កឹម សុខា៖ គ.ជ.ប.បោះពុម្ភសន្លឹកឆ្នោត លើសចំនួនពលរដ្ឋដែលមានឈ្មោះ ជាងពីរលានសន្លឹក
- ដោយ: អ៊ុម វ៉ារី
- កែប្រែចុងក្រោយ: June 20, 2013
- ប្រធានបទ:
- អត្ថបទ: មានបញ្ហា?
- មតិ-យោបល់
-
ភ្នំពេញ៖ សន្លឹកឆ្នោតដែល គ.ជ.ប បានបោះសម្រាប់ការបោះឆ្នោតជ្រើសតាំងតំណាងរាស្រ្តនីតិកាលទីប្រាំនេះ មានចំនួនច្រើនលើសលុប រហូតលើសចំនួនឈ្មោះប្រជាពលរដ្ឋដែលបានចុះឈ្មោះជាងពីរលានសន្លឹក។
លំដាប់លេខរៀង របស់គណបក្សនយោបាយ ដែលចូលរួមបោះឆ្នោតនិតិកាលទី៥ឆ្នាំ២០១៣។ (រូបថត MONOROOM.info/ O.Vary)
តាមតារាងលទ្ធផលនៃការពិនិត្យបញ្ជីឈ្មោះ និងចុះឈ្មោះបោះឆ្នោតឆ្នាំ២០១២ ដែលចេញដោយ គ.ជ.ប កាលពីថ្ងៃទី៣១ ខែធ្នូ ឆ្នាំ២០១២ បានបង្ហាញថា ចំនួនប្រជាពលរដ្ឋសរុប ដែលបានចុះឈ្មោះបោះឆ្នោតនោះ មានចំនួនជាងប្រាំបួនលាន(៩៦,៧៥៤,៥៣)នាក់។
លោក កឹម សុខា បានធ្វើការចោទប្រកាន់ថា គ.ជ.ប មានភាពមិនប្រក្រតី ក្នុងការបោះពុម្ភសន្លឹកឆ្នោតច្រើនលើសលុបរហូតដល់ ១២,៣០៧,១៥០ សន្លឹក បើប្រៀបធៀបទៅនឹងចំនួនប្រជាពលរដ្ឋដែលមានឈ្មោះក្នុងបញ្ជីបោះឆ្នោត ត្រឹមតែជាងប្រាំបួនលាន(៩៦,៧៥៤,៥៣)នាក់ប៉ុណ្ណោះ។ លោកមានការមន្ទិលសង្ស័យ ចំពោះការបោះពុម្ភសន្លឹកឆ្នោត លើសរហូតដល់ជាងពីរលានសន្លឹក។ នេះជាការលើកឡើងរបស់ លោក កឹម សុខា ក្នុងសន្និកាសែតកាលពីវេលាម៉ោងជាងពីរ ថ្ងៃទី២០ ខែមិថុនានេះ នៅទីស្នាក់ការកណ្តាលគណបក្សសង្គ្រោះជាតិ ខណ្ឌទួលគោក។
ក្នុងសន្និកាសែតនោះលោក កឹម សុខា បានបង្ហាញថា បើយោងតាមមាត្រា៩៤ នៃច្បាប់ស្តីពីការបោះឆ្នោតតំណាងរាស្រ្ត ចែងថា «អ្នកបោះឆ្នោតម្នាក់ៗ មានសិទ្ធិបោះឆ្នោតតែមួយសន្លឹក និងតែមួយដងគត់(...)»។ លោកចោទសួរថា ហេតុអ្វីបានជា គ.ជ.ប បោះពុម្ភសន្លឹកឆ្នោតច្រើនយ៉ាងនេះ។ «ទោះបីសម្រាប់សន្លឹកឆ្នោតខុស ក៏មិនខុសរហូត ដល់ជាងពីលានសន្លឹកនោះដែរ»។
ប្រធានគណបក្សស្តីទីរូបនេះ បានបន្ថែមថា គ.ជ.ប ក៏មិនបានបង្ហាញពីទម្រង់ ប្រភេទក្រដាស និងបញ្ជាក់ពីលក្ខណៈសំងាត់នៃសន្លឹកឆ្នោត ដល់គណបក្សទាំងអស់ដែលបានចុះឈ្មោះនោះទេ។ ជាចុងក្រោយលោកក៏បានសង្កត់ធ្ងន់ថា រោងពុម្ភ(លី វ៉ាន់ហុង) ដែល គ.ជ.ប ផ្តល់សិទ្ធិឲ្យបោះពុម្ភសន្លឹកឆ្នោតនោះ មានលក្ខណដែល«មិនគួរឲ្យទុកចិត្ត» ដោយសារតែម្ចាស់រោងពុម្ភនោះ មានទំនាក់ទំនង«ជិតស្និត»ជាមួយមន្ត្រីរាជរដ្ឋាភិបាល។
ទស្សនាវដ្តីមនោរម្យព័ងអាំងហ្វូមិនអាចសុំការបំភ្លឺពីលោកទេព នីថា បានទេនាល្ងាចនេះ ដោយលោកពុំទទួលទូរសព្ទ័ តែបើតាមសេចក្តីប្រកាសព័តមានរបស់លោក ហ៊ី រ៉ុង ប្រធាននាយកដ្ឋានប្រតិបត្តិរបស់ គ.ជ.ប ការផលិតសន្លឹកឆ្នោតនៅរោងពុម្ភ លី វ៉ាន់ហុង មានតំណាងគណបក្សនយោបាយ អ្នកសង្កេតការណ៍បោះឆ្នោត និងអ្នកសារព័ត៌មានបានចូលរួម វាស់ស្ទង់ពីកម្រិត«សុវត្តិភាពខ្ពស់»នៃដំណើរការនេះ។ ក្នុងប្រកាសនោះបានបញ្ជាក់ថា «សន្លឹកឆ្នោតនីមួយៗ សុទ្ធតែមានលេខកូដសុវត្តិភាព ដើម្បីផ្ទៀងផ្ទាត់ជាមួយលេខកូដខេត្ត ឆ្នាំបោះឆ្នោត និងលេខរៀងទាំងប្រាំបីខ្ទង់។ (...) ប្រើប្រភេទអក្សរតែមួយគត់ ដែលបានបង្កើតឡើងយ៉ាងពិសេសក្នុងឱកាសនេះ។»
សេចក្តីប្រកាសព័តមានបានបន្តរថា បុគ្គលិកក្នុងរោងពុម្ភទាំង១៥០នាក់ ធ្វើការទាំងយប់ទាំងថ្ងៃ ដោយមានពាក់ស្រោមដៃពណ៌ស ក្នុងការបោះពុម្ភ សង្កត់ បង្វិល រិតចង ដាក់ជាផ្នែក និងវេចខ្ចប់សន្លឹកឆ្នោតដាក់ក្នុងកេស មួយកេសមានម្ភៃកញ្ចប់ ក្រោមប្រតិបត្តិការណ៍ត្រួតពិនិត្យច្រើនដងយ៉ាងតឹងរឹង និងម៉ត់ចត់។ មានកំលាំងប៉ូលីស ដប់ប្រាំ (១៥)នាក់ ធ្វើការផ្លាស់ប្តូរវេនគ្នាម្ភៃបួន(២៤)ម៉ោង យាមកាមនៅផ្នែកខាងក្រៅនៃរោងពុម្ភ និងមានសន្តិសុខប្រាំនាក់ ធ្វើការយាមកាមផ្នែកខាងក្នុងនៃរោងពុម្ភផងដែរ។ ក្រៅពីនោះមានកាមេរ៉ាសុវត្តិភាព ចំនួនម្ភៃគ្រឿងបានថតនូវរាល់សកម្មភាពទាំងអស់ក្នុងរោងពុម្ភនោះ ហើយក៏មានរថយន្តអគ្គីសភ័យចតត្រៀមជាប្រចាំ។
ទោះជាយ៉ាងនេះក៏ដោយ គ.ជ.ប. ធ្លាប់បានប្រកាសថា ការបោះពុម្ពសន្លឹកឆ្នោតលើសចំនួនអ្នកបោះឆ្នោតនោះ ដើម្បីទុកជាសន្លឹកឆ្នោតបម្រុង ក្នុងការខូចខាត រហែក ឬប្រឡាក់ដោយប្រកាណាមួយ នោះនឹងមានសន្លឹកឆ្នោតថ្មីជាជំនួស។
---------------------------------------------------------
ដោយៈ អ៊ុម វ៉ារី - ភ្នំពេញថ្ងៃទី២០ មិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ