អ.ស.ប ផ្នែកសិទ្ធិមនុស្សជំរុញឲ្យ ហ៊ុន សែន ចរចាជាមួយបក្សប្រឆាំង
«ដោយសារថា ឥឡូវនេះលទ្ធផលជាផ្លូវការ នៃការបោះឆ្នោតជាតិ ត្រូវបានប្រកាសកាលពីថ្ងៃពុធ យើងសូមអំពាវនាវ ដល់រដ្ឋាភិបាលកម្ពុជា ឲ្យបង្កើតបរិយាកាសមួយ សម្រាប់ការជជែក ពិភាក្សានយោបាយមួយ បើកចំហ និងមានលក្ខណៈបរិយាបន្ន ដែលអនុញ្ញាត ឲ្យសម្លេងទាំងអស់ នៅកម្ពុជា ត្រូវបានគេស្តាប់ដឹងឮ» នេះ ជាការអះអាងឡើង របស់អ្នកស្រី រ៉ាវីណា សាមដាសានី (Ravina Shamdasani) អ្នកនាំពាក្យរបស់ស្នងការជាន់ខ្ពស់ របស់អង្គការសហប្រជាជាតិ ទទួលបន្ទុកខាងសិទ្ធិមនុស្ស។
នៅក្នុងសេចក្ដីថ្លែងការណ៍មួយ ដែលធ្វើចេញ ពីទីស្នាក់ការកណ្ដាល របស់ស្ថាប័នពិភពលោកនេះ នៅក្រុងហ្សឺណែវ ប្រទេសស្វីស ក្នុងថ្ងៃសុក្រទី១៧ ខែសីហានេះ អ្នកនាំពាក្យរូបនេះ បានសំដែងនូវ«កង្វល់ អំពីបរិយាកាសសិទ្ធិមនុស្ស ជុំវិញការបោះឆ្នោត ដែលបានប្រព្រឹត្តទៅ កាលពីពេលថ្មីៗនេះ នៅ ប្រទេសកម្ពុជា ដោយមិនមានការចូលរួម ពីគណបក្សប្រឆាំងមួយដ៏សំខាន់ ដែលត្រូវបានរំលាយ [...]
