ហ៊ុន ជា ក្មួយ​ប្រុស​នាយក​រដ្ឋ​មន្ត្រី ឡើង​«ផ្កាយ​បី»

លោក ហ៊ុន ជា ដែលមានឋានន្តរស័ក្ដិ ជាឧត្ដមសេនីយ៍ទោ និងជាក្មួយប្រុសបង្កើត របស់លោកនាយករដ្ឋមន្ត្រី ហ៊ុន សែន ត្រូវបានដំឡើងស័ក្ដិបន្ថែម ឲ្យក្លាយជាឧត្ដមសេនីយ៍​ឯក (ផ្កាយបី)។ នេះ បើតាមព្រះរាជ្យក្រឹត្យ ចុះព្រះហស្ថលេខា នៅថ្ងៃទី៣០ ខែធ្នូ កន្លងទៅ ដោយព្រះមហាក្សត្រកម្ពុជា តែទើបនឹងធ្លាក់មកដៃអ្នកសារព័ត៌មាន នៅថ្ងៃនេះ។
ហ៊ុន ជា ក្មួយ​ប្រុស​នាយក​រដ្ឋ​មន្ត្រី ឡើង​«ផ្កាយ​បី»
លោកនាយករដ្ឋមន្ត្រី ហ៊ុន សែន (ខាងមុខបំផុត) និងមន្ត្រីជាន់ខ្ពស់ជំនិតៗរបស់លោក។ (រូបថត Global Witness)
Loading...
  • ដោយ: មនោរម្យ.អាំងហ្វូ ([email protected]) - ភ្នំពេញ ថ្ងៃទី០២ មករា ២០១៨
  • កែប្រែចុងក្រោយ: January 02, 2018
  • ប្រធានបទ: នយោបាយខ្មែរ
  • អត្ថបទ: មានបញ្ហា?
  • មតិ-យោបល់

ក្រុមគ្រួសារសែស្រឡាយ របស់លោកនាយករដ្ឋមន្ត្រី ហ៊ុន សែន បានឡើងស័ក្ដិទៀត នៅថ្ងៃនេះ។ បន្ទាប់ពីកូនប្រុសបង្កើត ដែលត្រូវបានដំឡើង ឲ្យក្លាយជាឧត្ដមសេនីយ៍ឯក (ផ្កាយបី) កាលពីដើមខែតុលាកន្លងទៅ នៅចុងឆ្នាំ២០១៧នេះ ក្មួយប្រុសបង្កើត​របស់លោក ហ៊ុន សែន ក៏ត្រូវបានលោកនាយករដ្ឋមន្ត្រី ទូលថ្វាយព្រះមហាក្សត្រ ឲ្យបានពាក់ផ្កាយបីដូចគ្នាដែរ។

ព្រះរាជ្យក្រឹត្យរបស់សម្តេចព្រះបាទ ព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដែលទ្រង់បានចុះព្រហស្ថលេខា កាលពីថ្ងៃទី៣០ ខែធ្នូ ឆ្នាំ២០១៧ បានដំឡើងឋានន្តរស័ក្តិ លោកឧត្តមសេនីយ៍ទោ (ផ្កាយពីរ) ហ៊ុន ជា ឲ្យក្លាយជាឧត្តមសេនីយ៍ឯក (ផ្កាយបី)។ ឋានន្តរស័ក្ដិនេះ ជាផ្កាយមួយបន្ថែមទៀត បន្ទាប់ពីលោក ហ៊ុន សែន បានចេញអនុក្រឹត្យ កាលពីថ្ងៃទី២៩ ខែធ្នូ ឆ្នាំ២០១៧ ប្រកាសផ្ទេរតំណែងលោក ហ៊ុន ជា ពីអនុប្រធាននាយកដ្ឋានកណ្តាលនគរបាលយុត្តិធម៌ នៃអគ្គស្នងការនគរបាលជាតិ ទៅជាអគ្គាធិការរង នៃអគ្គាធិការដ្ឋាន ក្រសួងមហាផ្ទៃវិញ។

លោក ហ៊ុន ជា ដែលមានឋានន្តរស័ក្ដិ ជា«ឧកញ៉ា» ផងនោះ ជាកូនប្រុសរបស់លោក ហ៊ុន សាន បងប្រុសលោក ហ៊ុន សែន។ លោកត្រូវបានអតីតប្រធានព្រឹទ្ធសភា និងអតីត​ប្រធាន​គណបក្ស​ប្រជាជន​កម្ពុជា លោក ជា ស៊ីម ក្នុងឋានៈជាប្រមុខរដ្ឋស្ដីទី ដំឡើងស័ក្ដិ ឲ្យលោកក្លាយជាឧត្ដមសេនីយទោរ (ផ្កាយពីរ) កាលពីខែតុលា ឆ្នាំ២០១៤។

បុរសម្នាក់នេះ ធ្លាប់បើករថយន្ដ ប្រភេទ «Cadillac Escalade SUV ពណ៌​ខ្មៅ» ទៅបុកមនុស្ស ឲ្យស្លាប់​បាក់ដៃជើង កាលពីថ្ងៃទី០៣ ខែ​សីហា ឆ្នាំ​២០០៨ វេលា​ម៉ោង ១១:៣០ នាទី​យប់ ​នៅ​លើ​បណ្ដោយមហាវិថី​សុធារស (ភ្នំពេញ)។ នៅមុនពេលកើតរឿងរ៉ាវ ក្មួយប្រុសនាយករដ្ឋមន្ត្រីដដែល ក៏បានសំដែងមហិទ្ធិរិទ្ធិរបស់ខ្លួន​ផងដែរ ក្នុងការបាញ់កាំភ្លើង ចំនួន ៧ គ្រាប់​ឡើង​ទៅ​លើ នៅ​ក្នុង​ក្លិប​ខារ៉ាអូខេ​មួយ​ កណ្ដាលរាជធានី​ភ្នំពេញ និង​បាញ់​បន្ថែមបី​គ្រាប់​ទៀត គំរាម​មន្ត្រីនគរបាល​ មិន​ឲ្យ​ចូល​ទៅ​ជិត​កន្លែង​កើត​ហេតុ។

លោក ហ៊ុន សែន ខ្លួនលោកធ្លាប់បានប្រកាសជាសាធារណៈ ថាក្មួយប្រុសរបស់លោក បានចុះចេញពីផ្ទះចោលប្រពន្ធកូន ហើយទៅនៅសណ្ឋាគារជាមួយស្រីម្នាក់។ ថ្លែងកាលពីឆ្នាំ២០១០ ក្នុងពិធីសម្ភោធស្ពានអាកាសក្បាលថ្នល់ លោកនាយករដ្ឋមន្ត្រី បានដាក់ការសង្ស័យទៅលើលោក ហ៊ុន ជា ថាទំនងជាមានបក្ខពួក ជាប់ទាក់ទងជាមួយនឹងគ្រឿងញៀន។

លោកឪពុកមា ហ៊ុន សែន បានថ្លែងឡើងថា៖ «តាម​ការ​ស៊ើប​ដឹង វា​បាន​ចុះ​ចេញ​ពី​ផ្ទះ​ ទៅ​នៅ​សណ្ឋាគារ​ជាមួយ​ស្រី​ម្នាក់ ហើយ​វា​អាច​មាន​បក្ខពួក​គ្រឿង​ញៀន​ទៀត​ផង។ លោក​ឧត្តម​សេនីយ៍ នេត សាវឿន ក្នុង​ឋានៈ​ជា​បង​ជី​ដូន​មួយ ត្រូវ​តាម​រក​លោក ហ៊ុន ជា ឲ្យ​ឃើញ។ បើ​ក្មួយ ហ៊ុន ជា បាន​ឮ​ដំណឹង​ហើយ ​ក្មួយ​ត្រូវ​ត្រឡប់​មក​ផ្ទះ ​ឲ្យ​លឿន។ ឪពុក​មា មិន​អាច​អត់​ឱន​ឲ្យ​បាន​ទេ។ ម្តាយ​ឪពុក​ខ្លួន​ឯង​ឈឺ និង​ម្តាយ​ក្មេក​ឈឺ។ ប្រពន្ធ​ដេក​យំ​នៅ​ផ្ទះ​ ជាមួយ​កូន​ពីរ​នាក់ ខ្លួន​ឯង​ទៅ​ជាមួយ​ស្រី​ក្មេង​បាត់​ទៅ។»។

គេហទំព័រមួយ ដែលមានឈ្មោះ «Topix Cambodia» បានដាក់ឈ្មោះលោក ហ៊ុន ជា និងគូកនរបស់លោក នៅពេលនោះថា ជា«ក្រុមបងធំទី១» នៅកម្ពុជា។ ផ្ទុយទៅវិញ គេដឹងតិចតួចបំផុត ពីស្នាដៃជាផ្លូវការ របស់លោក ហ៊ុន ជា នៅក្នុងការងារប្រទេសជាតិ ដែលបានធ្វើឲ្យក្មួយប្រុសនាយករដ្ឋមន្ត្រីរូបនេះ បានឡើងឋានន្តរស័ក្ដិ ជាបន្តបន្ទាប់៕ 

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...