ក្រុមដែលទើបតែឡើងមកកាន់ក្របខ័ណ្ឌព្រីមែលីក (Premier League) លើកដំបូង បន្ទាប់ពីអវត្តមានអស់រយះពេល ៥១ឆ្នាំ ខាឌីហ្វស៊ីធី (Cardiff City) បានបំបាក់ក្រុមជើងឯករង ម៉ែនឆេស្ទើ ស៊ីធី (Manchester City) ដោយលទ្ធផល ៣-២ កាលពី​យប់ថ្ងៃអាទិត្យ។

ក្រុមខាឌីហ្វស៊ីធី កំពុងសប្បាយរីករាយ បន្ទាប់ពីបានទាត់បញ្ចូលទីរបស់ម៉ែនឆេស្ទើ ស៊ីធី។ (រូបថត

បន្ទាប់ពីឈ្នះពានរង្វាន់លីកលំដាប់ទី២ ឆែមពានស្សីប (Championship) កាលពីរដូវកាលមុនរួចមក ក្រុមដែលមានមូលដ្ឋាន​នៅក្នុងប្រទេសវ៊ែលមួយនេះ ពិតជាធ្វើឲ្យអ្នកទស្សនា ឬប្រិយមិត្តស្នេហាវិស័យបាល់ទាត់ភ្ញាក់ផ្អើលមិនស្ទើរទេ នៅពេល​ដែលឃើញពួកគេអាចទទួលជ័យជំនះលើក្រុមម្ចាស់ជើងឯកកាលពីឆ្នាំ២០១២ ដែលមានកីឡាករតម្លៃថ្លៃៗបំផុត។

ខ្សែប្រយុទ្ធ ហ្វ្រៃហ្សឺ ខាំប៊ែល (Fraizer Campbell) បានប្រើក្បាលតែតបញ្ចូលទីបាន២គ្រាប់ នៅ១១នាទីចុងក្រោយ ហើយ​បានជួយឲ្យក្រុមរបស់លោក ម៉ាល់គី ម័កឃេ (Malky Mackay) ទទួលបានជ័យជំនះនៅរាត្រីនោះ បន្ទាប់ពីកីឡាករអារ៉ុន ហ្គាន់ណាសិន (Aron Gunnarsson) រកគ្រាប់បាល់តាមបានស្មើ ១-១ លុបចោលគ្រាប់បាល់នាំមុខរបស់ខ្សែប្រយុទ្ធ អេឌីន ឌីហ្សេកូ ដែលកើតឡើងនៅនាទីទី៥២។ ខ្សែប្រយុទ្ធ អាល់វ៉ារ៉ូ ណេហ្គ្រេដូ (Alvaro Negredo) បានតែតបញ្ចូលទីគ្រាប់ទី២ ឲ្យម៉ែនស៊ីធីបន្តទៀតនៅចុងម៉ោងបន្ថែម ប៉ុន្តែទោះជាយ៉ាងណាមិនអាចតាមបានស្មើនោះទេ។

វាការប្រកួតក្នុងផ្ទះលើកដំបូងបំផុតសម្រាប់ក្រុមខាឌីហ្វ នៅក្នុងក្របខ័ណ្ឌកំពូលរបស់អង់គ្លេស បើគិតចាប់ពីឆ្នាំ១៩៦២មក ខណៈដែលកីឡាដ្ឋានខាឌីហ្វស៊ីធី (Cardiff City Stadium) ដែលមានមូលដ្ឋាននៅភាគខាងត្បូងប្រទេសវ៊ែលនោះ មានអ្នក​ចូលរួមទស្សនាផ្ទាល់ពេញពហុកីឡាដ្ឋានតែម្តង។

ម៉ែនស៊ីធី គ្រប់គ្រង់បាល់បានល្អនៅវគ្គទី១ ប៉ុន្តែខាឌីហ្វ បានខិតខំដេញតាមនិងព្យាយាមបិទយ៉ាងល្អ ដែលធ្វើឲ្យការ​ប្រកួត​បញ្ចប់វគ្គទី១ គ្មានការទាត់បញ្ចូលទីគ្នាសោះ។ ខ្សែបម្រើ ដេវីដ ស៊ីលវ៉ា (David Silva) មានឱកាសទាត់បញ្ចូលទី​យ៉ាងល្អ​មួយគ្រាប់ដែរ ប៉ុន្តែត្រូវបានអ្នកចាំទីដៃស្អិត ដេវីដ ម៉ាស្សល (David Marshall) ជួយសង្គ្រោះបានយ៉ាងងាយស្រួល។

ខណៈដែលកីឡាករខ្សែការពារ និងជាប្រធានក្រុម វិនសិន ខមផែនី (Vincent Kompany) កំពុងតែសម្រាកព្យាបាលរបួស មានន័យថាក្រុមភ្ញៀវត្រូវបង្ខំចិត្តដាក់ខ្សែបម្រើ ចាវី ហ្គាស្សៀ (Javi Garcia) ធ្វើជាខ្សែការពារកណ្តាលវិញ ហើយខ្សែបម្រើ​អន្តរជាតិអេស្ប៉ាញរូបនេះ មិនអាចការពារពីការតែតបញ្ចូលទីរបស់ខ្សែប្រយុទ្ធខាំប៊ែលបាននោះទេ ទើបធ្វើឲ្យស្ថានការណ៏​ប្រែប្រួលយ៉ាងធ្ងន់ធ្ងរដូចនោះ។

ដូច្នេះបញ្ចប់ការប្រកួតក្រុមដែលមានបំណងលើកពានព្រីមែលីកនៅរដូវកាលនេះ ម៉ែនស៊ីធី ពុំអាចទទួលបានពិន្ទុទេ​កាល​ពីយប់ថ្ងៃអាទិត្យ ខណៈដែល២ប្រកួតកន្លងមកពួកគេឈ្នះ១ ចាញ់១ មាន៣ពិន្ទុ ឈរនៅចំណាត់ថ្នាក់លេខ៧។ ឯក្រុម​ឆែលស៊ី (Chelsea) ស្ថិតនៅលើកំពូលតារាង និងក្រុមហង្សក្រហម លីវើភូល (Liverpool) កំពុងតែឈរនៅចំណាត់ថ្នាក់​លេខ២។

ប្រកួតបន្ទាប់របស់ក្រុមមេឃខៀវ ម៉ែនស៊ីធី នឹងត្រូវប៉ះក្រុមដែលទើបតែឡើងមកព្រីមែលីកមួយទៀត ពោលគឺត្រូវ​ស្វាគមន៏​ក្រុមខ្លាធំ ហ៊ុលស៊ីធី (Hull City) នៅថ្ងៃសៅរ៏ ទី៣១ ខែសីហាខាងមុខ៕

សូមទស្សនាវីដេអូសង្ខេប នៃការប្រកួតរវាងក្រុមទាំងពីរ និងប្រតិកម្មមួយចំនួន៖

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៦ ខែសីហា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ