បន្ទាប់ពីការព្រមាន ជាបន្តបន្ទាប់ របស់គណបក្សសង្គ្រោះជាតិ ថានឹងធ្វើមហា​បាតុកម្ម នៅទូទាំងប្រទេស ដើម្បី​ប្រឆាំងនូវអ្វី ដែលគណបក្សនេះហៅថា ជាការគាបសង្កត់ និងការបិតសិទ្ធិសេរីភាពនោះ នៅពេលនេះ ដល់​វេន​លោក​នាយករដ្ឋមន្ត្រី ហ៊ុន សែន ម្ដង ដែលបានធ្វើប្រតិកម្មតប ប្រកបដោយភាសាធ្ងន់ៗ ត្រឡប់ទៅវិញ។ ភាសា​ធ្ងន់ៗ​នោះ មាន​ដូចជា «ឧទ្ទាមកម្ម ក្នុងទីក្រុង» «វាយពស់ ត្រូវវាយក្បាលមុន» និង«មិនមែនគំរាមទេ តែធ្ងន់​ជាង​គំរាម» ជា​ដើម។

សិទ្ធិរដ្ឋាភិបាល...

សម្រាប់លោក ហ៊ុន សែន បានហៅការរៀបចំធ្វើមហាបាតុកម្មនោះ គឺបានគំរាម​ដល់«ស្ថេរភាពជាតិ»។ លោក​បានសរសេរ អមជាមួយរូបភាពលោក ក្នុងឯកសណ្ឋានជាមេទ័ព តាមរយៈទំព័រហ្វេសប៊ុក របស់លោកថា៖ «មេ​ដឹកនាំ​បាតុកម្ម កុំអាងលើសិទ្ធិបញ្ចេញមតិ ហើយភ្លេចគិត ដល់សិទ្ធិរបស់អ្នកដទៃ រាប់ទាំងសិទ្ធិរបស់​រាជ​រដ្ឋាភិបាល​ផង​ដែរ។ ឧទ្ទាមកម្មក្នុងទីក្រុង​ ដើម្បីបិទបាំងជន ដែលតុលាការកាត់ទោស មិនត្រូវបានអនុញ្ញាត​ទេ។ សុំ​អស់​លោក​លោក​ស្រី​កុំញ៉ាម និងកុំអាងលើបាតុកម្ម។ វាយពស់ត្រូវវាយក្បាលមុន បើមិនជឿ​សុំ​សាក​មើល៍។»។

ការប្រកាសធ្វើមហាបាតុកម្មនេះ បានកើតឡើង បន្ទាប់ពីការចេញសាលក្រម ដ៏ចម្រូងចម្រាស់ របស់សាលា​ដំបូង​រាជធានី​ភ្នំពេញ ផ្ដន្ទាទោសលោក កឹម សុខា អនុប្រធាន (សព្វថ្ងៃជាប្រធានស្ដីទី) គណបក្សសង្គ្រោះជាតិ ឲ្យជាប់ពន្ធនាគារ៥ខែ និងពិន័យជាប្រាក់ ៨សែនរៀល។ គណបក្សសង្គ្រោះជាតិ ដែលជាគណបក្ស​ប្រឆាំងធំ​ជាង​គេ នៅកម្ពុជា បានប្រកាសច្រានចោលសាលក្រមនោះ ដោយបរិហារថា នោះជាសាលក្រមមួយ ដែល​មាន​ចរិត​នយោបាយ និងរងសំពាធ ពីសំណាក់គណបក្សប្រជាជនកម្ពុជា។

អ្នកកាន់អំណាចសព្វថ្ងៃ សម្លាប់ជាតិ...

ប៉ុន្តែមហា​បាតុកម្ម​នោះ មិនត្រឹមតែជា «ការសំដែង នូវការកើតទុក្ខមិនសុខចិត្ត» ទៅនឹងព្រឹត្តិការណ៍ចាប់ចង ឬ​ការ​ផ្តន្ទាទោស ដែលកើតឡើង តាំងពីច្រើនខែមកហើយ ទៅលើសមាជិក របស់​គណបក្ស​ប្រឆាំង​ប៉ុណ្ណោះទេ។ ប្រធានគណបក្សសង្គ្រោះជាតិ លោក សម រង្ស៊ី ដែលកំពុងនីរទេសខ្លួន នៅឯបរទេស បានថ្លែងពីប្រទេសបារាំង កាលពីម្សិលម៉ិញថា៖ «យើងមិនសុខចិត្ត ឲ្យ​អ្នក​កាន់​​អំណាច​​សព្វ​ថ្ងៃ​​ សម្លាប់​ជាតិ​យើង បន្តិចម្ដងៗនោះទេ»។

ក្នុងជំនួបជាមួយអ្នកគាំទ្រ រាប់សិបនាក់ នៅក្នុងវត្តធម្មរង្ស៊ី នៃក្រុង បាញើរស៍ (Bagneux) ភាគខាងត្បូងជាប់​រដ្ឋធានី​ប៉ារីស លោក សម រង្ស៊ី បានអះអាងថា គណបក្សរបស់លោក នឹងធ្វើមហាបាតុកម្ម នៅគ្រប់ខេត្តក្រុង ហើយ​អំពាវនាវឲ្យប្រជាជនខ្មែរ ឲ្យ«ងើប»ឡើងសំដែងមតិ ដោយសន្តិវិធី។ ប៉ុន្តែលោក និងគណបក្ស​សង្គ្រោះ​ជាតិ បានថ្លែងបើកផ្លូវ ដើម្បីឲ្យមានការចរចា​នយោបាយមួយ ជាមួយគណបក្សប្រជាជនកម្ពុជា ដែលកំពុង​កាន់​អំណាច។

ប៉ុន្តែនាយករដ្ឋមន្ត្រី​បីទសវត្សរ៍ជាង របស់កម្ពុជា បានបដិសេធរួចជាស្រេច ពីលទ្ធភាពនៃការចរចានោះ។ លោក ហ៊ុន សែន បានសរសេរបន្តថា៖ «មិនមានដំណោះស្រាយនយោបាយណា ដែលអាចរកឃើញ តាមរយៈ​បក្ស​នយោបាយ​នោះ​ឡើយ ព្រោះវាជាសមត្ថកិច្ច របស់តុលាការ។ បុគ្គលដែលធ្វើខុស កុំយកប្រទេសជាតិ ធ្វើជា​ចំណាប់​ខ្មាំង កុំយកបក្សនយោបាយ ធ្វើជាជម្រកបិទបាំង នូវកំហុសរបស់ខ្លួន។»។

បុរសខ្លាំងកម្ពុជា ដែលស្ថិតក្នុងតំណែង តាំងពីឆ្នាំ១៩៨៥មក បានប្រកាសឲ្យដឹងរួចជាស្រេច នូវចំណាត់ការ​ទប់​ស្កាត់​​មហាបាតុកម្មនោះ ដូច្នេះថា៖ «ខ្ញុំបញ្ជា​ដល់គ្រប់កម្លាំងមានសមត្ថកិច្ច ត្រៀមខ្លួនកំចាត់ចោល នូវរាល់​សកម្មភាព​ខុស​ច្បាប់​ទាំងអស់​ ដើម្បីការពារនូវភាពសុខសាន្ត របស់ប្រជាជន។ ដោយតម្លៃណាក៏ដោយ គឺ​ត្រូវ​ការពារ​ស្ថេរភាព​នយោបាយ​ សន្តិសុខសណ្តាប់ធ្នាប់សង្គម ឱ្យខានតែបាន ព្រោះវាជាតម្រូវការរបស់ជាតិ និង​ប្រជាជន។»។

លោក ហ៊ុន សែន បានសរសេរទៀតថា៖ «នេះមិនមែនគំរាមទេ តែវាធ្ងន់ជាងគំរាមទៅទៀត ព្រោះជាប្រភេទ​នៃ​បទបញ្ជា ដល់​កម្លាំងរបស់រាជរដ្ឋាភិបាលទាំងអស់ ត្រៀមខ្លួនកំចាត់ចោល រាល់កម្លាំងដែលធ្វើសកម្មភាព បំផ្លាញ​សន្តិសុខជាតិ ហើយខ្ញុំមានសិទ្ឋិ និងនិយាយរបៀបនេះ ព្រោះវាជាសិទ្ធិអំណាច នាយករដ្ឋមន្ត្រី»៕