកម្ម នៃក្រុមអ្នកដែលស្និតនឹងអតីតប្រធានាធិបតី មហាមេដ ម៉ូស៊្សី (Mohamed Morsi) ដែលត្រូវ​បានកងទ័ព ធ្វើរដ្ឋប្រហារកាលពីព្រហស្បត្តិទី០៤ខែកក្កដាកន្លងទៅ។

នៅពេលមានការប្រឈមមុខគ្នាខ្លាំង ផ្សែងនិងអណ្ដាតភ្លើងបានឆេះឡើងយ៉ាងខ្មួលខ្មាញ់។ (រូបថត AP Photo/Sabry Khaled)

មាន​មនុស្ស​ជិត ២៨០នាក់​ត្រូវ​បាន​សម្លាប់​នៅ​ថ្ងៃ​ពុធទី១៤ខែសីហានេះ ​នៅ​ក្នុង​ប្រទេស​អេហ្ស៊ីប​នៅ​ក្នុង យុទ្ធនាការបំបែក​បាតុកម្មដ៏បង្ហូរឈាម​មួយ ប្រឆាំងនឹងក្រុមបាតុករ​ទាមទារ​ឱ្យ​វិល​ត្រឡប់មកវិញ នូវ​អតីត​ប្រធានាធិបតីអ៊ីស្លាម​និយមរបស់​ពួកគេ លោក មហាមេដ ម៉ូស៊្សី ដែលត្រូវបាន​ទម្លាក់ពីតំណែង ​ដោយ​កងទ័ពកាលពីខែកក្កដាមុន។ ​អំពើ​ហឹ​ង្សាយ៉ាងរង្គាល ​បាន​ឆ្លង​រាល​ដាល ​យ៉ាង​ឆាប់​រហ័ស​នៅ​ទូទាំង​ប្រទេស​។

អាជ្ញាធរ​បាន​បង្ហាញ​ថា ប្រជាជន​ស្លូតត្រង់ប្រមាណជា ២៣៥នាក់ ​និង​កង​កម្លាំងនគរបាល ៤៣នាក់ ​ត្រូវ​បាន​សម្លាប់​នៅ​ទូទាំង​ប្រទេស។ ប៉ុ​ន្ដែ​ផល​ប៉ះពាល់​ មានអាចមានតួលេខ​ខ្ពស់​ជាង។ ​ទីភ្នាក់ងារសារព័ត៌មានបារាំង (AFP) បានឃើញ​សាក​សព ១២៤នាក់ ​នៅ​ក្នុង​កន្លែងរ៉ាបា អាល់ អាដាវីវា ​(Rabaa Al​-Adawiya​) តែ​មួយប៉ុណ្ណោះ ដែលជាកន្លែងដែលក្រុម​អ្នក​តវ៉ា​​គាំទ្រលោកម៉ូស្សី ជួបប្រជុំគ្នាយ៉ាងធំនៅ​កណ្ដាលទីក្រុងគែរ។ នៅទីកន្លែងនោះ ខាងអាជ្ញាធរសុខាភិបាល បាន​រាយ​ការណ៍​ថាមានមនុស្សស្លាប់តែ៦១នាក់ប៉ុណ្ណោះ។ ដោយឡែក ខាងចលនា«​បងប្អូន​​ម៉ូ​ស្លី​ម» បាន​និយាយថា មាន​មនុស្សច្រើនជាង​២២០០នាក់ បានស្លាប់ និង១០ពាន់នាក់ផ្សេងទៀត រងរបួស។

ខណៈ​ពេល​ដែល​ម្ចាស់ពានរង្វាន់ណូបែល​សន្តិភាព​ លោកមហាមេដ អែលបារ៉ាដី (Mohamed ElBaradei) បានលាលែង​ពីតំណែងជាអនុប្រធានាធិបតី ដើម្បី​បដិសេធ «មិន​ទទួល​យក​ផល​វិបាក ​នៃ​ការ​សម្រេច​ចិត្តមួយ» ដែលលោកមិន​យល់​ព្រម​ជាមួយ ក្នុងយុទ្ធនាការបំបែកហ្វូងបាតុកម្មនេះ ផ្ទុយទៅវិញនាយក​រដ្ឋ​ម​ន្ដ្រី​ដែល​តែងតាំង​ដោយ​កងទ័ព លោក ហាហ្សេន បេប្លាវី (Hazem Beblawi) ​បានថ្លែង​សរសើរ​ថាកងកម្លាំងនគរបាល បានអត់ធ្មត់ដល់កម្រិតខ្ពស់មួយ។ រដ្ឋ​ម​ន្រ្តី​ក្រសួង​មហា​ផ្ទៃ​ បាននិយាយថា «នគរបាល បានទទួលសេចក្ដី​ណែនាំ​ឱ្យ​ប្រើ​​តែ​​ឧស្ម័ន​ បង្ហូរទឹកភ្នែកប៉ុណ្ណោះ ហើយ​មិន​មានអាវុធ​ទេ។ ប៉ុន្តែ​នៅពេល​ដែល​កងកម្លាំង​សន្តិសុខ​បាន​មក​ដល់​ ពួក​គេ​ត្រូវ​បាន​ទទួលស្វាគមន៍ដោយ​គ្រាប់កាំភ្លើង​ពិត បាញ់ចេញពីក្រុមបាតុករ។»

បន្ទាប់​ពី​មួយ​ថ្ងៃពេញ ​នៃ​ការ​ប៉ះទង្គិច​គ្នា ប្រកបដោយភាពរង្គាលនេះ ​អាជ្ញាធរ​បាន​ប្រកាសដាក់ប្រទេស ក្នុង«ភាព​អាសន្ន» ​និងដាក់​បំរាម នៅតាមបណ្ដាខេត្តចំនួនជាងពាក់កណ្ដាលប្រទេស រួមទាំងទីក្រុងគែរ និងខេត្តអាឡិសង់ឌ្រី (Alexandrie នៅភាគ​ខាងជើង​) ផង។ មួយម៉ោង​បន្ទាប់ ​ពីការប្រកាសនេះបានចូលជាធរមាន ​មន្ត្រីទទួលខុសត្រូវខាង​សន្តិសុខ​មួយ​រូប​បាន​ប្រាប់ ទីភ្នាក់ងារបារាំងថា ភាព​ស្ងប់ស្ងាត់ ​បានត្រឡប់មកវិញ​នៅ​ទូទាំង​ប្រទេស។

ភាពស្ងប់ស្ងាត់ជាបណ្ដោះអាសន្ន

ភាពស្ងប់ស្ងាត់ ប្រហែលជាអាចមានតែនៅក្នុងរយៈពេលខ្លីប៉ុណ្ណោះ​ ដោយហេតុថាភាពតានតឹង នៅតែគ្រប​ដណ្ដប់​ពេញផ្ទៃ​ប្រទេស។ ចលនានិយមអ៊ីស្លាម បានអំពាវនាវឲ្យមានការធ្វើបាតុកម្មជាថ្មីទៀត ខណៈពេលដែលកងកម្លាំងរក្សាសន្តិសុខ បានព្រមានថានឹងមិនអនុញ្ញាតឲ្យមាន បាតុកម្មក្នុងរយៈពេលយូរឡើយ។ ក្រុមអ្នកមានសមាណចិត្តនឹងអតីប្រធានាធិបតី បានចូលមកបោះជំរុំបាតុកម្មរបស់ពួកគេ ធ្វើឲ្យកកស្ទះ តាំងពីមួយខែកន្លះមកហើយ។

សហគមន៍​អ​ន្ដ​រ​ជាតិ​ដែល​បាន​ព្យាយាម​ដើម្បី​ជួយ​សម្រុះសម្រួល​ ក្រុមប្រឈមទាំងសងខាង បានថ្កោលទោសពីការ​ប្រើ​ប្រាស់អំពើ​ហឹង្សា ដើម្បីបំបែកក្រុមបាតុករដែលមានចំនួនរាប់សិបពាន់នាក់ មានទាំងស្រ្តីនិងកុមារផងនោះ។

នាយក​រដ្ឋ​ម​ន្ដ្រី​ដែល​តែងតាំង​ដោយ​កងទ័ព លោក ហាហ្សេន បេប្លាវី បាននិយាយតាមកញ្ចក់ទូរទស្សន៍ថា គ្មានប្រទេស​ណាមួយ អត់អោនឲ្យមានការបោះជំរុំយ៉ាងយូបែបនេះទេ។ លោកបានសន្យាថានឹងបន្តការងាររបស់រដ្ឋាភិបាល ដើម្បី​ឈានទៅដល់ការបោះឆ្នោតឡើងវិញមួយ នៅដើមឆ្នាំ២០១៤។

ពីរដ្ឋធានី​វ៉ាស៊ីនតោន ​សហរដ្ឋ​អាមេរិកឯណោះវិញ ​រដ្ឋមន្ត្រីការបរទេស ​លោក ចន ឃែរី (John Kerry) បានថ្កោល​ទោស​ការបង្ហូឈាមគួរឲ្យស្អប់ខ្ពើមនេះ ហើយលោកបាន​ជ​ម្រុ​ញឲ្យមាន ​ការ​បោះ​ឆ្នោត​ឡើងវិញជាបន្ទាន់។ ប្រមុខការទូតអ៊ឺរ៉ុប លោកស្រី កាតឺរីន អាស្តុន (Catherine Ashton) បានសាកល្បងធ្វើជាអាជ្ញាកណ្ដាល ជុំវិញបញ្ហានៅប្រទេសអេហ្សីប ហើយ​លោកស្រីបានទាមទារឲ្យមាន ការលប់ចេញឲ្យបានឆាប់បំផុត នូវការប្រកាសដាក់ប្រទេសក្នុងភាពអាសន្ន៕

រូបថតបន្ថែមពីការប្រឈមមុខគ្នា៖

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី១៤ ខែកក្កដា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ