អ៊ឺរ៉ូ២០១៦៖ ជន«បាតផ្សារ» មកគាំទ្របាល់ទាត់!
បន្ទាប់ពីផ្ទុះអំពើហិង្សា នៅមុនការប្រកួតរវាង ក្រុមបាល់ទាត់ជម្រើសជាតិអង់គ្លេស និងក្រុមរ៉ូស្ស៊ី នាទីក្រុងម៉ារសីយ៍ (Marseille) ភាគខាងត្បូងបារាំង កាលពីយប់ថ្ងៃសៅរ៍នោះរួច បណ្ដាញផ្សព្វផ្សាយជាច្រើននៅអ៊ឺរ៉ុប បានព្រួតគ្នាចេញផ្សាយពីហេតុការណ៍ ដ៏គួរឲ្យសោកស្ដាយនេះ និងបានហៅទង្វើរបស់ក្រុមអ្នកគាំទ្រ ថាជាការខ្មាសអៀនមួយ ដែលមិនត្រូវឲ្យមាន នៅក្នុងពិភពបាល់ទាត់ឡើយ។
សារព័ត៌មានដែលចេញផ្សាយ ដោយប្រើពាក្យសម្ដី«ឆៅ»ខ្លាំងជាងគេ គឺសារព័ត៌មានអង់គ្លេស «The Sun»។ សារព័ត៌មាននេះ បានហៅអ្នកគាំទ្រជាតិរ៉ូស្ស៊ី ថាជា«ក្រុមឆ្លៀតឱកាសបង្ករឿង និងក្រុមបាតផ្សារ» ដែលក្នុងនោះមានមនុស្សមួយចំនួន មានប្រដាប់ដោយកាំបិត។ ចំណែកឯសារព័ត៌មានអាល្លឺម៉ង់ «Bild» វិញ បានលើកយកហេតុការណ៍ផ្ទុះអំពើហិង្សា នៅក្នុងកីឡាដ្ឋាន «Vélodrome» របស់ក្រុង ម៉ារសីយ៍ មកសរសេរ ដោយដាក់ជាចំណងជើងធំៗថា៖ «ក្រុមអ្នកបំផ្លាញជាតិរ៉ូស្ស៊ី បើកការវាយប្រហារ [...]
