តារាឆ្នើមរបស់ក្រុមមាន់គកបារាំង ខកចិត្តយ៉ាងខ្លាំងបន្ទាប់ពី​ បរាជ័យក្រុមអេស្ប៉ាញ ១-០ ក្នុងការប្រកួតជំរុះ​បាល់ទាត់​ពិភពលោក នាកីឡាដ្ឋាន ស្តាដដឺហ្រ្វង់ (Stade de France) កាលពីយប់ថ្ងៃអង្គារ៏កន្លងទៅ។ ផិដ្រូ(Pedro) ជាអ្នករកគ្រាប់​បាល់បញ្ចូលទី បានចំនួនតែ១គ្រាប់គត់ ក្នុងរាត្រីនោះ តែក៏ជាគ្រាប់បាល់ ដែលជួយឲ្យអេស្ប៉ាញទទួលបានជ័យជំនះ។

ការីម បិនស្ស៊ីម៉ា (ពាក់អាវខៀវ) កំពុងទាត់បាល់ព័ទ្ធជុំដោយ កីឡាកររបស់អេស្ប៉ាញ។

ខ្សែប្រយុទ្ធក្រុមជម្រើសជាតិបារាំង ការីម បិនស្ស៊ីម៉ា (Karim Benzema) មកពីក្រុមអធិរាជស រៀលម៉ាឌ្រីដ (Real Madrid) បាននិយាយថា ក្រុមរបស់គាត់មិនគួរចាញ់ ក្នុងការប្រកួតជំរុះបាល់ទាត់ពិភពលោក ជាមួយនឹងក្រុមជម្រើសជាតិ​អេស្ប៉ាញ​នោះទេ។

ក្រុមគោជល់អេស្ប៉ាញ បានទទួលជ័យជំនះ ១-០ នៅក្នុងទីក្រុងប៉ារីស ដែលជាគ្រាប់បាល់របស់ ខ្សែប្រយុទ្ធក្រុម​បាសេឡូណា (Barcelona) ផិដ្រូ។ កីឡាកររូបនេះ រកគ្រាប់បាល់បានសម្រេច បន្ទាប់ពីការបញ្ជូនបាល់ ដោយកីឡាករ​ខ្សែ​ការពារឆ្វេង ដែលលេងឲ្យក្រុមអាសិណល (Arsenal) ណាចូ ម៉ន់រៀល (Nacho Monreal) នៅនាទី៥៨។

បិនស្ស៊ិម៉ា បានប្រាប់ដល់កាសែតរបស់បារាំង ធីអេហ្វវ័ន (TF1) ថា «យើងទាំងអស់គ្នាពិតជា ខកចិត្តខ្លាំងណាស់ បើយើង​សំឡឹងទៅមើលការប្រកួតទាំងមូល យើងមិនគួរណាចាញ់ទេ។ យើងមានឱកាសល្អៗ ច្រើនជាងពួកគេ ប៉ុន្តែយើងធ្វើ​មិន​បានសម្រេច។ យើងធ្វើឲ្យមានកំហុស ហើយយើងក៏ទទួលស្គាល់ចំពោះកំហុសឆ្គងនេះ។»

គួររំឮកថា បិនស្ស៊ីម៉ា ជាខ្សែប្រយុទ្ធឆ្នើមរបស់ក្រុមរៀលម៉ាឌ្រីដ ប្រទេសអេស្ប៉ាញ ហើយគាត់តែងតែរកគ្រាប់​បាល់​ឲ្យ​ក្រុមអធិរាជស បានជាញឹកញាប់។ ប៉ុន្តែនៅក្នុងក្រុមជម្រើសជាតិបារាំងវិញ កីឡាករវ័យ ២៥ឆ្នាំរូបនេះ មិនដែលរកគ្រាប់​បាល់ចូលទីបានទេ ក្នុងការប្រកួត ១២លើកចុងក្រោយ។

អតីតខ្សែប្រយុទ្ធរបស់ក្រុម អូឡាំពិក លីយ៉ុង (Olympique Lyon) រូបនេះ ក៏បាននិយាយទៅកាន់អ្នកគាំទ្រ ក្រុមជម្រើស​ជាតិបារាំងទាំងអស់ ដែលប្រតិកម្មចំពោះទម្រង់លេងរបស់គាត់ដែរ។

គាត់បាននិយាយថា «អ្នកទាំងអស់គ្នា គួរផ្តល់កម្លាំងចិត្តដល់ខ្ញុំ វាប្រសើជាងការបន្ទោស។ ខ្ញុំគិតថា ខ្ញុំលេងបានធម្មតា ហើយខ្ញុំជឿជាក់ថា ខ្ញុំនឹងរកគ្រាប់បាល់បាន។ ប៉ុន្តែអ្វីដែលសំខាន់នោះ ខ្ញុំគិតដល់ក្រុមទាំងមូល ធ្វើយ៉ាងណា ឲ្យក្រុម​ទទួលបានជ័យជំនះសិន។»

គ្រូបង្វឹកក្រុមជម្រើសជាតិបារាំង លោក ដេឌីយ៉េ ដេសឆេមផ៏ (Didier Deschamps) ក៏បានទទួលស្គាល់​ចំពោះលទ្ធផល​បរាជ័យនេះដែរ ប៉ុន្តែគាត់នៅតែនិយាយថា ក្រុមរបស់គាត់គួរតែ មានគ្រាប់បាល់បញ្ចូលទី ក្នុងការប្រកួតនោះ។

បុរសវ័យ ៤៤ឆ្នាំរូបនេះ បាននិយាយថា «មានសកម្មភាពជាច្រើន ដែលយើងមិនពេញចិត្ត។ ប៉ុន្តែពួកយើងមានឱកាស ច្រើន ទោះបីជាសល់គ្នាត្រឹមតែ ១០នាក់ក៏ដោយ។ អេស្ប៉ាញ នៅតែជាអេស្ប៉ាញ។ យើងព្យាយាមរកគ្រាប់បាល់ តែពួក​គេមិនធ្វេសប្រហែសទេ ទោះបីដឹងថា យើងសល់គ្នាត្រឹម ១០នាក់ ក៏គេនៅតែមានការប្រុងប្រយ័ត្នជានិច្ចដែរ៕»

----------------------------------------------------
ដោយ៖ វិន ជីវ័ន្ត - ភ្នំពេញ ថ្ងៃទី២៧ ខែមិនា ឆ្នាំ២០១៣
រក្សាសិទ្ធិគ្រប់យ៉ាងដោយ៖ មនោរម្យព័ងអាំងហ្វូ