សួន សេរីរដ្ឋា ថ្កោលទោសការផ្ដល់ភាពស្របច្បាប់ ដល់ជនជាតិយួន
អ្នកណាក៏ដោយ ដែលហ៊ានផ្ដល់សិទ្ធិស្របច្បាប់ ឲ្យដល់ជនជាតិយួន ដែលរស់នៅក្នុងប្រទេសកម្ពុជានោះ អ្នកនោះជាជន«ក្បត់ជាតិ»។ នេះ បើតាមសេចក្ដីប្រកាស របស់លោក សួន សេរីរដ្ឋា ប្រធានគណបក្សអំណាចខ្មែរ នៅក្នុងសំណេរមួយ លើទំព័រហ្វេសប៊ុករបស់លោក។
សំណេររបស់ប្រធានគណបក្សអំណាចខ្មែរ បានធ្វើឡើងនៅថ្ងៃចុងបញ្ចប់ នៃដំណើរទស្សនកិច្ចរបស់ប្រធានរដ្ឋវៀតណាម លោក ត្រាន់ ដាយក្វាង (TRAN DAI QUANG) នៅក្នុងប្រទេសកម្ពុជា ជាមួយនឹងការចូលជួបឥស្សរជននយោបាយ និងសាសនារបស់កម្ពុជា ជាច្រើននាក់/អង្គ។
សារដែលលោក សួន សេរីរដ្ឋា បានបង្ហោះនៅថ្ងៃទី១៦ ខែមិថុនានេះ បានថ្កោលទោស «ជនណា អ្នកនយោបាយណា និងរដ្ឋាភិបាល ដែលដឹកនាំដោយបក្សណាក៏ដោយ បើហ៊ានបំពានរំលោភស្មារតីជាតិនិយម របស់ពលរដ្ឋខ្មែរ ហើយហ៊ានទទួលស្គាល់ផ្តល់សិទ្ធិស្របច្បាប់ ឲ្យជនជាតិយួនរស់នៅក្នុងស្រុកខ្មែរ ជាស្របច្បាប់នោះ ពួកគេជាជនក្បត់ជាតិ ជាអ្នកនយោបាយក្បត់ជាតិ [...]
