Posts in ‘គ្រប់អត្ថបទជាខេមរភាសា’ Category

រូបថតជាច្រើនសន្លឹក បង្ហាញពីការបែកធ្លាយ​កញ្ចក់រថយន្ដ​ ត្រូវបានបង្ហោះ នៅលើគណនីហ្វេសប៊ុក របស់​លោក ស៊ន តារា នៅព្រឹកថ្ងៃទី១០ ខែកញ្ញានេះ ជាមួយនឹងសំណេរប្រាប់ឲ្យដឹងដូច្នេះថា៖ «វេលាម៉ោង៩ និង​៤៥នាទី​នេះ មានជនមិនស្គាល់មុខ ជិះតាមអែបខ្ញុំ (រួច)"វ៉ៃ"កញ្ចក់ឡានខ្ញុំ (មុននឹង)គេចខ្លួនបាត់»។

លោក ស៊ន តារា ដែលគេស្គាល់ថា ជាសកម្មជន​គាំទ្រគណបក្សសង្គ្រោះជាតិ ដ៏លេចធ្លោ​មួយរូប បានអះអាង​បន្ថែម នៅក្នុងវីដេអូមួយ (ខាងក្រោម) ថាហេតុការណ៍នេះ បានកើតឡើង នៅតាមបណ្ដាយផ្លូវលេខ៣៧១ ក្នុង​សង្កាត់ ផ្សាដើមថ្កូវ ខណ្ឌចំការមន នៅខណៈ​ពេលលោក បើករថយន្ដចេញពីផ្ទះ ឆ្ពោះមកកាន់ទីស្នាក់ការ​គណបក្ស។ ពេលមកដល់​ចំណុច​កើតហេតុ ជនដៃដល់បានជិះម៉ូតូ មកអែបក្បែររថយន្ដលោក ហើយទំនងជា​បាន​ប្រើ​ដែករឹង​ ឬកាំភ្លើង ក្នុងការវាយបំបែក​​កញ្ចក់​រថយន្ដ របស់​លោក។

សកម្មជនគណបក្សប្រឆាំងរូបនេះ ចាត់ទុកទង្វើនេះ ជាការគម្រាមកំហែងមួយដ៏ធ្ងន់ធ្ងរ [...]

«ការអនុវត្តនីតិវិធី​របស់តុលាការ ទទួលបានជោគជ័យ ជាមួយនឹងភាពរលូន ប្រសិទ្ធិភាព ចំពោះ​ការ​វិនិច្ឆ័យ​លើ​ករណី​របស់ ឯកឧត្តម កឹម សុខា ដែលលោកបានបោះបង់សិទ្ធិ ដោយស័្មគ្រចិត្ត និងបំពានចំពោះច្បាប់ ដែល​ជា​កាតព្វកិច្ចរាល់ជនគ្រប់រូប» នេះជាឃ្លាមួយ ពីក្នុងចំណោមសំណេរ ដ៏វែងអន្លាយមួយ របស់លោក ផៃ ស៊ីផាន អ្នក​នាំ​ពាក្យ​ទីស្ដីការគណៈរដ្ឋមន្ត្រី ដើម្បីអបអរសាទរ​ទៅដល់សាលក្រម របស់សាលាដំបូងរាជធានី ដែល​បាន​សម្រេច​ផ្ដន្ទាទោសលោក កឹម សុខា អនុប្រធាន (សព្វថ្ងៃជាប្រធាន) គណបក្សសង្គ្រោះជាតិ កាលពី​រសៀល​ថ្ងៃ​ទី៩ ខែកញ្ញានេះ ឲ្យជាប់ពន្ធនាគារ ៥ខែ និងពិន័យជាប្រាក់ ៨សែនរៀល។

ចៅក្រមជំនុំជម្រះក្ដី លោក កែវ មុនី បានចេញសាលក្រម ផ្ដន្ទាទោសលោក កឹម សុខា ដូច្នេះ តាមមាត្រា៥៣៨ នៃក្រមព្រហ្មទណ្ ពីបទ«បដិសេធការចូលខ្លួន» ទៅតាមការកោះហៅ របស់ចៅក្រមស៊ើបសួរ តាមរយៈដីកា​ម្ដង​ជា​ពីរ​ដង កាលពីខែឧសភា។ សវនាការកាលពីពេលព្រឹក [...]

ដំណឹងមរណភាព របស់លោក មិន ឃិន ទេសរដ្ឋមន្ត្រី​ទទួល​​បន្ទុក​​បេសកកម្ម​ពិសេស និងជាអតីត​រដ្ឋ​មន្ត្រី​ក្រសួង​ធម្មការ និងសាសនា មានពីរដំណាក់កាល​ខុសគ្នា ខណៈដំណាក់ទីមួយ ត្រូវ​បាន​ច្រាន​ចោល ដោយ​ក្រុម​គ្រួសារ​របស់លោក មិន ឃិន ដោយផ្ទាល់។

កាលពីថ្ងៃទី៨ ខែកញ្ញាម្សិលម៉ិញ មន្ត្រី​ទទួលខុសត្រូវ​ជាច្រើននាក់ រួមនឹងសារព័ត៌មាន ដែលស្និតនឹង​រដ្ឋាភិបាល​ផង បានអះអាងព្រោងព្រាត ពីមរណភាពរបស់លោក មិន ឃិន ថាបានលាចាកលោក នៅ​វេលា​ម៉ោង​៩ព្រឹក (ម្សិលម៉ិញ)។ ផ្ទុយទៅវិញ ក្រុមគ្រួសាររបស់លោកឯណេះ បាននិយាយថា មន្ត្រីជាន់​ខ្ពស់របស់រដ្ឋាភិបាល និង​របស់គណបក្សប្រជាជនកម្ពុជារូបនេះ នៅមានជីវិតនៅឡើយ ហើយកំពុងស្ថិត​ក្រោម​ការ​ព្យាបាល ពីក្រុម​គ្រូ​ពេទ្យ​ជំនាញ។

លោក មិន ម៉ាដេត កូនប្រុសច្បងរបស់លោក មិន ឃិន បានថ្លែងបដិសេធ ពីមរណភាពរបស់ឪពុកលោក ប្រាប់​សារព័ត៌មានភ្នំពេញប៉ុស្ដ៍ ថាលោកមានការភ្ញាក់ផ្អើល និងសោកស្ដាយ ចំពោះពត៌មាននេះ។ [...]

ប្រតិកម្មជាផ្លូវការ ទាក់ទងនឹងសាលក្រម របស់សាលាដំបូងរាជធានី ដែលសម្រេចផ្ដន្ទាទោសលោក កឹម សុខា ឲ្យជាប់ពន្ធនាគារ៥ខែ និងពិន័យជាប្រាក់ ៨សែនរៀល បានធ្លាក់មកដល់ហើយ។ នេះបើតាមសេចក្ដី​ថ្លែង​ការណ៍​មួយ របស់​គណបក្សប្រឆាំង ដែលទស្សនាវដ្ដីមនោរម្យ.អាំងហ្វូនឹងទទួលបាន នៅមុននេះបន្តិច។

សេចក្ដីថ្លែងការណ៍នោះ បានបញ្ជាក់ថា គណបក្សសង្គ្រោះជាតិទទួលយកមិនបាន នូវសាលក្រមខាងលើ ហើយ​នៅតែបន្តការតស៊ូដោយសន្តិវិធី ដើម្បីទាមទារឲ្យទម្លាក់ចោល នូវការចោទប្រកាន់ មកលើ«លោក កឹម សុខា សកម្មជន និងថ្នាក់ដឹកនាំគណបក្សសង្គ្រោះជាតិដទៃទៀត ព្រមទាំងមន្ត្រីអង្គការសង្គមស៊ីវិល និង​មន្ត្រី​គណៈ​កម្មាធិការ​ជាតិ​រៀបចំការបោះឆ្នោត»។

គណបក្សប្រឆាំងបានចាត់ទុកសាលក្រម របស់សាលាដំបូង ថាធ្វើឡើងក្រោមសម្ពាធនយោបាយ នៃ​គណបក្ស​កាន់អំណាច ហើយបានព្រមានថា គណបក្សនឹងប្រើប្រាស់សិទ្ធ «ធ្វើមហាបាតុកម្ម​​ដោយ​អហិង្សា» [...]

សាល​ក្រម​ទើប​នឹង​ធ្លាក់មកដល់ ក្នុងពេលមុននេះបន្តិច។ ជាសាលក្រម ដែលប្រកាសដោយលោក កែវ មុនី ចៅក្រមកាត់​សេចក្ដី របស់សាលាដំបូង​រាជធានីភ្នំពេញ។ អនុប្រធាន (សព្វថ្ងៃជាប្រធានស្ដីទី) គណបក្ស​សង្គ្រោះ​ជាតិ លោក កឹម សុខា ត្រូវបានចៅក្រមរូបនេះ សម្រេចផ្ដន្ទាទោស ឲ្យជាប់ពន្ធនាគារចំនួន៥ខែ និង​ត្រូវ​ពិន័យ​​ជា​​ប្រាក់ ចំនួន៨សែនរៀល តាមមាត្រា៥៣៨ នៃក្រមព្រហ្មទណ្ឌ ពីបទ«បដិសេធការចូលខ្លួន»។

សវនាការនៃសាលាដំបូងរាជធានី ក្នុងនៅព្រឹកថ្ងៃសុក្រនេះ មិនមានវត្តមាន របស់លោក កឹម សុខា និង​មេធាវី​ទាំង​៤រូប របស់លោកទេ។ ក្រុមមេធាវីរបស់លោក កឹម សុខា បានសំអាងមូលហេតុថា ការជំនុំជម្រះនេះ ធ្វើ​ឡើង​ដោយ​ខុស​នីតិវិធីច្បាប់ ខណៈលោក កឹម សុខា នៅមានអភ័យឯកសិទ្ធិសភានៅឡើយ។

លោក កឹម សុខា បានបដិសេធការចូលខ្លួន តាមការកោះរបស់ចៅក្រមស៊ើបអង្កេត ដែលបានចេញដីកា​កោះ​ហៅ​លោក ទៅបំភ្លឺក្នុងនាមជាសាក្សី កាលពីជិត៤ខែមុន ដោយមូលហេតុថាលោក [...]