សភាអ៊ឺរ៉ុបអនុម័តដំណោះស្រាយ១៣ចំណុច ប្រឆាំងរបប ហ៊ុន សែន
ដូចប្រិយមិត្តអ្នកអាន បានជ្រាបនៅក្នុងអត្ថបទ ចេញផ្សាយមុនៗហើយ ថាសភាសហភាពអ៊ឺរ៉ុប បានបើកសម័យប្រជុំពេញអង្គ លើកទី៣៩ របស់ខ្លួន ដោយយកវិបត្តិនយោបាយ នៅក្នុងប្រទេសកម្ពុជា មកជជែកដេញដោល ជាលក្ខណៈ«បន្ទាន់» មុននឹងស្ថាប័ននីតិបញ្ញត្តិ របស់សហភាពអ៊ឺរ៉ុបមួយនេះ បោះឆ្នោតអនុម័ត សម្រេចយក «ដំណោះស្រាយ» មួយ ដែលមាន១៣ចំណុច ពិសេសជាងដំណោះស្រាយ រាល់ដងកន្លងមក សម្រាប់ដាក់ជូន ទៅគ្រប់ភាគីពាក់ព័ន្ធទាំងអស់។
ដំណោះស្រាយអនុម័តរួច ដែលចេញពីសេចក្ដីស្នើ លេខ «RC-B8-0366/2018» គឺជាការរួមបញ្ចូលគ្នា រវាងញត្តិស្នើដំណោះស្រាយជាច្រើន ដែលត្រូវបានដាក់ចូលមកសភាអ៊ឺរ៉ុប តាំងពីដើមសប្ដាហ៍នេះមក ដោយក្រុមតំណាងរាស្ត្រអ៊ឺរ៉ុប ពីច្រើនគណបក្សនយោបាយ និងច្រើនប្រទេស ដែលជាសមាជិករបស់សហភាពអ៊ឺរ៉ុប។ ដំណោះស្រាយនេះ ត្រូវបានសរសេរគ្រប់ភាសា (លើកលែងតែភាសាដើម នៃជនជាតិអៀឡង់) ដែលសហភាពអ៊ឺរ៉ុបប្រើប្រាស់ នៅក្នុងស្ថាប័នរបស់ផងខ្លួន។
[...]
