សមាជិកជាច្រើន ក្នុងរដ្ឋាភិបាល​ចេញពីគណបក្សសង្គមនិយម និងកំពុងកាន់អំណាចសព្វថ្ងៃ បានព្យាយាមពន្លត់ភាព តានតឹង កើតឡើងចេញពីមេដឹកនាំគណបក្សសង្គមនិយមខ្លះ ដែលលើកឡើងក្នុងសប្ដាហ៍ចុងក្រោយនេះ ពីភាពចាំបាច់ ក្នុងការប្រឈមមុខទល់នឹងអាឡឺម៉ង់។

ប្រធានាធិបតីបារាំង លោកហ្វ្រង់ស័រ ហូឡង់ កំពុងពន្យល់លោកស្រី អង់ជឺឡា ម៊ែគែល ទេសាភិបាលអាឡឺម៉ង់។

រដ្ឋមន្ត្រីក្រសួងមហាផ្ទៃបារាំង លោកម៉ានុយអែល វ៉ាល (Manuel Valls) បានវាយតម្លៃថា ជាការមិនទទួលខុសត្រូវ នូវការ លើកឡើងរបស់មេដឹកនាំគណបក្សសង្គមនិយមមួយចំនួន ទៅលើភាពចាំបាច់ណាមួយក៏ដោយ ដែលចង់ប្រឈមទល់​នឹងទីក្រុងប៊ែរឡាំង។ ការលើកឡើងពីភាពចាំបាច់នេះ ត្រូវបានបញ្ជាក់អះអាងជាពិសេស ដោយប្រធានសភាជាតិបារាំង​មកពីគណបក្សសង្គមនិយម លោក ក្លូដ បារតូឡូន (Claude Bartolone) ដើម្បីទាមទារអោយមាន កំណែទម្រង់នូវកញ្ចប់​ប្រាក់កម្ចីសេដ្ឋកិច្ចមួយ នៅអ៊ឺរ៉ុប។

លោកមីឆែល សាប៉ាំង (Michel Sapin) រដ្ឋមន្ត្រីក្រសួងការងារ ក៏បានបន្ថែមដែរថា «វានឹងបង្កអោយមានភាពពិបាក​ដ៏ខ្លាំង​មួយ នៃទំនាក់ទំនងជាមួយនឹងប្រទេសយើងទាំងពីរ»។ លោកបានបញ្ជាក់ថា ការប្រើប្រាស់ពាក្យ«ប្រឈមមុខ» ទល់នឹង​អាឡឺម៉ង់ ជារឿងមួយខុសទាំងស្រុង ហើយមិនសមស្របថែមទៀតផង។

និយាយនៅក្នុងបណ្ដាញទូរទេស្សន៍មួយ រដ្ឋមន្ត្រីការងាររូបនេះ បានពន្យល់ថា «វាមិនមែនជារឿងដែលត្រូវទៅប្រឈមមុខ ទល់នឹងប្រទេសមួយនោះទេ ហើយវាក៏កាន់តែមិនត្រូវ ទៅប្រឈមទល់នឹងទេសាភិបាលអាឡឺម៉ង់ លោកស្រីអង់ជឺឡា មែរគែល (Angela Merkel) នោះដែរ។ តែគេត្រូវជួបជជែក ជាមួយនឹងសហគមអ៊ឺរ៉ុបទាំង២៧ប្រទេស មិនមែនគ្រាន់តែ​អាឡឺម៉ង់នោះទេ។ ដំណោះស្រាយនយោបាយដែលល្អបំផុត នៅក្នុងខែឬឆ្នាំខាងមុខ គឺត្រូវធ្វើអ្វីមួយ ជម្រុញឲ្យអ៊ឺរ៉ុប​មាន​កំណើនសេដ្ឋកិច្ចត្រឡប់មកវិញ និងឲ្យអ៊ឺរ៉ុបត្រូវមានរបៀបរបប នៅក្នុងវិស័យហិរញ្ញវត្ថុរបស់ខ្លួន។»

សម្រាប់លោកមីឆែល សាប៉ាំង គេត្រូវការជជែកគ្នាឲ្យម៉ត់ចត់ជាទីបំផុត ជាមួយអាឡឺម៉ង់ តែវាជាការពិភាក្សា សម្រាប់​តម្រង់ទិសដៅ នៃនយោបាយមួយ។ មិនមែនជាការប្រឈមមុខទល់នឹងប្រទេសមួយ ហើយក៏កាន់តែតិចទៅទៀត ការ​ប្រឈមទល់នឹងមនុស្សម្នាក់។ កាលពីថ្ងៃព្រហស្បត្តិ៍ លោកក្លូដ បារតូឡូន បានបង្កភាពតឹងតែងមួយ យ៉ាងដូច្នេះថា «ប្រទេសបារាំងអាចនឹងឈានទៅរក ការប្រឈមមុខទល់នឹងអាឡឺម៉ង់ ដើម្បីយកមកអោយសហគមន៍អ៊ឺរ៉ុប នូវការជម្រុះ​ចោលនៃនយោបាយតឹងតែង និងត្បិតត្បៀត សម្រាប់ សមាជិករបស់ខ្លួន នៅក្នុងបរិបទនៃវិបត្តិសេដ្ឋកិច្ចសព្វថ្ងៃ»។

គណបក្សសង្គមនិយមរបស់បារាំង បានចោទលោកស្រីអង់ជឺឡា ម៉ែរគែលថា បានបង្កើតភាពរឹតត្បិត តាមបែបអាត្មានិយម នៅលើប្រធានបទនេះ។ ភាពតានតឹងនេះ បានបង្ខំអោយនាយករដ្ឋមន្ត្រីបារាំង លោកហ្សង់ម៉ាក់ អារ៉ូល៍ (Jean-Marc Ayrault) ចូលអន្តរាគមន៍ តាមរយៈសំណេរចំនួនពីរក្នុងបណ្ដាសង្គមទ្វីសធើរ (Twitter) ក្នុងបំណងលប់បំបាត់ចោល នូវ​ពាក្យសម្ដីដ៏«គ្រោតគ្រាត»ទាំងនេះ និងបានការពារនូវគំនិតទាំងឡាយ ដែលឈានទៅរកការពិភាក្សាគ្នាមួយស្វិតស្វាញ តែស្និតស្នាល រវាងទីក្រុងប៉ារីស និងទីក្រុងប៊ែរឡាំង៕

-----------------------------------------------------
ដោយ សេក មនោរកុមារ - ប៉ារីស​ ថ្ងៃទី២៨ ខែមេសា ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ