នគរបាលថៃបានប្រកាសថា នេនពីអង្គ ត្រូវបានចាប់ឃាត់ខ្លួន បន្ទាប់ពីបាននាំកុមារអាយុ១៤ឆ្នាំម្នាក់ ទៅ«ប្រគេន»ឲ្យចៅ​អធិការរបស់ខ្លួន នៅក្នុងវត្ត ដើម្បីសេពកាម។ នេះជាហេតុការណ៍ថ្មីមួយទៀត កើតឡើងក្នុងប្រទេសមួយ ដែលប្រកាសថា​ខ្លួនជាអ្នកប្រតិបត្តិយ៉ាងខ្ជាប់ខ្ជួន នូវព្រះពុទ្ធសាសនា។

សង្ឃរាប់សិបអង្គនៅថៃ កំពុងសូត្រធម៌ ក្នុងព្រះវិហារវត្តព្រះកែវ រាជធានីបាងកក ដើម្បីឧទ្ទិសខួបឆ្នាំ៨៤វស្សា ថ្វាយព្រះមហាក្សត្សព្រះបាទភូវិបុល។ (រូបថត Reuters)

នាយនគរបាលប្រចាំខេត្តឈៀង ម៉ៃ ស្ថិតនៅផ្នែកខាងជើងនៃប្រទេសថៃ លោកស័ក្ដិប្រាំ វៀរ៉ាឈុន ប៊ុនថាវីល (Wirachon Bunthawile) បានបញ្ជាក់ថា នេនទាំងពីរអង្គនេះ ដែលប្រកែកថាមិនដឹងពី អំពើសេពកាមនេះ អាចនឹងត្រូវមានទោស​រហូត​ដល់១៥ឆ្នាំ នៅក្នុងពន្ធនាគារ។

៩៥%នៃប្រជាជនថៃ កាន់សាសនាព្រះពុទ្ធ

នាយនគរបាលបានបន្ថែមថា «ចៅអធិការនោះ នៅគង់ក្នុងវត្តនៅឡើយ ហើយយើងនៅរងចាំដីកាឃាត់ខ្លួនមួយ ដែលនឹង​ចេញប្រឆាំងនឹងលោក»។ លោក ប៊ុនថាវីល បានបញ្ជាក់ថា បើតាមសាក្សីផ្ដល់ដោយ ជនដែលអះអាងថាជាជនរងគ្រោះ និងអ្នកបើកបររថយន្ដ បាននិយាយថា នេនទាំងពីរអាយុរវាងពី២០ ទៅ២៣ឆ្នាំ បាននាំកុមារអាយុ១៤ឆ្នាំនេះ ទៅ«ជួប»​មេ​វត្តរបស់ខ្លួន នៅក្នុងវត្តតែម្ដង ដែលស្ថិតនៅស្រុក ឈៀងដាវ នៃខេត្តភាគខាងជើង ហើយមានចំនួនជាញឹកញយដង​រួច​មក​ហើយ។

រឿងអាស្រូវនេះ បានផ្ទុះឡើងជាថ្មីទៀត បន្ទាប់ពីហេតុការណ៍ដែលមានការផ្សាយតាមវីដេអូមួយ កាលពីប៉ុន្មានថ្ងៃមុននេះ ពីសង្ឃចំនួនបីអង្គ ដែលនិមន្តតាមយន្ដហោះឯកជនមួយគ្រឿង។ នៅក្នុងវីដេអូនោះ គេបានឃើញសង្ឃទាំងបីអង្គ គង់នៅ​ក្នុងយន្ដហោះ ជាមួយនឹងសម្ភារះប្រើប្រាស់ប្រចាំថ្ងៃ ដែលមានផ្លាកយីហោធំៗ និងមានតម្លៃថ្លៃៗ ហើយខ្សែវីដេអូបាន​បង្អើលមនុស្សឲ្យចុចចូលទៅមើល ជាង៥០០ ពាន់ដងរួចមកហើយ។

ប្រជាជនថៃប្រមាណជា៩៥% កាន់ព្រះពុទ្ធសាសនា ដែលជាចំនួនដ៏ខ្ពស់មួយ នៅក្នុងពិភពលោក។ ប៉ុន្តែស្ថានភាពសង្គម​បានប្រែប្រួល ការប្រតិបត្តិតាមធម៌វិន័យ ត្រូវបានសង្ឃជំនាន់ក្រោយ មិនឲ្យតម្លៃ។ ជាពិសេស នៅក្នុងសំនុំរឿងជាច្រើន ដែលប្រព័ន្ធផ្សព្វផ្សាយក្នុងស្រុក បានរាយការណ៍ពីការប្រើប្រាស់គ្រឿងញៀន ឬគ្រឿងស្រវឹង និងបន្ថែមពីលើនេះ មានការសេពកាមជាមួយ នឹងស្រីរកស៊ីផ្លូវភេទ ជាមួយសង្ឃជាដើម៕

សូមទស្សនាវីដេអូ ស្ដីពីព្រះសង្ឃនិមន្តតាមយន្ដហោះឯកជននោះដូចខាងក្រោម៖

-------------------------------------------------
ដោយ ៖ កេសរកូល - ភ្នំពេញ ថ្ងៃទី១៩ ខែមិថុនា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ