ម្ចាស់ជើងឯកកំពូលក្របខ័ណ្ឌអ៊ឺរ៉ុបយូហ្វាឆែមពានលីក (UEFA Champios League) ២០១៣ បាយឺន ម៉ូនិជ (Bayern Munich) ពេលនេះបានក្លាយជាម្ចាស់ជើងឯក ក្នុងតារាងហិរញ្ញវត្ថុថែមទៀត បន្ទាប់ពីលោតទៅនៅពីលើក្រុមម៉ែនឆេស្ទើ យូណៃធីត (Manchester United) ក្នុងតម្លៃម៉ាកយីហោរបស់ក្រុម នេះបើតាមសេចក្តីរាយការណ៏មួយ កាលពីពេលថ្មីៗ​នេះ។

ក្រុមបាយឺន ម៉ូនីជ ពេលឈ្នះឆែមពានលីក ជើងឯកអ៊ឺរ៉ុប។

ក្រុមហ៊ុនហិរញ្ញវត្ថុម៉ាកយីហោ បានបង្ហាញឲ្យដឹងថា ក្រុមម្ចាស់ជើងឯកបូដេសលីកា (Bundesliga) អាឡឺម៉ង់ បច្ចុប្បន្ននេះ មានទឹកប្រាក់ប្រមាណ ៦៦៨លានអ៊ឺរ៉ូ ខណៈដែលក្រុមបីសាចក្រហមម៉ែនញូ មាន៦៥០លានដុល្លានោះ។ ហើយពួកគេ​ជឿថា ក្រុមបាល់ទាត់យក្សរបស់អាឡឺម៉ង់មួយនេះ នឹងមានការកើនឡើងជាងនេះទៀត បន្ទាប់ពីឈ្នះឆែមពានលីក​រួច​មក។

នាយកប្រតិបត្តិក្រុមហ៊ុនហិរញ្ញវត្ថុម៉ាកយីហោ លោកដេវីដ ហៃ (David Haigh) បាននិយាយថា «ក្លឹបបាល់ទាត់អាឡឺម៉ង់​ពិតជាពិសេសខ្លាំងណាស់ ព្រោះពួកគេមានការរីកចំរើនយ៉ាងឆាប់រហ័ស ក្នុងរយះពេលពីរបីឆ្នាំចុងក្រោយនេះ។ ហើយ​ទាំងនេះ ដោយសារតែមានទម្រង់ដឹកនាំបានល្អ ហើយក៏ប្រហែលជាប្រសើជាងក្លឹបនៅអង់គ្លេសដែរ។»

គាត់បានបន្តថា «អ្វីៗទាំងអស់នេះ ពួកគេកំពុងធ្វើបានយ៉ាងត្រឹមត្រូវ។ ជាពិសេសក្រុមអ្នកគាំទ្ររបស់ពួកគេ ដែលធ្វើឲ្យ​មានចំណូលខ្ពស់ដោយសារតែការលក់សំបុត្រ ព្រោះពួកគេតែងតែមកទស្សនាផ្ទាល់ ស្ទើរតែពេញកីឡាដ្ឋានគ្រប់ការ​ប្រកួត។»

គួររំឮកថា ក្រុមបាល់ទាត់អាឡឺម៉ង់២ក្រុម ពោលគឺបាយឺន ម៉ូនិជ និងក្រុមបូរ៉ាស្សៀ ដតម័ន (Borussia Dortmund) ដែល​ទើបតែធ្លាក់ឆែមពានលីក វគ្គផ្តាច់ព្រ័ត្រកាលពីសប្តាហ៏មុននោះ ជាក្រុមដែលមានចំនួនអ្នកទស្សនាផ្ទាល់ច្រើនជាងគេ ហើយរៀងរាល់សប្តាហ៏ឲ្យតែក្រុមធំទាំង២នេះប្រកួត នោះកៅអីនៃកីឡាដ្ឋានស្ទើរតែគ្មានចន្លោះមួយឡើយ។

លោកដេវីដ ហៃបានបន្ថែមថា តម្លៃរបស់ក្រុមបាយឺន ម៉ូនិជ នឹងកាន់តែខ្ពស់ជាងនេះទៀត បើសិនជាពួកគេអាចយក​ឈ្នះ​ក្រុមស្តូដហ្គាដ (Stuttgart) បាននៅចុងសប្តាហ៏នេះ ដែលជាការប្រកួតពានរង្វាន់អាឡឺម៉ង់ (German Cup) វគ្គផ្តាច់ព្រ័ត្រ នាថ្ងៃសៅរ៏៕

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី៣០ ខែឧសភា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ