បុរសដែលជាជនសង្ស័យ ក្នុងព្រឹត្តិការណ៍ចាប់បង្ខាំងស្ត្រីបីនាក់តាំង១០ឆ្នាំមកហើយ នៅទីក្រុងក្លេវឡេន (Cleveland) កំពុងប្រឈមនឹងបទចោទប្រកាន់ ចំនួន៣២៩ករណី ដែលភាគច្រើន ជាបទចោទប្រកាន់ទាក់ទងនឹង ការចាប់ពង្រត់ និង​បទចាប់រំលោភសេពសន្ធវៈ។ នេះជាសេចក្ដីប្រកាស របស់អាជ្ញាធរតំបន់ កាលពីថ្ងៃសុក្រទី០៧ខែមិថុនា។

ជនសង្ស័យ អារីយ៉ែល កាស្ត្រូ។

ចៅក្រមតុលាកាជាន់ខ្ពស់ នៃតំបន់ទន្លេ គូវ៉ាហូហ្គា (Cuyahoga) បានបង្ហាញពីបទចោទប្រកាន់ទាំងនេះ កាលពីថ្ងៃសុក្រ​ប្រឆាំងនឹងជនសង្ស័យ អារីយ៉ែល កាស្ត្រូ (Ariel Castro) អតីតអ្នកបើកបររថយន្ដដឹកកូនសិស្ស ដែលត្រូវបានគេ​បញ្ឈប់​កាលពីរដូវស្លឹកឈើជ្រុះកន្លងទៅ។

អារីយ៉ែល កាស្ត្រូ ត្រូវបានចោទប្រកាន់ ថាបានចាប់ពង្រត់ អាម៉ានដា ប៊ើរី (Amanda Berry) - ជីណា ឌឹស៊ុស (Gina DeJesus) និង មៃឃើល ក្នៃ (Michelle Knight) ព្រមទាំងបានឃាត់ខ្លួនស្ត្រីទាំងនេះ នៅក្នុងផ្ទះរបស់ខ្លួន ក្នុងរយៈពេល​រាប់​ឆ្នាំ រាប់ទាំងក្មេងស្រីម្នាក់អាយុ៦ឆ្នាំ ដែលអារីយ៉ែល មានជាមួយនាងអាម៉ាដា នោះផង។

ចៅក្រុមតុលាការជាន់ខ្ពស់ ក៏បានចោទជនសង្ស័យនេះ ពីឃាតកម្មដ៏ធ្ងន់ធ្ងរ ខណៈពេលដែលជននេះបានព្យាយាមបញ្ឈប់ ការមានផ្ទៃពោះដោយចេតនា និងដោយខុសច្បាប់។ ក្នុងចំណោមនោះ បទចោទប្រកាន់ចំនួន ១៣៩ស្ដីពីការចាប់រំលោភ សេពសន្ធវៈ និង១៧៧ទៀត ពីបទចាប់ពង្រត់។

ដោយឡែកមេធាវីរបស់ អារីយ៉ែល កាស្ត្រូ បាននិយាយថា កូនក្ដីរបស់លោក បានសារទុក្ខពីភាព«គ្មានទោសកំហុស» ទល់​នឹងការចោទប្រកាន់ទាំងនេះ៕

-----------------------------------------------------------------
ដោយ សេក មនោរកុមារ - ប៉ារីស​ ថ្ងៃទី០៧ ខែមិថុនា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ