Posts in ‘បច្ចុប្បន្នភាពក្នុងលោក’ Category

ប្រធានចលនាសង្គ្រោះជាតិ លោក សម រង្ស៊ី បានទម្លាយ​នៅក្នុងអត្ថបទ «ដំណឹងខ្លីៗ» ដែលត្រូវបានលោកបង្ហោះ នៅលើបណ្ដាញសង្គម កាលពីមុននេះ ឲ្យដឹងថា «ព្រះមហាក្សត្រ មិនយាងទៅបើកសម័យប្រជុំរដ្ឋសភាពេញអង្គ នៅដើមខែកញ្ញា នេះទេ»។ មេដឹកនាំប្រឆាំង ដ៏លេចធ្លោរបស់កម្ពុជា មិនបានបញ្ជាក់​ពីអំណះអំណាងយ៉ាងណាទេ តែគ្រាន់តែពន្យល់ថា នោះគឺដោយសារតែ «ព្រះរាជបញ្ញា​ឈ្វេងយល់» របស់ព្រះមហាក្សត្រ។

លោក សម រង្ស៊ី បានសរសេរថា៖ «ព្រះអង្គ ប្រហែលជាយល់ឃើញថា ប្រជារាស្ត្រខ្មែរ និងសាធារណមតិ ស្ទើរទូទាំងពិភពលោក ច្បាស់ជាថ្កោលទោសព្រះអង្គយ៉ាងធ្ងន់ធ្ងរ បើព្រះអង្គយល់ព្រមយាង ទៅបើកសម័យប្រជុំរដ្ឋសភាពេញអង្គ ជាត្លុកកំប្លែង នៅដើមខែកញ្ញាខាងមុខនេះ ព្រះមហាក្សត្រ ព្រះបាទព្រះបរមនាថ នរោត្តម សីហមុនី ហាក់ដូចជាព្រះអង្គប្រញ៉ាប់ប្រញ៉ាល់ យាងចេញពីប្រទេសកម្ពុជា ឲ្យបានមុនចុងខែសីហានេះ ដើម្បីទៅពិនិត្យសុខភាព នៅប្រទេសចិន»។

[...]

មិនមែនលោក សម រង្ស៊ី ប្រធានចលនាសង្គ្រោះជាតិ មិនតបតរ ទៅនឹងការចាប់បង្ខំឲ្យស្បថ កាលពីដើមសប្ដាហ៍នេះ ពីសំណាក់លោក ហ៊ុន សែន នាយករដ្ឋមន្ត្រីផុតអាណត្តិនោះទេ។ ប៉ុន្តែមេដឹកនាំប្រឆាំង ត្រូវការពេលរហូតដល់ទៅ៤ថ្ងៃ ដើម្បីឆ្លើយតប ដោយវាយប្រហារត្រឡប់ទៅវិញ ខ្លាំងៗ ហៅលោក ហ៊ុន សែន ដែលបង្ខំគេឯងឲ្យស្បថ ថាជាមនុស្សអវិជ្ជា ទាល់ច្រក និងមិនទទួលខុសត្រូវ។

នៅចំពោះការបបួលស្បថ ដែលប្រែក្លាយ ជាការបង្ខំឲ្យស្បថ ពីសំណាក់លោក ហ៊ុន សែន នាយករដ្ឋមន្ត្រីផុតអាណត្តិកម្ពុជា លោក សម រង្ស៊ី បានវាយបកវិញ យ៉ាងចាស់ដៃ។ មេដឹកនាំប្រឆាំង ដ៏លេចធ្លោរបស់កម្ពុជា មិនត្រឹមតែមិនឆ្លើយតប ចូលរួមស្បថជាមួយលោក ហ៊ុន សែន ទេ តែលោកបានហៅបុរសខ្លាំងកម្ពុជា ដែល​«បបួលគេឯងស្បថស្បែ ពីរឿងប្រទេសជាតិ»​ដូច្នេះ ថាជាមនុស្ស«អវិជ្ជា ទាល់ច្រក និងមិនទទួលខុសត្រូវ»។

ប្រធានចលនាសង្គ្រោះជាតិ ដែលគេដឹងថា កំពុងមានវត្តមាន​ក្នុង​ភាគខាងត្បូង​ប្រទេសបារាំង [...]

«ដោយសារតែ សម រង្ស៊ី ជាបន្លាធំជាងគេ ក្នុងភ្នែកគាត់ ហ៊ុន សែន កំពុងជួលឃាតករបរទេស ឲ្យប៉ុនប៉ងសម្លាប់ សម រង្ស៊ី នៅប្រទេសបារាំង» នេះ ជាការលើកឡើងដ៏គួរឲ្យភ្ញាក់ផ្អើល របស់លោក សម រង្ស៊ី នៅក្នុងអត្ថបទបង្ហោះនៅលើបណ្ដាញសង្គម ដែលមេដឹកនាំប្រឆាំងរូបនេះហៅថា ជា«ដំណឹងខ្លីៗ»។

ប្រធានចលនាសង្គ្រោះជាតិ ដែលកំពុងនិរទេសខ្លួន នៅក្រៅប្រទេសកម្ពុជា ដើម្បីបញ្ជៀសពីការចាប់ខ្លួន ដោយអាជ្ញាធររដ្ឋាភិបាលលោក ហ៊ុន សែន នោះ បានពន្យល់នៅក្នុងអត្ថបទបង្ហោះនោះថា៖ «កាលពី ៤-៥ ខែមុន ហ៊ុន សែន បាននិយាយជាសាធារណៈថា គាត់នឹងបញ្ជូនភ្នាក់ងារសម្ងាត់របស់គាត់ ឲ្យទៅចាប់ សម រង្ស៊ី នៅឯបរទេស ហើយបញ្ជូន សម រង្ស៊ី ទាំងបង្ខំ និងទាំងលួចលាក់ ទៅប្រទេសកម្ពុជា។ តែឥឡូវនេះ ដោយសារតែគាត់ ជួបភាពទាល់ច្រកនយោបាយ រកដំណោះស្រាយមិនចេញ ទើប ហ៊ុន សែន សម្រេចជួលឃាតករ ឲ្យសម្លាប់ សម រង្ស៊ី តែម្តង។»។

លោក សម រង្ស៊ី បានបន្តឲ្យដឹងទៀតថា៖ [...]

មានចង្វាក់ជាច្រើន ដែលលោក ផៃ ស៊ីផាន អ្នកនាំពាក្យ និងជារដ្ឋលេខាធិការ ទីស្ដីការគណៈរដ្ឋមន្ត្រី ត្រូវលោតរាំ ក្នុងការឆ្លើយតប​នឹងការថ្លែងឡើង របស់មន្ត្រីផ្លូវការ នៃរដ្ឋាភិបាលសហរដ្ឋអាមេរិក និងប្រទេសធំៗជាច្រើនទៀត ជុំវិញការបោះឆ្នោតជាតិ នីតិកាលទី៦ នៅកម្ពុជា។ ហើយចង្វាក់រាំទាំងនោះ អាចខុសគ្នាទាំងស្រុង រហូតមានកម្រិត ១៨០ឌឺក្រេ ដែលហាក់ដូចជាភាពខុសគ្នា រវាងចង្វាក់រាំក្បាច់ និងចង្វាក់រាំឡាំលាវ។

ប្រតិកម្មភ្លាមៗ របស់រដ្ឋាភិបាល​សហរដ្ឋអាមេរិក ក្នុងថ្ងៃតែមួយនៃការបោះឆ្នោតជាតិ ថ្ងៃទី២៩ ខែកក្កដា បានជំរុញឲ្យមន្ត្រីអ្នកនាំពាក្យ រដ្ឋាភិបាលកម្ពុជា លោក ផៃ ស៊ីផាន ចាំបាច់​ត្រូវចេញមុខ​ឆ្លើយតប។ នោះគឺការប្រកាសទាត់ចោលទាំងស្រុង នូវប្រតិកម្មរបស់រដ្ឋាភិបាលអាមេរិក ដោយភ្ជាប់ការទាត់ចោលនោះ ទៅនឹងភាសាហៅរដ្ឋាភិបាលអាមេរិក ថាជា «បរទេស ដែលជាអតីតអាណានិគម មកលើកម្ពុជា ក៏ដូចជាក្រុមដែលតាំងខ្លួន ជាពូជសាសន៍ ដែលមានឧត្តមភាព [...]