ក្លិបម៉ែនឆេស្ទើ ស៊ីធី (Manchester City) ខិតជិតចុះកិច្ចសន្យានាំយកខ្សែប្រយុទ្ធក្រុមសេវីឡា (Sevilla) អាល់វ៉ារ៉ូ ណេហ្គ្រេដូ (Alvaro Negredo) ជាផ្លូវការហើយ ខណៈដែលកីឡាករអន្តរជាតិអេស្ប៉ាញរូបនេះ នឹងឈានដល់​ដំណាក់​កាលពិនិត្យ​សុខភាពឆាប់ៗនេះ។ នេះបើតាមក្លិបប្រទេសអេស្ប៉ាញ បានរាយការណ៏។

កីឡាករខ្សែរប្រយុទ្ធ អាល់វ៉ារ៉ូ ណេហ្គ្រេដូ ពេលនៅទាត់ក្នុងក្រុមសេវីឡា។

កីឡាករវ័យ២៧ឆ្នាំ បាននិយាយថា គាត់ចង់បោះជំហ៊ានថ្មីបន្ទាប់មួយទៀត ក្នុងអាជីពរបស់គាត់។ គាត់បាននិយាយនៅ​ក្នុងសន្និសិតកាសែតក្លិបសេវីឡាថា៖ «សម្រាប់រយះពេល៤ឆ្នាំ ដែលខ្ញុំនៅទីនេះ ខ្ញុំពិតជារីករាយខ្លាំងណាស់។ ប៉ុន្តែខ្ញុំ​គិត​ថា ពេលវេលារបស់ខ្ញុំ បានមកដល់ហើយ។»

ក្លិបម៉ែនស៊ីធី បានចំណាយអស់ប្រមាណ២០លានផោន (២៣លានអ៊ឺរ៉ូ) សម្រាប់ខ្សែប្រយុទ្ធរូបនេះ ដែលរកគ្រាប់បាល់​បញ្ចូលទីបាន២៦គ្រាប់ នៅក្នុងក្របខ័ណ្ឌឡាលីកា (La Liga) កាលពីរដូវកាលមុន។ បើការផ្ទេរទទួលបានជោគជ័យ ណេហ្គ្រេដូ នឹងមកចូលរួមជាមួយនឹងអតីតមិត្តរួមក្រុមសេវីឡាដូចគ្នា ជេសឺស ណាវ៉ាស់ (Jesus Navas) នៅក្នុង​កីឡាដ្ឋាន​អ៊ីតាហេដ (Etihad Stadium)។

ខ្សែបម្រើស្លាប ណាវ៉ាស់ វ័យ២៧ឆ្នាំ បានផ្ទេរពីសេវីឡា មកកាន់ក្រុមម៉ែនស៊ីធី ក្នុងតម្លៃ១៤.៩លានផោន ក្នុងកិច្ចសន្យា​រយៈពេល៤ឆ្នាំនៅក្នុងរដូវក្តៅនេះ ហើយណេហ្គ្រេដូ បាននិយាយថា គាត់នឹងរីករាយ បើបានទៅចូលរួមជាមួយនឹង​​អតីត​មិត្តរួមក្រុមរបស់គាត់នៅទីនោះទៀត។

គាត់បាននិយាយថា៖ «ខ្ញុំរីករាយ និងពេញចិត្តនឹងចំណាយពេលជាច្រើនឆ្នាំទៀតជាមួយណាវ៉ាស់។»

ម្ចាស់ក្លិបសេវីឡា លោកជូសេម៉ារៀ ដេលនីដូ (Jose Maria del Nido) បានប្រកាសកាលពីពុធថា៖ «ណេហ្គ្រេដូ នឹងចូល​រួមជាមួយក្រុមម៉ែនស៊ីធី។ ម៉ែនស៊ីបានទិញកីឡាករម្នាក់ដ៏អស្ចារ្យ ដែលជាកំពូលអ្នកទាត់បញ្ចូលទីបានច្រើនម្នាក់ នៅក្នុង​ឡាលីកាប្រទេសអេស្ប៉ាញ។»

គាត់បានបន្ថែមថា៖ «នេះជាការលក់ដ៏ធំសម្រាប់ក្រុមសេវីឡា និងជាការលក់កីឡាករសំខាន់បំផុតលំដាប់ទី២នៅក្នុង​ប្រវត្តិសាស្ត្ររបស់ក្លិប បន្ទាប់ពីការលក់ខ្សែការពារ ដេនីញ៉ែល អាល់វែស (Daniel Alves) ទៅកាន់ក្រុមបាសេឡូណា (Barcelona)។ អ្នកគ្រប់គ្នាគួរតែសប្បាយចិត្ត ព្រោះនេះការចុះកិច្ចសន្យាដ៏អស្ចារ្យមួយ សម្រាប់ក្រុមទាំង២។»

ណេហ្គេដូ បានបង្ហាញខ្លួននៅក្រុមជម្រើសជាតិអេស្ប៉ាញ បានចំនួន១៤ប្រកួតហើយ ហើយគាត់រកគ្រាប់បាល់​បញ្ចូលទី​បាន៦គ្រាប់។ គាត់ក៏ជាសមាជិកក្រុមអេស្ប៉ាញមួយរូប ដែលជួយឲ្យអេស្ប៉ាញឈ្នះពានរង្វាន់អ៊ឺរ៉ូ២០១២ (Euro 2012) ផងដែរ៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី១៨ ខែកក្កដា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ